1אֱמֶת אֲנִי מְדַבֵּר בַּמָּשִׁיחַ וְלֹא אֲשַׁקֵּר וְדַעְתִּי מְעִידָה לִי בְּרוּחַ הַקֹּדֶשׁ׃ 2כִּי־​גָדוֹל עִצְּבוֹנִי וְאֵין־​קֵץ לְדַאֲבוֹן לִבִּי׃ 3כִּי מִי־​יִתֵּן הֱיוֹתִי אֲנִי לְחֵרֶם מִן־​הַמָּשִׁיחַ בְּעַד אַחַי שְׁאֵרִי וּבְשָׂרִי׃ 4אֲשֶׁר הֵם בְּנֵי יִשְׂרָאֵל וְלָהֶם מִשְׁפַּט הַבָּנִים וְהַכָּבוֹד וְהַבְּרִיתוֹת וּמַתַּן הַתּוֹרָה וְהָעֲבוֹדָה וְהַהַבְטָחוֹת׃ 5וְלָהֶם הָאָבוֹת וּמֵהֶם יָצָא הַמָּשִׁיחַ לְפִי בְשָׂרוֹ אֲשֶׁר־​הוּא אֱלֹהִים עַל־​הַכֹּל מְבֹרָךְ לְעוֹלָמִים אָמֵן׃

6אֲבָל לֹא שֶׁנָּפַל דְּבַר אֱלֹהִים אָרְצָה כִּי לֹא־​כֹל אֲשֶׁר מִיִּשְׂרָאֵל יִשְׂרָאֵל הֵמָּה׃ 7וְלֹא מִפְּנֵי שֶׁהֵם זֶרַע אַבְרָהָם כֻּלָּם בָּנִים כִּי בְיִצְחָק יִקָּרֵא לְךָ זָרַע׃a 8כְּלוֹמַר לֹא בְנֵי־​הַבָּשָׂר הֵמָּה בְּנֵי הָאֱלֹהִים כִּי אִם־​בְּנֵי הַהַבְטָחָה הֵם הַנֶּחֱשָׁבִים לְזָרַע׃ 9כִּי־​דְבַר הַהַבְטָחָה הוּא מַה־​שֶּׁנֶּאֱמַר לַמּוֹעֵד אָשׁוּב וּלְשָׂרָה בֵן׃b 10וְלֹא־​עוֹד אֶלָּא שֶׁהָיָה גַּם־​בְּרִבְקָה וְהִיא הָרָה לְאֶחָד לְיִצְחָק אָבִינוּ׃ 11כִּי בְּטֶרֶם יֻלְּדוּ בָנֶיהָ וְעוֹד לֹא־​עֲשׂוּ טוֹב אוֹ־​רָע לְמַעַן תָּקוּם עֲצַת הָאֱלֹהִים כְּפִי בְחִירָתוֹ לֹא מִתּוֹךְ מַעֲשִׂים כִּי אִם־​כִּרְצוֹן הַקֹּרֵא׃ 12נֶאֱמַר לָהּ כִּי־​רַב יַעֲבֹד צָעִיר׃c 13כַּכָּתוּב וָאֹהַב אֶת־​יַעֲקֹב וְאֶת־​עֵשָׂו שָׂנֵאתִי׃d

14אִם־​כֵּן הֲנֹאמַר שֶׁיֶּשׁ־​עָוֶל בֵּאלֹהִים חָלִילָה׃ 15כִּי לְמשֶׁה אָמַר וְחַנֹּתִי אֶת־​אֲשֶׁר אָחֹן וְרִחַמְתִּי אֶת־​אֲשֶׁר אֲרַחֵם׃e 16וְעַל־​כֵּן אֵין הַדָּבָר לֹא־​בְיַד הָרֹצֶה וְלֹא־​בְיַד הָרָץ כִּי אִם־​בְּיַד הָאֱלֹהִים הַמְרַחֵם׃ 17כִּי־​כֵן הַכָּתוּב אֹמֵר לְפַרְעֹה בַּעֲבוּר זֹאת הֶעֱמַדְתִּיךָ בַּעֲבוּר הַרְאֹתְךָ אֶת־​כֹּחִי וּלְמַעַן סַפֵּר שְׁמִי בְּכָל־​הָאָרֶץ׃f 18וְיִוָּדַע בָּזֶה שֶׁמִּי שֶׁיַּחְפֹּץ יְחֻנֶּנּוּ וּמִי שֶׁיַּחְפֹּץ יַקְשֶׁה לִבּוֹ׃

19וְאִם תֹּאמַר לָמָּה־​זֶּה יִפְקֹד עָוֹן כִּי נֶגֶד רְצוֹנוֹ מִי יִתְיַצָּב׃ 20אֲבָל בֶּן־​אָדָם מִי אַתָּה כִּי תָרִיב אֶת־​הָאֱלֹהִים הֲיֹאמַר יֵצֶר לְיֹצְרוֹ מַדּוּעַ כָּכָה עֲשִׂיתָנִי׃g 21אִם־​אֵין רְשׁוּת לַיֹּצֵר עַל־​הַחֹמֶר לַעֲשׂוֹת הַגֹּלֶם הָאֶחָד כְּלִי כָבוֹד אוֹ כְּלִי קָלוֹן׃ 22וּמָה אֵפוֹא אִם־​הָאֱלֹהִים הֶחָפֵץ לְהַרְאוֹת זַעְמוֹ וּלְהוֹדִיעַ גְּבוּרָתוֹ נָשָׂא בְּכָל־​אֹרֶךְ רוּחוֹ אֶת־​כְּלֵי הַזַּעַם הַנְּכוֹנִים לַאֲבַדּוֹן׃ 23לְהוֹדִיעַ גַּם־​אֶת־​עשֶׁר כְּבוֹדוֹ בִּכְלֵי הַחֲנִינָה אֲשֶׁר הֵכִין לְכָבוֹד׃ 24וְהֵם אֲנַחְנוּ אֲשֶׁר קְרָאָנוּ לֹא מִן־​הַיְּהוּדִים לְבַדָּם כִּי אַף מִן־​הַגּוֹיִם׃

25כְּאָמְרוֹ בְהוֹשֵׁעַ אֶקְרָא לְלֹא־​עַמִּי עַמִּי וּלְלֹא־​רֻחָמָה רֻחָמָה׃h

26וְהָיָה בִּמְקוֹם אֲשֶׁר־​יֵאָמֵר לָהֶם לֹא־​עַמִּי אַתֶּם יֵאָמֵר לָהֶם בְּנֵי אֵל־​חָי׃i

27וִישַׁעְיָהוּ קֹרֵא עַל־​יִשְׂרָאֵל כִּי אִם־​יִהְיֶה מִסְפַּר בְּנֵי יִשְׂרָאֵל כְּחוֹל הַיָּם שְׁאָר יָשׁוּב בּוֹ (כִּלָּיוֹן חָרוּץ שׁוֹטֵף צְדָקָה)׃ 28כִּי כָלָה וְנֶחֱרָצָה אֲדֹנָי עֹשֶׂה בְּקֶרֶב הָאָרֶץ׃j

29וְכַאֲשֶׁר אָמַר יְשַׁעְיָהוּ לִפְנֵי מִזֶּה לוּלֵי יְהוָֹה צְבָאוֹת הוֹתִיר לָנוּ שָׂרִיד כִּמְעָט כִּסְדֹם הָיִינוּ לַעֲמֹרָה דָּמִינוּ׃k

30וְעַתָּה הֲנֹאמַר שֶׁהַגּוֹיִם אֲשֶׁר לֹא רָדְפוּ אַחֲרֵי הַצְּדָקָה הִשִׂיגוּ אֶת־​הַצְּדָקָה הִיא הַצְּדָקָה אֲשֶׁר מִתּוֹךְ הָאֱמוּנָה׃ 31וְיִשְׂרָאֵל בְּרָדְפוֹ תּוֹרַת צְדָקָה לְתוֹרַת הַצְדָקָה לֹא הִגִּיעַ׃ 32וְעַל־​מָה עַל־​אֲשֶׁר־​לֹא מֵאֱמוּנָה דְּרָשׁוּהָ כִּי אִם־​מִמַּעֲשִׂים כִּי הִתְנַגְּפוּ בְּאֶבֶן נָגֶף׃

33כַּכָּתוּב הִנְנִי יִסַּד בְּצִיּוֹן אֶבֶן נֶגֶף וְצוּר מִכְשׁוֹל וְכָל־​הַמַּאֲמִין בּוֹ לֹא יֵבוֹשׁ׃l