Tamattant ǝn Yaqub d iguz ǝn Butros kasaw

1Azzaman en da a daɣ issǝnta ǝmǝnokal Herod ǝzǝɣɣǝzzǝb n arat daɣ aytedan n Ǝlkǝnisat. 2Isassanɣa ǝs takoba Yaqub wa n amadray ǝn Yaxya. 3As inay as oggaman Kǝl-Ǝlyǝhud awen, isattarmas Butros. Itaggu awen adan n ǝmud wa daɣ tattin aytedan šigǝlwen šin wǝr iha xamira. 4Isassag-ay daɣ kasaw, issǝwǝq-qu i maraw sojitan ǝd sǝdis a tu-tinǝmǝzrǝynen s ǝkkoz ǝkkoz. Otâs a das-išrǝɣ dat awedan kul dǝffǝr ǝmud wa n Akkay.

5A iha Butros kasaw den, Ǝlkǝnisat ǝnta tǝdgâz wǝllen tǝtansay-as Mǝššina.

6As ahad wad zʼifaw išrǝɣ-as Herod, insâ Butros gǝr ǝššin sojitan a t-ǝttâfnen s ǝššin sassaran, ǝbdâdan deɣ magazan wiyyad dat ǝmi ǝn kasaw. 7Wala a ihogan inafalal-du angalos iyyan n Ǝmǝli, imalawlaw adag wa daɣ insa Butros daɣ ammas ǝn kasaw. Tǝzzar idas angalos tasaga ǝn Butros, issǝnkar-tu inn-as: «Ǝbdǝd tarmâd!» Ǝrtakan sassaran win as ǝkradan fassan-net daɣ tamazayt ten. 8Harwa inn-as: «Ǝzlǝg isǝlsa-nak, tǝsǝlaɣ iɣateman-nak.» Iga Butros awen da. «Ǝmǝrǝdda ǝzlǝg ǝbǝrnuz-nak, tǝlkǝmaɣ-i-du.» 9Igmad-du Butros ilkâm y angalos, wǝr issen as awa itaggu angalos den tidǝt a imos, iɣil targǝt awen. 10Okayan fǝl magazan win azzarnen ǝd win ǝllanen dǝnnǝg-san, amaran osan-du tǝsǝhǝrt ǝn tǝzoli tǝswâdat sa sǝr ǝɣrǝm. Tǝnnolam dat-san šin man-net, ǝrdaɣan. Ǝssǝwalan ǝd tarrayt iyyat, wala a ihogan ifal-tu angalos.

11Tǝzzar iggaz Butros annawalat n aɣaf-net, inna: «Ǝmǝrǝdda ǝkkasaɣ aššak daɣ-as, Ǝmǝli Mǝššina a d-izammazalan angalos-net, ikkas-i-du daɣ fassan n ǝmǝnokal Herod ǝd talbast kul tas ǝran Kǝl-Ǝlyǝhud a di-tǝgrǝw.» 12Amaran igra taɣara-net, ikka ehan ǝn Maryama ta n anna ǝn Yaxya was itawannu Markus. Ǝmminayan ɣur-ǝs aytedan aggotnen tansayan Mǝššina. 13Ikawkaw imi n aɣalla, tǝgla-du tamaššaɣalt tǝgât esǝm Ɣoda y ad tǝssǝn awa imos awedan. 14As tǝzday ǝmǝsli ǝn Butros, awa tǝga daɣ tǝdǝwit, edag n a das-talǝm, tozal tǝqqal ammas n ahan, tǝmal as Butros illa dat ǝmi n aɣalla. 15Ǝnnan-as: «Kam, ǝmmǝskǝl a tǝgeɣ!» Mišan tǝzazzayyar-asan daɣ-as ǝnta daɣ awen. Amaran ǝnnan-as: «Daɣ adi angalos-net adi.» 16A ǝgannin awen, Butros ǝnta itakawkaw-asan imi n aɣalla. As olaman, ǝnayan-tu, iga sǝr-san awen ǝsǝmmǝklǝl labasan. 17Isaddagan-asan s ǝfus-net ad affastin, tǝzzar imal-asan tǝmǝwit kul tas t-id-ikkas Ǝmǝli Mǝššina daɣ kasaw. Inn-asan deɣ: «Ǝmǝlǝt adi i Yaqub ǝd mǝdrayan-nana win hadatnen.» Amaran ifal-tan, ikka edag iyyan.

18As affaw, tǝga tǝnajarwayat labasat daɣ sojitan; akk iyyan isastan ǝmidi-net d awa iga Butros. 19As t-id-aba y aytedan win as t-issǝswad Herod, issǝstan sojitan win t-ogaznen, amaran omar s ad tawanɣin kǝrǝz. Dǝffǝr awen igmad Herod akal wa n Yahudǝyya, izagaday ikka aɣrǝm ǝn Qaysarǝya y a daɣ-as agu tamert.

Iba ǝn Herod

20Awen as itaggu, Herod ih-ay alham labasan n aytedan n ǝɣrǝm wa n Tir ǝd wa n Sidon. Idhal-tan Blastus wa n ǝmǝššewwǝr ǝn Herod, namannakan zammazalan ǝs Herod almawakkilan-nasan, fǝl a dǝr-ǝs aknin, fǝlas akal-net a du-gammadan sudar-nasan. 21As d-osa ǝzǝl wa itawasanafranan, izlag Herod isǝlsa-net win taɣmar tǝzzar iqqim fǝl tǝxawit-net ta n taɣmar, amaran iššewal i tamattay. 22Ad saɣaren aytedan, gannin: «Ǝmǝsli wa in ǝmǝli iyyan, wǝrgeɣ in awedan!» 23Wala a ihogan iwat-tu angalos n Ǝmǝli fǝlas igi a iga iman-net daɣ adag ǝn Mǝššina, wǝr iga y Ǝmǝli adkul wa dǝr ihor; tǝzzar ǝtšanat-tu tǝwakkawen, aba-tu.

24Awal ǝn Mǝššina ǝnta, igla itiwǝzǝwiz, tigatan aytedan win sǝr ǝzzǝgzannen.

25Amaran Barnabas ǝd Talut as ǝɣradan ǝššǝɣǝl wa tan-d-ewayan s ǝɣrǝm ǝn Yerusalam, ǝqqalan s as d-ǝhan, ǝddewan ǝd Yaxya was itawannu Markus.