<< Isaiah 42 HEB >>


The office of Christ, graced with meekness and constancy.
1   הֵ֤ן  עַבְדִּי֙  אֶתְמָךְ־  בֹּ֔ו  בְּחִירִ֖י  רָצְתָ֣ה  נַפְשִׁ֑י  נָתַ֤תִּי  רוּחִי֙  עָלָ֔יו  מִשְׁפָּ֖ט  לַגֹּויִ֥ם  יֹוצִֽיא׃  2   לֹ֥א  יִצְעַ֖ק  וְלֹ֣א  יִשָּׂ֑א  וְלֹֽא־  יַשְׁמִ֥יעַ  בַּח֖וּץ  קֹולֹֽו׃  3   קָנֶ֤ה  רָצוּץ֙  לֹ֣א  יִשְׁבֹּ֔ור  וּפִשְׁתָּ֥ה  כֵהָ֖ה  לֹ֣א  יְכַבֶּ֑נָּה  לֶאֱמֶ֖ת  יֹוצִ֥יא  מִשְׁפָּֽט׃  4   לֹ֤א  יִכְהֶה֙  וְלֹ֣א  יָר֔וּץ  עַד־  יָשִׂ֥ים  בָּאָ֖רֶץ  מִשְׁפָּ֑ט  וּלְתֹורָתֹ֖ו  אִיִּ֥ים  יְיַחֵֽילוּ׃  פ 


God's promise unto him.
5   כֹּֽה־  אָמַ֞ר  הָאֵ֣ל  יְהוָ֗ה  בֹּורֵ֤א  הַשָּׁמַ֙יִם֙  וְנֹ֣וטֵיהֶ֔ם  רֹקַ֥ע  הָאָ֖רֶץ  וְצֶאֱצָאֶ֑יהָ  נֹתֵ֤ן  נְשָׁמָה֙  לָעָ֣ם  עָלֶ֔יהָ  וְר֖וּחַ  לַהֹלְכִ֥ים  בָּֽהּ׃  6   אֲנִ֧י  יְהוָ֛ה  קְרָאתִ֥יךָֽ  בְצֶ֖דֶק  וְאַחְזֵ֣ק  בְּיָדֶ֑ךָ  וְאֶצָּרְךָ֗  וְאֶתֶּנְךָ֛  לִבְרִ֥ית  עָ֖ם  לְאֹ֥ור  גֹּויִֽם׃  7   לִפְקֹ֖חַ  עֵינַ֣יִם  עִוְרֹ֑ות  לְהֹוצִ֤יא  מִמַּסְגֵּר֙  אַסִּ֔יר  מִבֵּ֥ית  כֶּ֖לֶא  יֹ֥שְׁבֵי  חֹֽשֶׁךְ׃  8   אֲנִ֥י  יְהוָ֖ה  ה֣וּא  שְׁמִ֑י  וּכְבֹודִי֙  לְאַחֵ֣ר  לֹֽא־  אֶתֵּ֔ן  וּתְהִלָּתִ֖י  לַפְּסִילִֽים׃  9   הָרִֽאשֹׁנֹ֖ות  הִנֵּה־  בָ֑אוּ  וַֽחֲדָשֹׁות֙  אֲנִ֣י  מַגִּ֔יד  בְּטֶ֥רֶם  תִּצְמַ֖חְנָה  אַשְׁמִ֥יע  אֶתְכֶֽם׃  פ 


An exhortation to praise God for his Gospel
10   שִׁ֤ירוּ  לַֽיהוָה֙  שִׁ֣יר  חָדָ֔שׁ  תְּהִלָּתֹ֖ו  מִקְצֵ֣ה  הָאָ֑רֶץ  יֹורְדֵ֤י  הַיָּם֙  וּמְלֹאֹ֔ו  אִיִּ֖ים  וְיֹשְׁבֵיהֶֽם׃  11   יִשְׂא֤וּ  מִדְבָּר֙  וְעָרָ֔יו  חֲצֵרִ֖ים  תֵּשֵׁ֣ב  קֵדָ֑ר  יָרֹ֙נּוּ֙  יֹ֣שְׁבֵי  סֶ֔לַע  מֵרֹ֥אשׁ  הָרִ֖ים  יִצְוָֽחוּ׃  12   יָשִׂ֥ימוּ  לַֽיהוָ֖ה  כָּבֹ֑וד  וּתְהִלָּתֹ֖ו  בָּאִיִּ֥ים  יַגִּֽידוּ׃ 


God will manifest himself, and check idolatry
13   יְהוָה֙  כַּגִּבֹּ֣ור  יֵצֵ֔א  כְּאִ֥ישׁ  מִלְחָמֹ֖ות  יָעִ֣יר  קִנְאָ֑ה  יָרִ֙יעַ֙  אַף־  יַצְרִ֔יחַ  עַל־  אֹיְבָ֖יו  יִתְגַּבָּֽר׃  ס  14   הֶחֱשֵׁ֙יתִי֙  מֵֽעֹולָ֔ם  אַחֲרִ֖ישׁ  אֶתְאַפָּ֑ק  כַּיֹּולֵדָ֣ה  אֶפְעֶ֔ה  אֶשֹּׁ֥ם  וְאֶשְׁאַ֖ף  יָֽחַד׃  15   אַחֲרִ֤יב  הָרִים֙  וּגְבָעֹ֔ות  וְכָל־  עֶשְׂבָּ֖ם  אֹובִ֑ישׁ  וְשַׂמְתִּ֤י  נְהָרֹות֙  לָֽאִיִּ֔ים  וַאֲגַמִּ֖ים  אֹובִֽישׁ׃  16   וְהֹולַכְתִּ֣י  עִוְרִ֗ים  בְּדֶ֙רֶךְ֙  לֹ֣א  יָדָ֔עוּ  בִּנְתִיבֹ֥ות  לֹֽא־  יָדְע֖וּ  אַדְרִיכֵ֑ם  אָשִׂים֩  מַחְשָׁ֨ךְ  לִפְנֵיהֶ֜ם  לָאֹ֗ור  וּמַֽעֲקַשִּׁים֙  לְמִישֹׁ֔ור  אֵ֚לֶּה  הַדְּבָרִ֔ים  עֲשִׂיתִ֖ם  וְלֹ֥א  עֲזַבְתִּֽים׃  17   נָסֹ֤גוּ  אָחֹור֙  יֵבֹ֣שׁוּ  בֹ֔שֶׁת  הַבֹּטְחִ֖ים  בַּפָּ֑סֶל  הָאֹמְרִ֥ים  לְמַסֵּכָ֖ה  אַתֶּ֥ם  אֱלֹהֵֽינוּ׃  ס 


He reproves the people of incredulity.
18   הַחֵרְשִׁ֖ים  שְׁמָ֑עוּ  וְהַעִוְרִ֖ים  הַבִּ֥יטוּ  לִרְאֹֽות׃  19   מִ֤י  עִוֵּר֙  כִּ֣י  אִם־  עַבְדִּ֔י  וְחֵרֵ֖שׁ  כְּמַלְאָכִ֣י  אֶשְׁלָ֑ח  מִ֤י  עִוֵּר֙  כִּמְשֻׁלָּ֔ם  וְעִוֵּ֖ר  כְּעֶ֥בֶד  יְהוָֽה׃  20   [רָאִיתָ  כ]  (רָאֹ֥ות  ק)  רַבֹּ֖ות  וְלֹ֣א  תִשְׁמֹ֑ר  פָּקֹ֥וחַ  אָזְנַ֖יִם  וְלֹ֥א  יִשְׁמָֽע׃  21   יְהוָ֥ה  חָפֵ֖ץ  לְמַ֣עַן  צִדְקֹ֑ו  יַגְדִּ֥יל  תֹּורָ֖ה  וְיַאְדִּֽיר׃  22   וְהוּא֮  עַם־  בָּז֣וּז  וְשָׁסוּי֒  הָפֵ֤חַ  בַּֽחוּרִים֙  כֻּלָּ֔ם  וּבְבָתֵּ֥י  כְלָאִ֖ים  הָחְבָּ֑אוּ  הָי֤וּ  לָבַז֙  וְאֵ֣ין  מַצִּ֔יל  מְשִׁסָּ֖ה  וְאֵין־  אֹמֵ֥ר  הָשַֽׁב׃  23   מִ֥י  בָכֶ֖ם  יַאֲזִ֣ין  זֹ֑את  יַקְשִׁ֥ב  וְיִשְׁמַ֖ע  לְאָחֹֽור׃  24   מִֽי־  נָתַ֨ן  [לִמְשֹׁוסֶה  כ]  (לִמְשִׁסָּ֧ה  ק)  יַעֲקֹ֛ב  וְיִשְׂרָאֵ֥ל  לְבֹזְזִ֖ים  הֲלֹ֣וא  יְהוָ֑ה  ז֚וּ  חָטָ֣אנוּ  לֹ֔ו  וְלֹֽא־  אָב֤וּ  בִדְרָכָיו֙  הָלֹ֔וךְ  וְלֹ֥א  שָׁמְע֖וּ  בְּתֹורָתֹֽו׃  25   וַיִּשְׁפֹּ֤ךְ  עָלָיו֙  חֵמָ֣ה  אַפֹּ֔ו  וֶעֱז֖וּז  מִלְחָמָ֑ה  וַתְּלַהֲטֵ֤הוּ  מִסָּבִיב֙  וְלֹ֣א  יָדָ֔ע  וַתִּבְעַר־  בֹּ֖ו  וְלֹא־  יָשִׂ֥ים  עַל־  לֵֽב׃  פ 
<< Isaiah 42 >>
Biblos Greek and Hebrew Study Bible © 2010 Biblos.com
Online Parallel Bible