<< Romans 8 GRK >>


Those who are in Christ are free from condemnation.
   1   Οὐδὲν  ἄρα  νῦν  κατάκριμα  τοῖς  ἐν  Χριστῷ  Ἰησοῦ.  2   ὁ  γὰρ  νόμος  τοῦ  πνεύματος  τῆς  ζωῆς  ἐν  Χριστῷ  Ἰησοῦ  ἠλευθέρωσεν  σε  ἀπὸ  τοῦ  νόμου  τῆς  ἁμαρτίας  καὶ  τοῦ  θανάτου.  3   Τὸ  γὰρ  ἀδύνατον  τοῦ  νόμου  ἐν  ᾧ  ἠσθένει  διὰ  τῆς  σαρκός,  ὁ  θεὸς  τὸν  ἑαυτοῦ  υἱὸν  πέμψας  ἐν  ὁμοιώματι  σαρκὸς  ἁμαρτίας  καὶ  περὶ  ἁμαρτίας  κατέκρινεν  τὴν  ἁμαρτίαν  ἐν  τῇ  σαρκί,  4   ἵνα  τὸ  δικαίωμα  τοῦ  νόμου  πληρωθῇ  ἐν  ἡμῖν  τοῖς  μὴ  κατὰ  σάρκα  περιπατοῦσιν  ἀλλὰ  κατὰ  πνεῦμα. 


What harm comes of the flesh;
5   οἱ  γὰρ  κατὰ  σάρκα  ὄντες  τὰ  τῆς  σαρκὸς  φρονοῦσιν,  οἱ  δὲ  κατὰ  πνεῦμα  τὰ  τοῦ  πνεύματος.  6   τὸ  γὰρ  φρόνημα  τῆς  σαρκὸς  θάνατος,  τὸ  δὲ  φρόνημα  τοῦ  πνεύματος  ζωὴ  καὶ  εἰρήνη·  7   διότι  τὸ  φρόνημα  τῆς  σαρκὸς  ἔχθρα  εἰς  θεὸν,  τῷ  γὰρ  νόμῳ  τοῦ  θεοῦ  οὐχ  ὑποτάσσεται,  οὐδὲ  γὰρ  δύναται·  8   οἱ  δὲ  ἐν  σαρκὶ  ὄντες  θεῷ  ἀρέσαι  οὐ  δύνανται.  9   ὑμεῖς  δὲ  οὐκ  ἐστὲ  ἐν  σαρκὶ  ἀλλὰ  ἐν  πνεύματι,  εἴπερ  πνεῦμα  θεοῦ  οἰκεῖ  ἐν  ὑμῖν  εἰ  δέ  τις  πνεῦμα  Χριστοῦ  οὐκ  ἔχει,  οὗτος  οὐκ  ἔστιν  αὐτοῦ.  10   εἰ  δὲ  Χριστὸς  ἐν  ὑμῖν,  τὸ  μὲν  σῶμα  νεκρὸν  διὰ  ἁμαρτίαν  τὸ  δὲ  πνεῦμα  ζωὴ  διὰ  δικαιοσύνην.  11   εἰ  δὲ  τὸ  πνεῦμα  τοῦ  ἐγείραντος  τὸν  Ἰησοῦν  ἐκ  νεκρῶν  οἰκεῖ  ἐν  ὑμῖν,  ὁ  ἐγείρας  ἐκ  νεκρῶν  Χριστὸν  Ἰησοῦν  ζῳοποιήσει  καὶ  τὰ  θνητὰ  σώματα  ὑμῶν  διὰ  τοῦ  ἐνοικοῦντος  αὐτοῦ  πνεύματος  ἐν  ὑμῖν. 
   12   Ἄρα  οὖν,  ἀδελφοί,  ὀφειλέται  ἐσμὲν  οὐ  τῇ  σαρκὶ  τοῦ  κατὰ  σάρκα  ζῆν, 


and what good of the Spirit.
13   εἰ  γὰρ  κατὰ  σάρκα  ζῆτε,  μέλλετε  ἀποθνῄσκειν·  εἰ  δὲ  πνεύματι  τὰς  πράξεις  τοῦ  σώματος  θανατοῦτε,  ζήσεσθε.  14   ὅσοι  γὰρ  πνεύματι  θεοῦ  ἄγονται,  οὗτοι  υἱοὶ  θεοῦ  εἰσιν.  15   οὐ  γὰρ  ἐλάβετε  πνεῦμα  δουλείας  πάλιν  εἰς  φόβον  ἀλλὰ  ἐλάβετε  πνεῦμα  υἱοθεσίας  ἐν  ᾧ  κράζομεν·  ἀββα  ὁ  πατήρ.  16   αὐτὸ  τὸ  πνεῦμα  συμμαρτυρεῖ  τῷ  πνεύματι  ἡμῶν  ὅτι  ἐσμὲν  τέκνα  θεοῦ.  17   εἰ  δὲ  τέκνα  καὶ  κληρονόμοι·  κληρονόμοι  μὲν  θεοῦ,  συγκληρονόμοι  δὲ  Χριστοῦ,  εἴπερ  συμπάσχομεν  ἵνα  καὶ  συνδοξασθῶμεν. 
   18   Λογίζομαι  γὰρ  ὅτι  οὐκ  ἄξια  τὰ  παθήματα  τοῦ  νῦν  καιροῦ  πρὸς  τὴν  μέλλουσαν  δόξαν  ἀποκαλυφθῆναι  εἰς  ἡμᾶς. 


The glorious deliverance the creation longs for,
19   ἡ  γὰρ  ἀποκαραδοκία  τῆς  κτίσεως  τὴν  ἀποκάλυψιν  τῶν  υἱῶν  τοῦ  θεοῦ  ἀπεκδέχεται.  20   τῇ  γὰρ  ματαιότητι  ἡ  κτίσις  ὑπετάγη,  οὐχ  ἐκοῦσα  ἀλλὰ  διὰ  τὸν  ὑποτάξαντα,  ἐφ’  ἐλπίδι  21   ὅτι  καὶ  αὐτὴ  ἡ  κτίσις  ἐλευθερωθήσεται  ἀπὸ  τῆς  δουλείας  τῆς  φθορᾶς  εἰς  τὴν  ἐλευθερίαν  τῆς  δόξης  τῶν  τέκνων  τοῦ  θεοῦ.  22   οἴδαμεν  γὰρ  ὅτι  πᾶσα  ἡ  κτίσις  συστενάζει  καὶ  συνωδίνει  ἄχρι  τοῦ  νῦν·  23   οὐ  μόνον  δὲ  ἀλλὰ  καὶ  αὐτοὶ  τὴν  ἀπαρχὴν  τοῦ  πνεύματος  ἔχοντες,  ἡμεῖς  καὶ  αὐτοὶ  ἐν  ἑαυτοῖς  στενάζομεν  υἱοθεσίαν  ἀπεκδεχόμενοι,  τὴν  ἀπολύτρωσιν  τοῦ  σώματος  ἡμῶν.  24   τῇ  γὰρ  ἐλπίδι  ἐσώθημεν·  ἐλπὶς  δὲ  βλεπομένη  οὐκ  ἔστιν  ἐλπίς·  ὁ  γὰρ  βλέπει  τίς  ἐλπίζει;  25   εἰ  δὲ  ὁ  οὐ  βλέπομεν  ἐλπίζομεν  δι’  ὑπομονῆς  ἀπεκδεχόμεθα. 
   26   Ὡσαύτως  δὲ  καὶ  τὸ  πνεῦμα  συναντιλαμβάνεται  τῇ  ἀσθενείᾳ  ἡμῶν·  τὸ  γὰρ  τί  προσευξώμεθα  καθὸ  δεῖ  ουκ  οἴδαμεν  ἀλλὰ  αὐτὸ  τὸ  πνεῦμα  ὑπερεντυγχάνει  στεναγμοῖς  ἀλαλήτοις·  27   ὁ  δὲ  ἐραυνῶν  τὰς  καρδίας  οἶδεν  τί  τὸ  φρόνημα  τοῦ  πνεύματος  ὅτι  κατὰ  θεὸν  ἐντυγχάνει  ὑπὲρ  ἁγίων.  28   Οἴδαμεν  δὲ  ὅτι  τοῖς  ἀγαπῶσιν  τὸν  θεὸν  πάντα  συνεργεῖ  ὁ  θεὸς  εἰς  ἀγαθόν,  τοῖς  κατὰ  πρόθεσιν  κλητοῖς  οὖσιν. 


was beforehand decreed from God.
29   ὅτι  οὓς  προέγνω,  καὶ  προώρισεν  συμμόρφους  τῆς  εἰκόνος  τοῦ  υἱοῦ  αὐτοῦ  εἰς  τὸ  εἶναι  αὐτὸν  πρωτότοκον  ἐν  πολλοῖς  ἀδελφοῖς·  30   οὓς  δὲ  προώρισεν,  τούτους  καὶ  ἐκάλεσεν·  καὶ  οὓς  ἐκάλεσεν,  τούτους  καὶ  ἐδικαίωσεν  οὓς  δὲ  ἐδικαίωσεν,  τούτους  καὶ  ἐδόξασεν. 
   31   Τί  οὖν  ἐροῦμεν  πρὸς  ταῦτα;  εἰ  ὁ  θεὸς  ὑπὲρ  ἡμῶν,  τίς  καθ’  ἡμῶν;  32   ὅς  γε  τοῦ  ἰδίου  υἱοῦ  οὐκ  ἐφείσατο  ἀλλὰ  ὑπὲρ  ἡμῶν  πάντων  παρέδωκεν  αὐτόν,  πῶς  οὐχὶ  καὶ  σὺν  αὐτῷ  τὰ  πάντα  ἡμῖν  χαρίσεται;  33   τίς  ἐγκαλέσει  κατὰ  ἐκλεκτῶν  θεοῦ;  θεὸς  ὁ  δικαιῶν·  34   τίς  ὁ  κατακρινῶν;  Χριστὸς  Ἰησοῦς  ὁ  ἀποθανών,  μᾶλλον  δὲ  ἐγερθείς  ἐκ  νεκρῶν,  ὁς  ἐστιν  ἐν  δεξιᾷ  τοῦ  θεοῦ,  ὃς  καὶ  ἐντυγχάνει  ὑπὲρ  ἡμῶν.  35   τίς  ἡμᾶς  χωρίσει  ἀπὸ  τῆς  ἀγάπης  τοῦ  Χριστοῦ;  θλῖψις  ἢ  στενοχωρία  ἢ  διωγμὸς  ἢ  λιμὸς  ἢ  γυμνότης  ἢ  κίνδυνος  ἢ  μάχαιρα;  36   καθὼς  γέγραπται  ὅτι 
      ἔνεκεν  σοῦ  θανατούμεθα  ὅλην  τὴν  ἡμέραν, 
            ἐλογίσθημεν  ὡς  πρόβατα  σφαγῆς. 
37   ἀλλ’  ἐν  τούτοις  πᾶσιν  ὑπερνικῶμεν  διὰ  τοῦ  ἀγαπήσαντος  ἡμᾶς. 


Nothing can sever us from his love.
38   πέπεισμαι  γὰρ  ὅτι  οὔτε  θάνατος  οὔτε  ζωὴ  οὔτε  ἄγγελοι  οὔτε  ἀρχαὶ  οὔτε  ἐνεστῶτα  οὔτε  μέλλοντα  οὔτε  δυνάμεις  39   οὔτε  ὕψωμα  οὔτε  βάθος  οὔτε  τις  κτίσις  ἑτέρα  δυνήσεται  ἡμᾶς  χωρίσαι  ἀπὸ  τῆς  ἀγάπης  τοῦ  θεοῦ  τῆς  ἐν  Χριστῷ  Ἰησοῦ  τῷ  κυρίῳ  ἡμῶν. 
<< Romans 8 >>
Biblos Greek and Hebrew Study Bible © 2010 Biblos.com
Online Parallel Bible