1   לַמְנַצֵּ֬חַ  עַֽל־  נְגִינַ֬ת  לְדָוִֽד׃  שִׁמְעָ֣ה  אֱ֭לֹהִים  רִנָּתִ֑י  הַ֝קְשִׁ֗יבָה  תְּפִלָּתִֽי׃  2   מִקְצֵ֤ה  הָאָ֨רֶץ  אֵלֶ֣יךָ  אֶ֭קְרָא  בַּעֲטֹ֣ף  לִבִּ֑י  בְּצוּר־  יָר֖וּם  מִמֶּ֣נִּי  תַנְחֵֽנִי׃  3   כִּֽי־  הָיִ֣יתָ  מַחְסֶ֣ה  לִ֑י  מִגְדַּל־  עֹ֝֗ז  מִפְּנֵ֥י  אֹויֵֽב׃ 

4   אָג֣וּרָה  בְ֭אָהָלְךָ  עֹולָמִ֑ים  אֶֽחֱסֶ֨ה  בְסֵ֖תֶר  כְּנָפֶ֣יךָ  סֶּֽלָה׃  5   כִּֽי־  אַתָּ֣ה  אֱ֭לֹהִים  שָׁמַ֣עְתָּ  לִנְדָרָ֑י  נָתַ֥תָּ  יְ֝רֻשַּׁ֗ת  יִרְאֵ֥י  שְׁמֶֽךָ׃  6   יָמִ֣ים  עַל־  יְמֵי־  מֶ֣לֶךְ  תֹּוסִ֑יף  נֹותָ֗יו  כְּמֹו־  דֹ֥ר  וָדֹֽר׃  7   יֵשֵׁ֣ב  עֹ֭ולָם  לִפְנֵ֣י  אֱלֹהִ֑ים  חֶ֥סֶד  וֶ֝אֱמֶ֗ת  מַ֣ן  יִנְצְרֻֽהוּ׃  8   כֵּ֤ן  אֲזַמְּרָ֣ה  שִׁמְךָ֣  לָעַ֑ד  לְֽשַׁלְּמִ֥י  נְדָרַ֗י  יֹ֣ום  יֹֽום׃ 

---

<< Psalm 61 >>

---

Biblos Greek and Hebrew Study Bible © 2010 Biblos.com

---

Online Parallel Bible