<< Genesis 22 HEB >>


Abraham is tested with the command to offer Isaac.
1   וַיְהִ֗י  אַחַר֙  הַדְּבָרִ֣ים  הָאֵ֔לֶּה  וְהָ֣אֱלֹהִ֔ים  נִסָּ֖ה  אֶת־  אַבְרָהָ֑ם  וַיֹּ֣אמֶר  אֵלָ֔יו  אַבְרָהָ֖ם  וַיֹּ֥אמֶר  הִנֵּֽנִי׃  2   וַיֹּ֡אמֶר  קַח־  נָ֠א  אֶת־  בִּנְךָ֙  אֶת־  יְחִֽידְךָ֤  אֲשֶׁר־  אָהַ֙בְתָּ֙  אֶת־  יִצְחָ֔ק  וְלֶךְ־  לְךָ֔  אֶל־  אֶ֖רֶץ  הַמֹּרִיָּ֑ה  וְהַעֲלֵ֤הוּ  שָׁם֙  לְעֹלָ֔ה  עַ֚ל  אַחַ֣ד  הֶֽהָרִ֔ים  אֲשֶׁ֖ר  אֹמַ֥ר  אֵלֶֽיךָ׃ 


He gives proof of his faith and obedience.
3   וַיַּשְׁכֵּ֨ם  אַבְרָהָ֜ם  בַּבֹּ֗קֶר  וַֽיַּחֲבֹשׁ֙  אֶת־  חֲמֹרֹ֔ו  וַיִּקַּ֞ח  אֶת־  שְׁנֵ֤י  נְעָרָיו֙  אִתֹּ֔ו  וְאֵ֖ת  יִצְחָ֣ק  בְּנֹ֑ו  וַיְבַקַּע֙  עֲצֵ֣י  עֹלָ֔ה  וַיָּ֣קָם  וַיֵּ֔לֶךְ  אֶל־  הַמָּקֹ֖ום  אֲשֶׁר־  אָֽמַר־  לֹ֥ו  הָאֱלֹהִֽים׃  4   בַּיֹּ֣ום  הַשְּׁלִישִׁ֗י  וַיִּשָּׂ֨א  אַבְרָהָ֧ם  אֶת־  עֵינָ֛יו  וַיַּ֥רְא  אֶת־  הַמָּקֹ֖ום  מֵרָחֹֽק׃  5   וַיֹּ֨אמֶר  אַבְרָהָ֜ם  אֶל־  נְעָרָ֗יו  שְׁבוּ־  לָכֶ֥ם  פֹּה֙  עִֽם־  הַחֲמֹ֔ור  וַאֲנִ֣י  וְהַנַּ֔עַר  נֵלְכָ֖ה  עַד־  כֹּ֑ה  וְנִֽשְׁתַּחֲוֶ֖ה  וְנָשׁ֥וּבָה  אֲלֵיכֶֽם׃  6   וַיִּקַּ֨ח  אַבְרָהָ֜ם  אֶת־  עֲצֵ֣י  הָעֹלָ֗ה  וַיָּ֙שֶׂם֙  עַל־  יִצְחָ֣ק  בְּנֹ֔ו  וַיִּקַּ֣ח  בְּיָדֹ֔ו  אֶת־  הָאֵ֖שׁ  וְאֶת־  הַֽמַּאֲכֶ֑לֶת  וַיֵּלְכ֥וּ  שְׁנֵיהֶ֖ם  יַחְדָּֽו׃  7   וַיֹּ֨אמֶר  יִצְחָ֜ק  אֶל־  אַבְרָהָ֤ם  אָבִיו֙  וַיֹּ֣אמֶר  אָבִ֔י  וַיֹּ֖אמֶר  הִנֶּ֣נִּֽי  בְנִ֑י  וַיֹּ֗אמֶר  הִנֵּ֤ה  הָאֵשׁ֙  וְהָ֣עֵצִ֔ים  וְאַיֵּ֥ה  הַשֶּׂ֖ה  לְעֹלָֽה׃  8   וַיֹּ֙אמֶר֙  אַבְרָהָ֔ם  אֱלֹהִ֞ים  יִרְאֶה־  לֹּ֥ו  הַשֶּׂ֛ה  לְעֹלָ֖ה  בְּנִ֑י  וַיֵּלְכ֥וּ  שְׁנֵיהֶ֖ם  יַחְדָּֽו׃  9   וַיָּבֹ֗אוּ  אֶֽל־  הַמָּקֹום֮  אֲשֶׁ֣ר  אָֽמַר־  לֹ֣ו  הָאֱלֹהִים֒  וַיִּ֨בֶן  שָׁ֤ם  אַבְרָהָם֙  אֶת־  הַמִּזְבֵּ֔חַ  וַֽיַּעֲרֹ֖ךְ  אֶת־  הָעֵצִ֑ים  וַֽיַּעֲקֹד֙  אֶת־  יִצְחָ֣ק  בְּנֹ֔ו  וַיָּ֤שֶׂם  אֹתֹו֙  עַל־  הַמִּזְבֵּ֔חַ  מִמַּ֖עַל  לָעֵצִֽים׃  10   וַיִּשְׁלַ֤ח  אַבְרָהָם֙  אֶת־  יָדֹ֔ו  וַיִּקַּ֖ח  אֶת־  הַֽמַּאֲכֶ֑לֶת  לִשְׁחֹ֖ט  אֶת־  בְּנֹֽו׃ 


The angel prevents him.
11   וַיִּקְרָ֨א  אֵלָ֜יו  מַלְאַ֤ךְ  יְהוָה֙  מִן־  הַשָּׁמַ֔יִם  וַיֹּ֖אמֶר  אַבְרָהָ֣ם  אַבְרָהָ֑ם  וַיֹּ֖אמֶר  הִנֵּֽנִי׃  12   וַיֹּ֗אמֶר  אַל־  תִּשְׁלַ֤ח  יָֽדְךָ֙  אֶל־  הַנַּ֔עַר  וְאַל־  תַּ֥עַשׂ  לֹ֖ו  מְא֑וּמָּה  כִּ֣י  עַתָּ֣ה  יָדַ֗עְתִּי  כִּֽי־  יְרֵ֤א  אֱלֹהִים֙  אַ֔תָּה  וְלֹ֥א  חָשַׂ֛כְתָּ  אֶת־  בִּנְךָ֥  אֶת־  יְחִידְךָ֖  מִמֶּֽנִּי׃ 


Isaac is exchanged for a ram.
13   וַיִּשָּׂ֨א  אַבְרָהָ֜ם  אֶת־  עֵינָ֗יו  וַיַּרְא֙  וְהִנֵּה־  אַ֔יִל  אַחַ֕ר  נֶאֱחַ֥ז  בַּסְּבַ֖ךְ  בְּקַרְנָ֑יו  וַיֵּ֤לֶךְ  אַבְרָהָם֙  וַיִּקַּ֣ח  אֶת־  הָאַ֔יִל  וַיַּעֲלֵ֥הוּ  לְעֹלָ֖ה  תַּ֥חַת  בְּנֹֽו׃ 


The place is called Jehovah-jireh.
14   וַיִּקְרָ֧א  אַבְרָהָ֛ם  שֵֽׁם־  הַמָּקֹ֥ום  הַה֖וּא  יְהוָ֣ה  יִרְאֶ֑ה  אֲשֶׁר֙  יֵאָמֵ֣ר  הַיֹּ֔ום  בְּהַ֥ר  יְהוָ֖ה  יֵרָאֶֽה׃ 


Abraham is again blessed.
15   וַיִּקְרָ֛א  מַלְאַ֥ךְ  יְהוָ֖ה  אֶל־  אַבְרָהָ֑ם  שֵׁנִ֖ית  מִן־  הַשָּׁמָֽיִם׃  16   וַיֹּ֕אמֶר  בִּ֥י  נִשְׁבַּ֖עְתִּי  נְאֻם־  יְהוָ֑ה  כִּ֗י  יַ֚עַן  אֲשֶׁ֤ר  עָשִׂ֙יתָ֙  אֶת־  הַדָּבָ֣ר  הַזֶּ֔ה  וְלֹ֥א  חָשַׂ֖כְתָּ  אֶת־  בִּנְךָ֥  אֶת־  יְחִידֶֽךָ׃  17   כִּֽי־  בָרֵ֣ךְ  אֲבָרֶכְךָ֗  וְהַרְבָּ֨ה  אַרְבֶּ֤ה  אֶֽת־  זַרְעֲךָ֙  כְּכֹוכְבֵ֣י  הַשָּׁמַ֔יִם  וְכַחֹ֕ול  אֲשֶׁ֖ר  עַל־  שְׂפַ֣ת  הַיָּ֑ם  וְיִרַ֣שׁ  זַרְעֲךָ֔  אֵ֖ת  שַׁ֥עַר  אֹיְבָֽיו׃  18   וְהִתְבָּרֲכ֣וּ  בְזַרְעֲךָ֔  כֹּ֖ל  גֹּויֵ֣י  הָאָ֑רֶץ  עֵ֕קֶב  אֲשֶׁ֥ר  שָׁמַ֖עְתָּ  בְּקֹלִֽי׃  19   וַיָּ֤שָׁב  אַבְרָהָם֙  אֶל־  נְעָרָ֔יו  וַיָּקֻ֛מוּ  וַיֵּלְכ֥וּ  יַחְדָּ֖ו  אֶל־  בְּאֵ֣ר  שָׁ֑בַע  וַיֵּ֥שֶׁב  אַבְרָהָ֖ם  בִּבְאֵ֥ר  שָֽׁבַע׃  פ 


The generations of Nahor unto Rebekah.
20   וַיְהִ֗י  אַחֲרֵי֙  הַדְּבָרִ֣ים  הָאֵ֔לֶּה  וַיֻּגַּ֥ד  לְאַבְרָהָ֖ם  לֵאמֹ֑ר  הִ֠נֵּה  יָלְדָ֨ה  מִלְכָּ֥ה  גַם־  הִ֛וא  בָּנִ֖ים  לְנָחֹ֥ור  אָחִֽיךָ׃  21   אֶת־  ע֥וּץ  בְּכֹרֹ֖ו  וְאֶת־  בּ֣וּז  אָחִ֑יו  וְאֶת־  קְמוּאֵ֖ל  אֲבִ֥י  אֲרָֽם׃  22   וְאֶת־  כֶּ֣שֶׂד  וְאֶת־  חֲזֹ֔ו  וְאֶת־  פִּלְדָּ֖שׁ  וְאֶת־  יִדְלָ֑ף  וְאֵ֖ת  בְּתוּאֵֽל׃  23   וּבְתוּאֵ֖ל  יָלַ֣ד  אֶת־  רִבְקָ֑ה  שְׁמֹנָ֥ה  אֵ֙לֶּה֙  יָלְדָ֣ה  מִלְכָּ֔ה  לְנָחֹ֖ור  אֲחִ֥י  אַבְרָהָֽם׃  24   וּפִֽילַגְשֹׁ֖ו  וּשְׁמָ֣הּ  רְאוּמָ֑ה  וַתֵּ֤לֶד  גַּם־  הִוא֙  אֶת־  טֶ֣בַח  וְאֶת־  גַּ֔חַם  וְאֶת־  תַּ֖חַשׁ  וְאֶֽת־  מַעֲכָֽה׃  ס 
<< Genesis 22 >>
Biblos Greek and Hebrew Study Bible © 2010 Biblos.com
Online Parallel Bible