<< Genesis 21 HEB >>


Isaac is born, and circumcised.
1   וַֽיהוָ֛ה  פָּקַ֥ד  אֶת־  שָׂרָ֖ה  כַּאֲשֶׁ֣ר  אָמָ֑ר  וַיַּ֧עַשׂ  יְהוָ֛ה  לְשָׂרָ֖ה  כַּאֲשֶׁ֥ר  דִּבֵּֽר׃  2   וַתַּהַר֩  וַתֵּ֨לֶד  שָׂרָ֧ה  לְאַבְרָהָ֛ם  בֵּ֖ן  לִזְקֻנָ֑יו  לַמֹּועֵ֕ד  אֲשֶׁר־  דִּבֶּ֥ר  אֹתֹ֖ו  אֱלֹהִֽים׃  3   וַיִּקְרָ֨א  אַבְרָהָ֜ם  אֶֽת־  שֶׁם־  בְּנֹ֧ו  הַנֹּֽולַד־  לֹ֛ו  אֲשֶׁר־  יָלְדָה־  לֹּ֥ו  שָׂרָ֖ה  יִצְחָֽק׃  4   וַיָּ֤מָל  אַבְרָהָם֙  אֶת־  יִצְחָ֣ק  בְּנֹ֔ו  בֶּן־  שְׁמֹנַ֖ת  יָמִ֑ים  כַּאֲשֶׁ֛ר  צִוָּ֥ה  אֹתֹ֖ו  אֱלֹהִֽים׃  5   וְאַבְרָהָ֖ם  בֶּן־  מְאַ֣ת  שָׁנָ֑ה  בְּהִוָּ֣לֶד  לֹ֔ו  אֵ֖ת  יִצְחָ֥ק  בְּנֹֽו׃ 


Sarah's joy.
6   וַתֹּ֣אמֶר  שָׂרָ֔ה  צְחֹ֕ק  עָ֥שָׂה  לִ֖י  אֱלֹהִ֑ים  כָּל־  הַשֹּׁמֵ֖עַ  יִֽצְחַק־  לִֽי׃  7   וַתֹּ֗אמֶר  מִ֤י  מִלֵּל֙  לְאַבְרָהָ֔ם  הֵינִ֥יקָה  בָנִ֖ים  שָׂרָ֑ה  כִּֽי־  יָלַ֥דְתִּי  בֵ֖ן  לִזְקֻנָֽיו׃ 


Isaac is weaned.
8   וַיִּגְדַּ֥ל  הַיֶּ֖לֶד  וַיִּגָּמַ֑ל  וַיַּ֤עַשׂ  אַבְרָהָם֙  מִשְׁתֶּ֣ה  גָדֹ֔ול  בְּיֹ֖ום  הִגָּמֵ֥ל  אֶת־  יִצְחָֽק׃ 


Hagar and Ishmael sent away.
9   וַתֵּ֨רֶא  שָׂרָ֜ה  אֶֽת־  בֶּן־  הָגָ֧ר  הַמִּצְרִ֛ית  אֲשֶׁר־  יָלְדָ֥ה  לְאַבְרָהָ֖ם  מְצַחֵֽק׃  10   וַתֹּ֙אמֶר֙  לְאַבְרָהָ֔ם  גָּרֵ֛שׁ  הָאָמָ֥ה  הַזֹּ֖את  וְאֶת־  בְּנָ֑הּ  כִּ֣י  לֹ֤א  יִירַשׁ֙  בֶּן־  הָאָמָ֣ה  הַזֹּ֔את  עִם־  בְּנִ֖י  עִם־  יִצְחָֽק׃  11   וַיֵּ֧רַע  הַדָּבָ֛ר  מְאֹ֖ד  בְּעֵינֵ֣י  אַבְרָהָ֑ם  עַ֖ל  אֹודֹ֥ת  בְּנֹֽו׃  12   וַיֹּ֨אמֶר  אֱלֹהִ֜ים  אֶל־  אַבְרָהָ֗ם  אַל־  יֵרַ֤ע  בְּעֵינֶ֙יךָ֙  עַל־  הַנַּ֣עַר  וְעַל־  אֲמָתֶ֔ךָ  כֹּל֩  אֲשֶׁ֨ר  תֹּאמַ֥ר  אֵלֶ֛יךָ  שָׂרָ֖ה  שְׁמַ֣ע  בְּקֹלָ֑הּ  כִּ֣י  בְיִצְחָ֔ק  יִקָּרֵ֥א  לְךָ֖  זָֽרַע׃  13   וְגַ֥ם  אֶת־  בֶּן־  הָאָמָ֖ה  לְגֹ֣וי  אֲשִׂימֶ֑נּוּ  כִּ֥י  זַרְעֲךָ֖  הֽוּא׃  14   וַיַּשְׁכֵּ֣ם  אַבְרָהָ֣ם  בַּבֹּ֡קֶר  וַיִּֽקַּֽח־  לֶחֶם֩  וְחֵ֨מַת  מַ֜יִם  וַיִּתֵּ֣ן  אֶל־  הָ֠גָר  שָׂ֧ם  עַל־  שִׁכְמָ֛הּ  וְאֶת־  הַיֶּ֖לֶד  וַֽיְשַׁלְּחֶ֑הָ  וַתֵּ֣לֶךְ  וַתֵּ֔תַע  בְּמִדְבַּ֖ר  בְּאֵ֥ר  שָֽׁבַע׃ 


Hagar in distress.
15   וַיִּכְל֥וּ  הַמַּ֖יִם  מִן־  הַחֵ֑מֶת  וַתַּשְׁלֵ֣ךְ  אֶת־  הַיֶּ֔לֶד  תַּ֖חַת  אַחַ֥ד  הַשִּׂיחִֽם׃  16   וַתֵּלֶךְ֩  וַתֵּ֨שֶׁב  לָ֜הּ  מִנֶּ֗גֶד  הַרְחֵק֙  כִּמְטַחֲוֵ֣י  קֶ֔שֶׁת  כִּ֣י  אָֽמְרָ֔ה  אַל־  אֶרְאֶ֖ה  בְּמֹ֣ות  הַיָּ֑לֶד  וַתֵּ֣שֶׁב  מִנֶּ֔גֶד  וַתִּשָּׂ֥א  אֶת־  קֹלָ֖הּ  וַתֵּֽבְךְּ׃ 


The angel relieves and comforts her.
17   וַיִּשְׁמַ֣ע  אֱלֹהִים֮  אֶת־  קֹ֣ול  הַנַּעַר֒  וַיִּקְרָא֩  מַלְאַ֨ךְ  אֱלֹהִ֤ים  אֶל־  הָגָר֙  מִן־  הַשָּׁמַ֔יִם  וַיֹּ֥אמֶר  לָ֖הּ  מַה־  לָּ֣ךְ  הָגָ֑ר  אַל־  תִּ֣ירְאִ֔י  כִּֽי־  שָׁמַ֧ע  אֱלֹהִ֛ים  אֶל־  קֹ֥ול  הַנַּ֖עַר  בַּאֲשֶׁ֥ר  הוּא־  שָֽׁם׃  18   ק֚וּמִי  שְׂאִ֣י  אֶת־  הַנַּ֔עַר  וְהַחֲזִ֥יקִי  אֶת־  יָדֵ֖ךְ  בֹּ֑ו  כִּֽי־  לְגֹ֥וי  גָּדֹ֖ול  אֲשִׂימֶֽנּוּ׃  19   וַיִּפְקַ֤ח  אֱלֹהִים֙  אֶת־  עֵינֶ֔יהָ  וַתֵּ֖רֶא  בְּאֵ֣ר  מָ֑יִם  וַתֵּ֜לֶךְ  וַתְּמַלֵּ֤א  אֶת־  הַחֵ֙מֶת֙  מַ֔יִם  וַתַּ֖שְׁקְ  אֶת־  הַנָּֽעַר׃  20   וַיְהִ֧י  אֱלֹהִ֛ים  אֶת־  הַנַּ֖עַר  וַיִּגְדָּ֑ל  וַיֵּ֙שֶׁב֙  בַּמִּדְבָּ֔ר  וַיְהִ֖י  רֹבֶ֥ה  קַשָּֽׁת׃  21   וַיֵּ֖שֶׁב  בְּמִדְבַּ֣ר  פָּארָ֑ן  וַתִּֽקַּֽח־  לֹ֥ו  אִמֹּ֛ו  אִשָּׁ֖ה  מֵאֶ֥רֶץ  מִצְרָֽיִם׃  פ  22   וַֽיְהִי֙  בָּעֵ֣ת  הַהִ֔וא  וַיֹּ֣אמֶר  אֲבִימֶ֗לֶךְ  וּפִיכֹל֙  שַׂר־  צְבָאֹ֔ו  אֶל־  אַבְרָהָ֖ם  לֵאמֹ֑ר  אֱלֹהִ֣ים  עִמְּךָ֔  בְּכֹ֥ל  אֲשֶׁר־  אַתָּ֖ה  עֹשֶֽׂה׃ 


Abimelech's covenant with Abraham at Beersheba.
23   וְעַתָּ֗ה  הִשָּׁ֨בְעָה  לִּ֤י  בֵֽאלֹהִים֙  הֵ֔נָּה  אִם־  תִּשְׁקֹ֣ר  לִ֔י  וּלְנִינִ֖י  וּלְנֶכְדִּ֑י  כַּחֶ֜סֶד  אֲשֶׁר־  עָשִׂ֤יתִי  עִמְּךָ֙  תַּעֲשֶׂ֣ה  עִמָּדִ֔י  וְעִם־  הָאָ֖רֶץ  אֲשֶׁר־  גַּ֥רְתָּה  בָּֽהּ׃  24   וַיֹּ֙אמֶר֙  אַבְרָהָ֔ם  אָנֹכִ֖י  אִשָּׁבֵֽעַ׃  25   וְהֹוכִ֥חַ  אַבְרָהָ֖ם  אֶת־  אֲבִימֶ֑לֶךְ  עַל־  אֹדֹות֙  בְּאֵ֣ר  הַמַּ֔יִם  אֲשֶׁ֥ר  גָּזְל֖וּ  עַבְדֵ֥י  אֲבִימֶֽלֶךְ׃  26   וַיֹּ֣אמֶר  אֲבִימֶ֔לֶךְ  לֹ֣א  יָדַ֔עְתִּי  מִ֥י  עָשָׂ֖ה  אֶת־  הַדָּבָ֣ר  הַזֶּ֑ה  וְגַם־  אַתָּ֞ה  לֹא־  הִגַּ֣דְתָּ  לִּ֗י  וְגַ֧ם  אָנֹכִ֛י  לֹ֥א  שָׁמַ֖עְתִּי  בִּלְתִּ֥י  הַיֹּֽום׃  27   וַיִּקַּ֤ח  אַבְרָהָם֙  צֹ֣אן  וּבָקָ֔ר  וַיִּתֵּ֖ן  לַאֲבִימֶ֑לֶךְ  וַיִּכְרְת֥וּ  שְׁנֵיהֶ֖ם  בְּרִֽית׃  28   וַיַּצֵּ֣ב  אַבְרָהָ֗ם  אֶת־  שֶׁ֛בַע  כִּבְשֹׂ֥ת  הַצֹּ֖אן  לְבַדְּהֶֽן׃  29   וַיֹּ֥אמֶר  אֲבִימֶ֖לֶךְ  אֶל־  אַבְרָהָ֑ם  מָ֣ה  הֵ֗נָּה  שֶׁ֤בַע  כְּבָשֹׂת֙  הָאֵ֔לֶּה  אֲשֶׁ֥ר  הִצַּ֖בְתָּ  לְבַדָּֽנָה׃  30   וַיֹּ֕אמֶר  כִּ֚י  אֶת־  שֶׁ֣בַע  כְּבָשֹׂ֔ת  תִּקַּ֖ח  מִיָּדִ֑י  בַּעֲבוּר֙  תִּֽהְיֶה־  לִּ֣י  לְעֵדָ֔ה  כִּ֥י  חָפַ֖רְתִּי  אֶת־  הַבְּאֵ֥ר  הַזֹּֽאת׃  31   עַל־  כֵּ֗ן  קָרָ֛א  לַמָּקֹ֥ום  הַה֖וּא  בְּאֵ֣ר  שָׁ֑בַע  כִּ֛י  שָׁ֥ם  נִשְׁבְּע֖וּ  שְׁנֵיהֶֽם׃  32   וַיִּכְרְת֥וּ  בְרִ֖ית  בִּבְאֵ֣ר  שָׁ֑בַע  וַיָּ֣קָם  אֲבִימֶ֗לֶךְ  וּפִיכֹל֙  שַׂר־  צְבָאֹ֔ו  וַיָּשֻׁ֖בוּ  אֶל־  אֶ֥רֶץ  פְּלִשְׁתִּֽים׃  33   וַיִּטַּ֥ע  אֶ֖שֶׁל  בִּבְאֵ֣ר  שָׁ֑בַע  וַיִּ֨קְרָא־  שָׁ֔ם  בְּשֵׁ֥ם  יְהוָ֖ה  אֵ֥ל  עֹולָֽם׃  34   וַיָּ֧גָר  אַבְרָהָ֛ם  בְּאֶ֥רֶץ  פְּלִשְׁתִּ֖ים  יָמִ֥ים  רַבִּֽים׃  פ 
<< Genesis 21 >>
Biblos Greek and Hebrew Study Bible © 2010 Biblos.com
Online Parallel Bible