<< Psalms 17 HEB >>


David, in confidence of his integrity, craves defense of God against his enemies
1   תְּפִלָּ֗ה  לְדָ֫וִ֥ד  שִׁמְעָ֤ה  יְהוָ֨ה  צֶ֗דֶק  הַקְשִׁ֥יבָה  רִנָּתִ֗י  הַאֲזִ֥ינָה  תְפִלָּתִ֑י  בְּ֝לֹ֗א  שִׂפְתֵ֥י  מִרְמָֽה׃  2   מִ֭לְּפָנֶיךָ  מִשְׁפָּטִ֣י  יֵצֵ֑א  עֵ֝ינֶ֗יךָ  תֶּחֱזֶ֥ינָה  מֵישָׁרִֽים׃  3   בָּ֘חַ֤נְתָּ  לִבִּ֨י  פָּ֘קַ֤דְתָּ  לַּ֗יְלָה  צְרַפְתַּ֥נִי  בַל־  תִּמְצָ֑א  זַ֝מֹּתִ֗י  בַּל־  יַעֲבָר־  פִּֽי׃  4   לִפְעֻלֹּ֣ות  אָ֭דָם  בִּדְבַ֣ר  שְׂפָתֶ֑יךָ  אֲנִ֥י  מַ֗רְתִּי  אָרְחֹ֥ות  פָּרִֽיץ׃  5   תָּמֹ֣ךְ  אֲ֭שֻׁרַי  בְּמַעְגְּלֹותֶ֑יךָ  בַּל־  נָמֹ֥וטּוּ  פְעָמָֽי׃  6   אֲנִֽי־  קְרָאתִ֣יךָ  כִֽי־  תַעֲנֵ֣נִי  אֵ֑ל  הַֽט־  אָזְנְךָ֥  לִ֝֗י  שְׁמַ֣ע  אִמְרָתִֽי׃  7   הַפְלֵ֣ה  חֲ֭סָדֶיךָ  מֹושִׁ֣יעַ  חֹוסִ֑ים  מִ֝מִּתְקֹומְמִ֗ים  בִּֽימִינֶֽךָ׃  8   מְרֵנִי  כְּאִישֹׁ֣ון  בַּת־  עָ֑יִן  בְּצֵ֥ל  כְּ֝נָפֶ֗יךָ  תַּסְתִּירֵֽנִי׃  9   מִפְּנֵ֣י  רְ֭שָׁעִים  ז֣וּ  שַׁדּ֑וּנִי  אֹיְבַ֥י  בְּ֝נֶ֗פֶשׁ  יַקִּ֥יפוּ  עָלָֽי׃ 


He shows their pride, craft, and eagerness
10   חֶלְבָּ֥מֹו  סָּגְר֑וּ  פִּ֝֗ימֹו  דִּבְּר֥וּ  בְגֵאֽוּת׃  11   אַ֭שֻּׁרֵינוּ  עַתָּ֣ה  [סְבָבוּנִי  כ]  (סְבָב֑וּנוּ  ק)  עֵינֵיהֶ֥ם  יָ֝שִׁ֗יתוּ  לִנְטֹ֥ות  בָּאָֽרֶץ׃  12   דִּמְיֹנֹ֗ו  כְּ֭אַרְיֵה  יִכְסֹ֣וף  לִטְרֹ֑וף  וְ֝כִכְפִ֗יר  יֹשֵׁ֥ב  בְּמִסְתָּרִֽים׃ 


He prays against them in confidence of his hope
13   קוּמָ֤ה  יְהוָ֗ה  קַדְּמָ֣ה  פָ֭נָיו  הַכְרִיעֵ֑הוּ  פַּלְּטָ֥ה  נַ֝פְשִׁ֗י  מֵרָשָׁ֥ע  חַרְבֶּֽךָ׃  14   מִֽמְתִ֥ים  יָדְךָ֨  יְהוָ֡ה  מִֽמְתִ֬ים  מֵחֶ֗לֶד  חֶלְקָ֥ם  בַּֽחַיִּים֮  [וּצְפִינְךָ  כ]  (וּֽצְפוּנְךָ֮  ק)  תְּמַלֵּ֪א  בִ֫טְנָ֥ם  יִשְׂבְּע֥וּ  בָנִ֑ים  וְהִנִּ֥יחוּ  יִ֝תְרָ֗ם  לְעֹולְלֵיהֶֽם׃  15   אֲנִ֗י  בְּ֭צֶדֶק  אֶחֱזֶ֣ה  פָנֶ֑יךָ  אֶשְׂבְּעָ֥ה  בְ֝הָקִ֗יץ  תְּמוּנָתֶֽךָ׃ 
<< Psalm 17 >>
Biblos Greek and Hebrew Study Bible © 2010 Biblos.com
Online Parallel Bible