<< Exodus 23 HEB >>


Of slander, false witness, and partiality
1   לֹ֥א  תִשָּׂ֖א  שֵׁ֣מַע  שָׁ֑וְא  אַל־  תָּ֤שֶׁת  יָֽדְךָ֙  עִם־  רָשָׁ֔ע  לִהְיֹ֖ת  עֵ֥ד  חָמָֽס׃  ס  2   לֹֽא־  תִהְיֶ֥ה  אַחֲרֵֽי־  רַבִּ֖ים  לְרָעֹ֑ת  וְלֹא־  תַעֲנֶ֣ה  עַל־  רִ֗ב  לִנְטֹ֛ת  אַחֲרֵ֥י  רַבִּ֖ים  לְהַטֹּֽת׃  3   וְדָ֕ל  לֹ֥א  תֶהְדַּ֖ר  בְּרִיבֹֽו׃  ס 


Of charitableness
4   כִּ֣י  תִפְגַּ֞ע  שֹׁ֧ור  אֹֽיִבְךָ֛  אֹ֥ו  חֲמֹרֹ֖ו  תֹּעֶ֑ה  הָשֵׁ֥ב  תְּשִׁיבֶ֖נּוּ  לֹֽו׃  ס  5   כִּֽי־  תִרְאֶ֞ה  חֲמֹ֣ור  שֹׂנַאֲךָ֗  רֹבֵץ֙  תַּ֣חַת  מַשָּׂאֹ֔ו  וְחָדַלְתָּ֖  מֵעֲזֹ֣ב  לֹ֑ו  עָזֹ֥ב  תַּעֲזֹ֖ב  עִמֹּֽו׃  ס 


Of justice in judgment
6   לֹ֥א  תַטֶּ֛ה  מִשְׁפַּ֥ט  אֶבְיֹנְךָ֖  בְּרִיבֹֽו׃  7   מִדְּבַר־  שֶׁ֖קֶר  תִּרְחָ֑ק  וְנָקִ֤י  וְצַדִּיק֙  אַֽל־  תַּהֲרֹ֔ג  כִּ֥י  לֹא־  אַצְדִּ֖יק  רָשָֽׁע׃ 


Of taking bribes
8   וְשֹׁ֖חַד  לֹ֣א  תִקָּ֑ח  כִּ֤י  הַשֹּׁ֙חַד֙  יְעַוֵּ֣ר  פִּקְחִ֔ים  וִֽיסַלֵּ֖ף  דִּבְרֵ֥י  צַדִּיקִֽים׃ 


Of oppressing a stranger
9   וְגֵ֖ר  לֹ֣א  תִלְחָ֑ץ  וְאַתֶּ֗ם  יְדַעְתֶּם֙  אֶת־  נֶ֣פֶשׁ  הַגֵּ֔ר  כִּֽי־  גֵרִ֥ים  הֱיִיתֶ֖ם  בְּאֶ֥רֶץ  מִצְרָֽיִם׃ 


Of the year of rest
10   וְשֵׁ֥שׁ  שָׁנִ֖ים  תִּזְרַ֣ע  אֶת־  אַרְצֶ֑ךָ  וְאָסַפְתָּ֖  אֶת־  תְּבוּאָתָֽהּ׃  11   וְהַשְּׁבִיעִ֞ת  תִּשְׁמְטֶ֣נָּה  וּנְטַשְׁתָּ֗הּ  וְאָֽכְלוּ֙  אֶבְיֹנֵ֣י  עַמֶּ֔ךָ  וְיִתְרָ֕ם  תֹּאכַ֖ל  חַיַּ֣ת  הַשָּׂדֶ֑ה  כֵּֽן־  תַּעֲשֶׂ֥ה  לְכַרְמְךָ֖  לְזֵיתֶֽךָ׃ 


Of the Sabbath
12   שֵׁ֤שֶׁת  יָמִים֙  תַּעֲשֶׂ֣ה  מַעֲשֶׂ֔יךָ  וּבַיֹּ֥ום  הַשְּׁבִיעִ֖י  תִּשְׁבֹּ֑ת  לְמַ֣עַן  יָנ֗וּחַ  שֹֽׁורְךָ֙  וַחֲמֹרֶ֔ךָ  וְיִנָּפֵ֥שׁ  בֶּן־  אֲמָתְךָ֖  וְהַגֵּֽר׃ 


Of idolatry
13   וּבְכֹ֛ל  אֲשֶׁר־  אָמַ֥רְתִּי  אֲלֵיכֶ֖ם  תִּשָּׁמֵ֑רוּ  וְשֵׁ֨ם  אֱלֹהִ֤ים  אֲחֵרִים֙  לֹ֣א  תַזְכִּ֔ירוּ  לֹ֥א  יִשָּׁמַ֖ע  עַל־  פִּֽיךָ׃ 


Of the three feasts
14   שָׁלֹ֣שׁ  רְגָלִ֔ים  תָּחֹ֥ג  לִ֖י  בַּשָּׁנָֽה׃  15   אֶת־  חַ֣ג  הַמַּצֹּות֮  תִּשְׁמֹר֒  שִׁבְעַ֣ת  יָמִים֩  תֹּאכַ֨ל  מַצֹּ֜ות  כַּֽאֲשֶׁ֣ר  צִוִּיתִ֗ךָ  לְמֹועֵד֙  חֹ֣דֶשׁ  הָֽאָבִ֔יב  כִּי־  בֹ֖ו  יָצָ֣אתָ  מִמִּצְרָ֑יִם  וְלֹא־  יֵרָא֥וּ  פָנַ֖י  רֵיקָֽם׃  16   וְחַ֤ג  הַקָּצִיר֙  בִּכּוּרֵ֣י  מַעֲשֶׂ֔יךָ  אֲשֶׁ֥ר  תִּזְרַ֖ע  בַּשָּׂדֶ֑ה  וְחַ֤ג  הָֽאָסִף֙  בְּצֵ֣את  הַשָּׁנָ֔ה  בְּאָסְפְּךָ֥  אֶֽת־  מַעֲשֶׂ֖יךָ  מִן־  הַשָּׂדֶֽה׃  17   שָׁלֹ֥שׁ  פְּעָמִ֖ים  בַּשָּׁנָ֑ה  יֵרָאֶה֙  כָּל־  זְכ֣וּרְךָ֔  אֶל־  פְּנֵ֖י  הָאָדֹ֥ן  יְהוָֽה׃ 


Of the blood and the fat of the sacrifice
18   לֹֽא־  תִזְבַּ֥ח  עַל־  חָמֵ֖ץ  דַּם־  זִבְחִ֑י  וְלֹֽא־  יָלִ֥ין  חֵֽלֶב־  חַגִּ֖י  עַד־  בֹּֽקֶר׃  19   רֵאשִׁ֗ית  בִּכּוּרֵי֙  אַדְמָ֣תְךָ֔  תָּבִ֕יא  בֵּ֖ית  יְהוָ֣ה  אֱלֹהֶ֑יךָ  לֹֽא־  תְבַשֵּׁ֥ל  גְּדִ֖י  בַּחֲלֵ֥ב  אִמֹּֽו׃  ס 


An angel is promised, with a blessing, if they obey him
20   הִנֵּ֨ה  אָנֹכִ֜י  שֹׁלֵ֤חַ  מַלְאָךְ֙  לְפָנֶ֔יךָ  לִשְׁמָרְךָ֖  בַּדָּ֑רֶךְ  וְלַהֲבִ֣יאֲךָ֔  אֶל־  הַמָּקֹ֖ום  אֲשֶׁ֥ר  הֲכִנֹֽתִי׃  21   הִשָּׁ֧מֶר  מִפָּנָ֛יו  וּשְׁמַ֥ע  בְּקֹלֹ֖ו  אַל־  תַּמֵּ֣ר  בֹּ֑ו  כִּ֣י  לֹ֤א  יִשָּׂא֙  לְפִשְׁעֲכֶ֔ם  כִּ֥י  שְׁמִ֖י  בְּקִרְבֹּֽו׃  22   כִּ֣י  אִם־  שָׁמֹ֤עַ  תִּשְׁמַע֙  בְּקֹלֹ֔ו  וְעָשִׂ֕יתָ  כֹּ֖ל  אֲשֶׁ֣ר  אֲדַבֵּ֑ר  וְאָֽיַבְתִּי֙  אֶת־  אֹ֣יְבֶ֔יךָ  וְצַרְתִּ֖י  אֶת־  צֹרְרֶֽיךָ׃  23   כִּֽי־  יֵלֵ֣ךְ  מַלְאָכִי֮  לְפָנֶיךָ֒  וֶהֱבִֽיאֲךָ֗  אֶל־  הָֽאֱמֹרִי֙  וְהַ֣חִתִּ֔י  וְהַפְּרִזִּי֙  וְהַֽכְּנַעֲנִ֔י  הַחִוִּ֖י  וְהַיְבוּסִ֑י  וְהִכְחַדְתִּֽיו׃  24   לֹֽא־  תִשְׁתַּחֲוֶ֤ה  לֵאלֹֽהֵיהֶם֙  וְלֹ֣א  תָֽעָבְדֵ֔ם  וְלֹ֥א  תַעֲשֶׂ֖ה  כְּמַֽעֲשֵׂיהֶ֑ם  כִּ֤י  הָרֵס֙  תְּהָ֣רְסֵ֔ם  וְשַׁבֵּ֥ר  תְּשַׁבֵּ֖ר  מַצֵּבֹתֵיהֶֽם׃  25   וַעֲבַדְתֶּ֗ם  אֵ֚ת  יְהוָ֣ה  אֱלֹֽהֵיכֶ֔ם  וּבֵרַ֥ךְ  אֶֽת־  לַחְמְךָ֖  וְאֶת־  מֵימֶ֑יךָ  וַהֲסִרֹתִ֥י  מַחֲלָ֖ה  מִקִּרְבֶּֽךָ׃  26   לֹ֥א  תִהְיֶ֛ה  מְשַׁכֵּלָ֥ה  וַעֲקָרָ֖ה  בְּאַרְצֶ֑ךָ  אֶת־  מִסְפַּ֥ר  יָמֶ֖יךָ  אֲמַלֵּֽא׃  27   אֶת־  אֵֽימָתִי֙  אֲשַׁלַּ֣ח  לְפָנֶ֔יךָ  וְהַמֹּתִי֙  אֶת־  כָּל־  הָעָ֔ם  אֲשֶׁ֥ר  תָּבֹ֖א  בָּהֶ֑ם  וְנָתַתִּ֧י  אֶת־  כָּל־  אֹיְבֶ֛יךָ  אֵלֶ֖יךָ  עֹֽרֶף׃  28   וְשָׁלַחְתִּ֥י  אֶת־  הַצִּרְעָ֖ה  לְפָנֶ֑יךָ  וְגֵרְשָׁ֗ה  אֶת־  הַחִוִּ֧י  אֶת־  הַֽכְּנַעֲנִ֛י  וְאֶת־  הַחִתִּ֖י  מִלְּפָנֶֽיךָ׃  29   לֹ֧א  אֲגָרְשֶׁ֛נּוּ  מִפָּנֶ֖יךָ  בְּשָׁנָ֣ה  אֶחָ֑ת  פֶּן־  תִּהְיֶ֤ה  הָאָ֙רֶץ֙  שְׁמָמָ֔ה  וְרַבָּ֥ה  עָלֶ֖יךָ  חַיַּ֥ת  הַשָּׂדֶֽה׃  30   מְעַ֥ט  מְעַ֛ט  אֲגָרְשֶׁ֖נּוּ  מִפָּנֶ֑יךָ  עַ֚ד  אֲשֶׁ֣ר  תִּפְרֶ֔ה  וְנָחַלְתָּ֖  אֶת־  הָאָֽרֶץ׃  31   וְשַׁתִּ֣י  אֶת־  גְּבֻלְךָ֗  מִיַּם־  סוּף֙  וְעַד־  יָ֣ם  פְּלִשְׁתִּ֔ים  וּמִמִּדְבָּ֖ר  עַד־  הַנָּהָ֑ר  כִּ֣י  אֶתֵּ֣ן  בְּיֶדְכֶ֗ם  אֵ֚ת  יֹשְׁבֵ֣י  הָאָ֔רֶץ  וְגֵרַשְׁתָּ֖מֹו  מִפָּנֶֽיךָ׃  32   לֹא־  תִכְרֹ֥ת  לָהֶ֛ם  וְלֵאלֹֽהֵיהֶ֖ם  בְּרִֽית׃  33   לֹ֤א  יֵשְׁבוּ֙  בְּאַרְצְךָ֔  פֶּן־  יַחֲטִ֥יאוּ  אֹתְךָ֖  לִ֑י  כִּ֤י  תַעֲבֹד֙  אֶת־  אֱלֹ֣הֵיהֶ֔ם  כִּֽי־  יִהְיֶ֥ה  לְךָ֖  לְמֹוקֵֽשׁ׃  פ 
<< Exodus 23 >>
Biblos Greek and Hebrew Study Bible © 2010 Biblos.com
Online Parallel Bible