<< Isaiah 43 HEB >>


The Lord comforts the church with his promises.
1   וְעַתָּ֞ה  כֹּֽה־  אָמַ֤ר  יְהוָה֙  בֹּרַאֲךָ֣  יַעֲקֹ֔ב  וְיֹצֶרְךָ֖  יִשְׂרָאֵ֑ל  אַל־  תִּירָא֙  כִּ֣י  גְאַלְתִּ֔יךָ  קָרָ֥אתִי  בְשִׁמְךָ֖  לִי־  אָֽתָּה׃  2   כִּֽי־  תַעֲבֹ֤ר  בַּמַּ֙יִם֙  אִתְּךָ־  אָ֔נִי  וּבַנְּהָרֹ֖ות  לֹ֣א  יִשְׁטְפ֑וּךָ  כִּֽי־  תֵלֵ֤ךְ  בְּמֹו־  אֵשׁ֙  לֹ֣א  תִכָּוֶ֔ה  וְלֶהָבָ֖ה  לֹ֥א  תִבְעַר־  בָּֽךְ׃  3   כִּ֗י  אֲנִי֙  יְהוָ֣ה  אֱלֹהֶ֔יךָ  קְדֹ֥ושׁ  יִשְׂרָאֵ֖ל  מֹושִׁיעֶ֑ךָ  נָתַ֤תִּי  כָפְרְךָ֙  מִצְרַ֔יִם  כּ֥וּשׁ  וּסְבָ֖א  תַּחְתֶּֽיךָ׃  4   מֵאֲשֶׁ֨ר  יָקַ֧רְתָּ  בְעֵינַ֛י  נִכְבַּ֖דְתָּ  וַאֲנִ֣י  אֲהַבְתִּ֑יךָ  וְאֶתֵּ֤ן  אָדָם֙  תַּחְתֶּ֔יךָ  וּלְאֻמִּ֖ים  תַּ֥חַת  נַפְשֶֽׁךָ׃  5   אַל־  תִּירָ֖א  כִּ֣י  אִתְּךָ־  אָ֑נִי  מִמִּזְרָח֙  אָבִ֣יא  זַרְעֶ֔ךָ  וּמִֽמַּעֲרָ֖ב  אֲקַבְּצֶֽךָּ׃  6   אֹמַ֤ר  לַצָּפֹון֙  תֵּ֔נִי  וּלְתֵימָ֖ן  אַל־  תִּכְלָ֑אִי  הָבִ֤יאִי  בָנַי֙  מֵרָחֹ֔וק  וּבְנֹותַ֖י  מִקְצֵ֥ה  הָאָֽרֶץ׃  7   כֹּ֚ל  הַנִּקְרָ֣א  בִשְׁמִ֔י  וְלִכְבֹודִ֖י  בְּרָאתִ֑יו  יְצַרְתִּ֖יו  אַף־  עֲשִׂיתִֽיו׃ 


He appeals to the people for witness of his omnipotence
8   הֹוצִ֥יא  עַם־  עִוֵּ֖ר  וְעֵינַ֣יִם  יֵ֑שׁ  וְחֵרְשִׁ֖ים  וְאָזְנַ֥יִם  לָֽמֹו׃  9   כָּֽל־  הַגֹּויִ֞ם  נִקְבְּצ֣וּ  יַחְדָּ֗ו  וְיֵאָֽסְפוּ֙  לְאֻמִּ֔ים  מִ֤י  בָהֶם֙  יַגִּ֣יד  זֹ֔את  וְרִֽאשֹׁנֹ֖ות  יַשְׁמִיעֻ֑נוּ  יִתְּנ֤וּ  עֵֽדֵיהֶם֙  וְיִצְדָּ֔קוּ  וְיִשְׁמְע֖וּ  וְיֹאמְר֥וּ  אֱמֶֽת׃  10   אַתֶּ֤ם  עֵדַי֙  נְאֻם־  יְהוָ֔ה  וְעַבְדִּ֖י  אֲשֶׁ֣ר  בָּחָ֑רְתִּי  לְמַ֣עַן  תֵּ֠דְעוּ  וְתַאֲמִ֨ינוּ  לִ֤י  וְתָבִ֙ינוּ֙  כִּֽי־  אֲנִ֣י  ה֔וּא  לְפָנַי֙  לֹא־  נֹ֣וצַר  אֵ֔ל  וְאַחֲרַ֖י  לֹ֥א  יִהְיֶֽה׃  ס  11   אָנֹכִ֥י  אָנֹכִ֖י  יְהוָ֑ה  וְאֵ֥ין  מִבַּלְעָדַ֖י  מֹושִֽׁיעַ׃  12   אָנֹכִ֞י  הִגַּ֤דְתִּי  וְהֹושַׁ֙עְתִּי֙  וְהִשְׁמַ֔עְתִּי  וְאֵ֥ין  בָּכֶ֖ם  זָ֑ר  וְאַתֶּ֥ם  עֵדַ֛י  נְאֻם־  יְהוָ֖ה  וַֽאֲנִי־  אֵֽל׃  13   גַּם־  מִיֹּום֙  אֲנִ֣י  ה֔וּא  וְאֵ֥ין  מִיָּדִ֖י  מַצִּ֑יל  אֶפְעַ֖ל  וּמִ֥י  יְשִׁיבֶֽנָּה׃  ס 


He foretells them the destruction of Babylon
14   כֹּֽה־  אָמַ֧ר  יְהוָ֛ה  גֹּאַלְכֶ֖ם  קְדֹ֣ושׁ  יִשְׂרָאֵ֑ל  לְמַעַנְכֶ֞ם  שִׁלַּ֣חְתִּי  בָבֶ֗לָה  וְהֹורַדְתִּ֤י  בָֽרִיחִים֙  כֻּלָּ֔ם  וְכַשְׂדִּ֖ים  בָּאֳנִיֹּ֥ות  רִנָּתָֽם׃  15   אֲנִ֥י  יְהוָ֖ה  קְדֹֽושְׁכֶ֑ם  בֹּורֵ֥א  יִשְׂרָאֵ֖ל  מַלְכְּכֶֽם׃  ס  16   כֹּ֚ה  אָמַ֣ר  יְהוָ֔ה  הַנֹּותֵ֥ן  בַּיָּ֖ם  דָּ֑רֶךְ  וּבְמַ֥יִם  עַזִּ֖ים  נְתִיבָֽה׃  17   הַמֹּוצִ֥יא  רֶֽכֶב־  וָס֖וּס  חַ֣יִל  וְעִזּ֑וּז  יַחְדָּ֤ו  יִשְׁכְּבוּ֙  בַּל־  יָק֔וּמוּ  דָּעֲכ֖וּ  כַּפִּשְׁתָּ֥ה  כָבֽוּ׃ 


And his wonderful deliverance of his people
18   אַֽל־  תִּזְכְּר֖וּ  רִֽאשֹׁנֹ֑ות  וְקַדְמֹנִיֹּ֖ות  אַל־  תִּתְבֹּנָֽנוּ׃  19   הִנְנִ֨י  עֹשֶׂ֤ה  חֲדָשָׁה֙  עַתָּ֣ה  תִצְמָ֔ח  הֲלֹ֖וא  תֵֽדָע֑וּהָ  אַ֣ף  אָשִׂ֤ים  בַּמִּדְבָּר֙  דֶּ֔רֶךְ  בִּֽישִׁמֹ֖ון  נְהָרֹֽות׃  20   תְּכַבְּדֵ֙נִי֙  חַיַּ֣ת  הַשָּׂדֶ֔ה  תַּנִּ֖ים  וּבְנֹ֣ות  יַֽעֲנָ֑ה  כִּֽי־  נָתַ֨תִּי  בַמִּדְבָּ֜ר  מַ֗יִם  נְהָרֹות֙  בִּֽישִׁימֹ֔ן  לְהַשְׁקֹ֖ות  עַמִּ֥י  בְחִירִֽי׃  21   עַם־  זוּ֙  יָצַ֣רְתִּי  לִ֔י  תְּהִלָּתִ֖י  יְסַפֵּֽרוּ׃  ס 


He reproves the people as inexcusable
22   וְלֹא־  אֹתִ֥י  קָרָ֖אתָ  יַֽעֲקֹ֑ב  כִּֽי־  יָגַ֥עְתָּ  בִּ֖י  יִשְׂרָאֵֽל׃  23   לֹֽא־  הֵבֵ֤יאתָ  לִּי֙  שֵׂ֣ה  עֹלֹתֶ֔יךָ  וּזְבָחֶ֖יךָ  לֹ֣א  כִבַּדְתָּ֑נִי  לֹ֤א  הֶעֱבַדְתִּ֙יךָ֙  בְּמִנְחָ֔ה  וְלֹ֥א  הֹוגַעְתִּ֖יךָ  בִּלְבֹונָֽה׃  24   לֹא־  קָנִ֨יתָ  לִּ֤י  בַכֶּ֙סֶף֙  קָנֶ֔ה  וְחֵ֥לֶב  זְבָחֶ֖יךָ  לֹ֣א  הִרְוִיתָ֑נִי  אַ֗ךְ  הֶעֱבַדְתַּ֙נִי֙  בְּחַטֹּאותֶ֔יךָ  הֹוגַעְתַּ֖נִי  בַּעֲוֹנֹתֶֽיךָ׃  ס  25   אָנֹכִ֨י  אָנֹכִ֥י  ה֛וּא  מֹחֶ֥ה  פְשָׁעֶ֖יךָ  לְמַעֲנִ֑י  וְחַטֹּאתֶ֖יךָ  לֹ֥א  אֶזְכֹּֽר׃  26   הַזְכִּירֵ֕נִי  נִשָּׁפְטָ֖ה  יָ֑חַד  סַפֵּ֥ר  אַתָּ֖ה  לְמַ֥עַן  תִּצְדָּֽק׃  27   אָבִ֥יךָ  הָרִאשֹׁ֖ון  חָטָ֑א  וּמְלִיצֶ֖יךָ  פָּ֥שְׁעוּ  בִֽי׃  28   וַאֲחַלֵּ֖ל  שָׂ֣רֵי  קֹ֑דֶשׁ  וְאֶתְּנָ֤ה  לַחֵ֙רֶם֙  יַעֲקֹ֔ב  וְיִשְׂרָאֵ֖ל  לְגִדּוּפִֽים׃  ס 
<< Isaiah 43 >>
Biblos Greek and Hebrew Study Bible © 2010 Biblos.com
Online Parallel Bible