<< Matthew 2 GRK >>


The wise men from the east enquire after Jesus;
   1   Τοῦ  δὲ  Ἰησοῦ  γεννηθέντος  ἐν  βηθλέεμ  τῆς  Ἰουδαίας  ἐν  ὴμέραις  Ἡρῴδου  τοῦ  βασιλέως,  ἰδοὺ  μάγοι  ἀπὸ  ἀνατολῶν  παρεγένοντο  εἰς  Ἱεροσόλυμα  2   λεγοντες·  ποῦ  ἐστιν  ὁ  τεχθεὶς  βασιλεὺς  τῶν  Ιουδαίων;  εἴδομεν  γὰρ  αὐτοῦ  τὸν  ἀστέρα  ἐν  τῇ  ἀνατολῇ  καὶ  ἤλθομεν  προσκυνῆσαι  αὐτῷ. 


at which Herod is alarmed.
3   ἀκούσας  δὲ  ὁ  βασιλεὺς  Ἡρῴδης  ἐταράχθη  καὶ  πᾶσα  Ἱεροσόλυμα  μετ’  αὐτοῦ,  4   καὶ  συναγαγὼν  πάντας  τοὺς  ἀρχιερεῖς  καὶ  γραμματεῖς  τοῦ  λαοῦ  ἐπυνθάνετο  παρ’  αὐτῶν  ποῦ  ὁ  χριστὸς  γεννᾶται.  5   οἱ  δὲ  εἶπαν  αὐτῷ  ἐν  βηθλέεμ  τῆς  Ἰουδαίας·  οὕτως  γὰρ  γέγραπται  διὰ  τοῦ  προφήτου· 
      6   καὶ  σὺ  βηθλέεμ  γῇ  Ἰούδα, 
            οὐδαμῶς  ἐλαχίστη  εἶ  ἐν  τοῖς  ἡγεμόσιν  Ἰούδα· 
         ἐκ  σοῦ  γὰρ  ἐξελεύσεται  ἡγούμενος 
            ὅστις  ποιμανεῖ  τὸν  λαόν  μου  τὸν  Ἰσραήλ. 
   7   Τότε  Ἡρῴδης  λάθρᾳ  καλέσας  τοὺς  μάγους  ἠκρίβωσεν  παρ’  αὐτῶν  τὸν  χρόνον  τοῦ  φαινομένου  ἀστέρος,  8   καὶ  πέμψας  αὐτοὺς  εἰς  βηθλέεμ  εἶπεν  πορευθέντες  ἐξετάσατε  ἀκριβῶς  περὶ  τοῦ  παιδίου·  ἐπὰν  δὲ  εὕρητε  ἀπαγγείλατε  μοι,  ὅπως  καγὼ  ἐλθὼν  προσκυνήσω  αὐτῷ. 


They are directed by a star to Bethlehem, worship him, and offer their presents.
9   οἱ  δὲ  ἀκούσαντες  τοῦ  βασιλέως  ἐπορεύθησαν  καὶ  ἰδοὺ  ὁ  ἀστήρ  ὃν  εἶδον  ἐν  τῇ  ἀνατολῇ.  προῆγεν  αὐτούς,  ἕως  ἐλθὼν  ἐστάθη  ἐπάνω  οὗ  ἦν  τὸ  παιδίον.  10   ἰδόντες  δὲ  τὸν  ἀστέρα  ἐχάρησαν  χαρὰν  μεγάλην  σφόδρα.  11   καὶ  ἐλθόντες  εἰς  τὴν  οἰκίαν  εἶδον  τὸ  παιδίον  μετὰ  Μαρίας  τῆς  μητρὸς  αὐτοῦ,  καὶ  πεσόντες  προσεκύνησαν  αὐτῷ  καὶ  ἀνοίξαντες  τοὺς  θησαυροὺς  αὐτῶν  προσήνεγκαν  αὐτῷ  δῶρα  χρυσὸν  καὶ  λίβανον  καὶ  σμύρναν.  12   καὶ  χρηματισθέντες  κατ’  ὄναρ  μὴ  ἀνακάμψαι  πρὸς  Ἡρῴδην,  δι’  ἄλλης  ὁδοῦ  ἀνεχώρησαν  εἰς  τὴν  χώραν  αὐτῶν. 


Joseph flees into Egypt with Jesus and his mother.
   13   Ἀναχωρησάντων  δὲ  αὐτῶν  ἰδοὺ  ἄγγελος  κυρίου  φαίνεται  κατ’  ὄναρ  τῷ  Ἰωσὴφ  λέγων·  ἐγερθεὶς  παράλαβε  τὸ  παιδίον  καὶ  τὴν  μητέρα  αὐτοῦ  καὶ  φεῦγε  εἰς  Αἴγυπτον  καὶ  ἴσθι  ἐκεῖ  ἕως  ἂν  εἴπω  σοι·  μέλλει  γὰρ  Ἡρῴδης  ζητεῖν  τὸ  παιδίον  τοῦ  ἀπολέσαι  αὐτό.  14   ὁ  δὲ  ἐγερθεὶς  παρέλαβεν  τὸ  παιδίον  καὶ  τὴν  μητέρα  αὐτοῦ  νυκτὸς  καὶ  ἀνεχώρησεν  εἰς  Αἴγυπτον,  15   καὶ  ἦν  ἐκεῖ  ἕως  τῆς  τελευτῆς  Ἡρῴδου·  ἵνα  πληρωθῇ  τὸ  ῥηθὲν  ὑπὸ  κυρίου  διὰ  τοῦ  προφήτου  λέγοντος· 
      ἐξ  Αἰγύπτου  ἐκάλεσα  τὸν  υἱόν  μου. 


Herod slays the children;
   16   Τότε  Ἡρῴδης  ἰδὼν  ὅτι  ἐνεπαίχθη  ὑπὸ  τῶν  μάγων  ἐθυμώθη  λίαν,  καὶ  ἀποστείλας  ἀνεῖλεν  πάντας  τοὺς  παῖδας  τοὺς  ἐν  βηθλέεμ  καὶ  ἐν  πᾶσιν  τοῖς  ὀρίοις  αὐτῆς  ἀπὸ  διετοῦς  καὶ  κατωτέρω,  κατὰ  τὸν  χρόνον  ὃν  ἠκρίβωσεν  παρὰ  τῶν  μάγων.  17   τότε  ἐπληρώθη  τὸ  ῥηθὲν  διὰ  Ἱερεμίου  τοῦ  προφήτου  λέγοντος· 
      18   φωνὴ  ἐν  Ραμὰ  ἠκούσθη 
            κλαυθμὸς  καὶ  ὀδυρμὸς  πολύς· 
         Ραχὴλ  κλαίουσα  τὰ  τέκνα  αὐτῆς, 
            καὶ  οὐκ  ἤθελεν  παρακληθῆναι, 
         ὅτι  οὐκ  εἰσιν. 
   19   τελευτήσαντος  δὲ  τοῦ  Ἡρῴδου  ἰδοὺ  ἄγγελος  κυρίου  φαίνεται  κατ’  ὄναρ  τῷ  Ἰωσὴφ  ἐν  Αἰγύπτῳ 


himself dies.
20   λέγων  ἐγερθεὶς  παραλάβε  τὸ  παιδίον  καὶ  τὴν  μητέρα  αὐτοῦ  καὶ  πορεύου  εἰς  γῆν  Ἰσραήλ·  τεθνήκασιν  γὰρ  οἱ  ζητοῦντες  τὴν  ψυχὴν  τοῦ  παιδίου.  21   ὁ  δὲ  ἐγερθεὶς  παρέλαβεν  τὸ  παιδίον  καὶ  τὴν  μητέρα  αὐτοῦ  καὶ  εἰσῆλθεν  εἰς  γῆν  Ἰσραήλ.  22   Ἀκούσας  δὲ  ὅτι  Ἀρχέλαος  βασιλεύει  τῆς  Ἰουδαίας  ἀντὶ  τοῦ  πατρὸς  αὐτοῦ  Ἡρῴδου  ἐφοβήθη  ἐκεῖ  ἀπελθεῖν·  χρηματισθεὶς  δὲ  κατ’  ὅναρ  ἀνεχώρησεν  εἰς  τὰ  μέρη  τῆς  Γαλιλαίας, 


Jesus is brought back again into Galilee to Nazareth.
23   καὶ  ἐλθὼν  κατῴκησεν  εἰς  πόλιν  λεγομένην  Ναζαρέτ·  ὅπως  πληρωθῇ  τὸ  ῥηθὲν  διὰ  τῶν  προφητῶν  ὅτι  Ναζωραῖος  κληθήσεται. 
<< Matthew 2 >>
Biblos Greek and Hebrew Study Bible © 2010 Biblos.com
Online Parallel Bible