<< Exodus 22 HEB >>


Of Theft
1   כִּ֤י  יִגְנֹֽב־  אִישׁ֙  שֹׁ֣ור  אֹו־  שֶׂ֔ה  וּטְבָחֹ֖ו  אֹ֣ו  מְכָרֹ֑ו  חֲמִשָּׁ֣ה  בָקָ֗ר  יְשַׁלֵּם֙  תַּ֣חַת  הַשֹּׁ֔ור  וְאַרְבַּע־  צֹ֖אן  תַּ֥חַת  הַשֶּֽׂה׃  2   אִם־  בַּמַּחְתֶּ֛רֶת  יִמָּצֵ֥א  הַגַּנָּ֖ב  וְהֻכָּ֣ה  וָמֵ֑ת  אֵ֥ין  לֹ֖ו  דָּמִֽים׃  3   אִם־  זָרְחָ֥ה  הַשֶּׁ֛מֶשׁ  עָלָ֖יו  דָּמִ֣ים  לֹ֑ו  שַׁלֵּ֣ם  יְשַׁלֵּ֔ם  אִם־  אֵ֣ין  לֹ֔ו  וְנִמְכַּ֖ר  בִּגְנֵבָתֹֽו׃  4   אִֽם־  הִמָּצֵא֩  תִמָּצֵ֨א  בְיָדֹ֜ו  הַגְּנֵבָ֗ה  מִשֹּׁ֧ור  עַד־  חֲמֹ֛ור  עַד־  שֶׂ֖ה  חַיִּ֑ים  שְׁנַ֖יִם  יְשַׁלֵּֽם׃  ס 


Of damage
5   כִּ֤י  יַבְעֶר־  אִישׁ֙  שָׂדֶ֣ה  אֹו־  כֶ֔רֶם  וְשִׁלַּח֙  אֶת־  [בְּעִירָה  כ]  (בְּעִירֹ֔ו  ק)  וּבִעֵ֖ר  בִּשְׂדֵ֣ה  אַחֵ֑ר  מֵיטַ֥ב  שָׂדֵ֛הוּ  וּמֵיטַ֥ב  כַּרְמֹ֖ו  יְשַׁלֵּֽם׃  ס  6   כִּֽי־  תֵצֵ֨א  אֵ֜שׁ  וּמָצְאָ֤ה  קֹצִים֙  וְנֶאֱכַ֣ל  גָּדִ֔ישׁ  אֹ֥ו  הַקָּמָ֖ה  אֹ֣ו  הַשָּׂדֶ֑ה  שַׁלֵּ֣ם  יְשַׁלֵּ֔ם  הַמַּבְעִ֖ר  אֶת־  הַבְּעֵרָֽה׃  ס 


Of trespasses
7   כִּֽי־  יִתֵּן֩  אִ֨ישׁ  אֶל־  רֵעֵ֜הוּ  כֶּ֤סֶף  אֹֽו־  כֵלִים֙  לִשְׁמֹ֔ר  וְגֻנַּ֖ב  מִבֵּ֣ית  הָאִ֑ישׁ  אִם־  יִמָּצֵ֥א  הַגַּנָּ֖ב  יְשַׁלֵּ֥ם  שְׁנָֽיִם׃  8   אִם־  לֹ֤א  יִמָּצֵא֙  הַגַּנָּ֔ב  וְנִקְרַ֥ב  בַּֽעַל־  הַבַּ֖יִת  אֶל־  הָֽאֱלֹהִ֑ים  אִם־  לֹ֥א  שָׁלַ֛ח  יָדֹ֖ו  בִּמְלֶ֥אכֶת  רֵעֵֽהוּ׃  9   עַֽל־  כָּל־  דְּבַר־  פֶּ֡שַׁע  עַל־  שֹׁ֡ור  עַל־  חֲ֠מֹור  עַל־  שֶׂ֨ה  עַל־  שַׂלְמָ֜ה  עַל־  כָּל־  אֲבֵדָ֗ה  אֲשֶׁ֤ר  יֹאמַר֙  כִּי־  ה֣וּא  זֶ֔ה  עַ֚ד  הָֽאֱלֹהִ֔ים  יָבֹ֖א  דְּבַר־  שְׁנֵיהֶ֑ם  אֲשֶׁ֤ר  יַרְשִׁיעֻן֙  אֱלֹהִ֔ים  יְשַׁלֵּ֥ם  שְׁנַ֖יִם  לְרֵעֵֽהוּ׃  ס  10   כִּֽי־  יִתֵּן֩  אִ֨ישׁ  אֶל־  רֵעֵ֜הוּ  חֲמֹ֨ור  אֹו־  שֹׁ֥ור  אֹו־  שֶׂ֛ה  וְכָל־  בְּהֵמָ֖ה  לִשְׁמֹ֑ר  וּמֵ֛ת  אֹו־  נִשְׁבַּ֥ר  אֹו־  נִשְׁבָּ֖ה  אֵ֥ין  רֹאֶֽה׃  11   שְׁבֻעַ֣ת  יְהוָ֗ה  תִּהְיֶה֙  בֵּ֣ין  שְׁנֵיהֶ֔ם  אִם־  לֹ֥א  שָׁלַ֛ח  יָדֹ֖ו  בִּמְלֶ֣אכֶת  רֵעֵ֑הוּ  וְלָקַ֥ח  בְּעָלָ֖יו  וְלֹ֥א  יְשַׁלֵּֽם׃  12   וְאִם־  גָּנֹ֥ב  יִגָּנֵ֖ב  מֵעִמֹּ֑ו  יְשַׁלֵּ֖ם  לִבְעָלָֽיו׃  13   אִם־  טָרֹ֥ף  יִטָּרֵ֖ף  יְבִאֵ֣הוּ  עֵ֑ד  הַטְּרֵפָ֖ה  לֹ֥א  יְשַׁלֵּֽם׃  פ 


Of borrowing
14   וְכִֽי־  יִשְׁאַ֥ל  אִ֛ישׁ  מֵעִ֥ם  רֵעֵ֖הוּ  וְנִשְׁבַּ֣ר  אֹו־  מֵ֑ת  בְּעָלָ֥יו  אֵין־  עִמֹּ֖ו  שַׁלֵּ֥ם  יְשַׁלֵּֽם׃  15   אִם־  בְּעָלָ֥יו  עִמֹּ֖ו  לֹ֣א  יְשַׁלֵּ֑ם  אִם־  שָׂכִ֣יר  ה֔וּא  בָּ֖א  בִּשְׂכָרֹֽו׃  ס 


Of fornication
16   וְכִֽי־  יְפַתֶּ֣ה  אִ֗ישׁ  בְּתוּלָ֛ה  אֲשֶׁ֥ר  לֹא־  אֹרָ֖שָׂה  וְשָׁכַ֣ב  עִמָּ֑הּ  מָהֹ֛ר  יִמְהָרֶ֥נָּה  לֹּ֖ו  לְאִשָּֽׁה׃  17   אִם־  מָאֵ֧ן  יְמָאֵ֛ן  אָבִ֖יהָ  לְתִתָּ֣הּ  לֹ֑ו  כֶּ֣סֶף  יִשְׁקֹ֔ל  כְּמֹ֖הַר  הַבְּתוּלֹֽת׃  ס 


Of witchcraft
18   מְכַשֵּׁפָ֖ה  לֹ֥א  תְחַיֶּֽה׃  ס 


Of bestiality
19   כָּל־  שֹׁכֵ֥ב  עִם־  בְּהֵמָ֖ה  מֹ֥ות  יוּמָֽת׃  ס 


Of idolatry
20   זֹבֵ֥חַ  לָאֱלֹהִ֖ים  יָֽחֳרָ֑ם  בִּלְתִּ֥י  לַיהוָ֖ה  לְבַדֹּֽו׃ 


Of strangers, widows, and fatherless
21   וְגֵ֥ר  לֹא־  תֹונֶ֖ה  וְלֹ֣א  תִלְחָצֶ֑נּוּ  כִּֽי־  גֵרִ֥ים  הֱיִיתֶ֖ם  בְּאֶ֥רֶץ  מִצְרָֽיִם׃  22   כָּל־  אַלְמָנָ֥ה  וְיָתֹ֖ום  לֹ֥א  תְעַנּֽוּן׃  23   אִם־  עַנֵּ֥ה  תְעַנֶּ֖ה  אֹתֹ֑ו  כִּ֣י  אִם־  צָעֹ֤ק  יִצְעַק֙  אֵלַ֔י  שָׁמֹ֥עַ  אֶשְׁמַ֖ע  צַעֲקָתֹֽו׃  24   וְחָרָ֣ה  אַפִּ֔י  וְהָרַגְתִּ֥י  אֶתְכֶ֖ם  בֶּחָ֑רֶב  וְהָי֤וּ  נְשֵׁיכֶם֙  אַלְמָנֹ֔ות  וּבְנֵיכֶ֖ם  יְתֹמִֽים׃  פ 


Of usury
25   אִם־  כֶּ֣סֶף  תַּלְוֶ֣ה  אֶת־  עַמִּ֗י  אֶת־  הֶֽעָנִי֙  עִמָּ֔ךְ  לֹא־  תִהְיֶ֥ה  לֹ֖ו  כְּנֹשֶׁ֑ה  לֹֽא־  תְשִׂימ֥וּן  עָלָ֖יו  נֶֽשֶׁךְ׃ 


Of pledges
26   אִם־  חָבֹ֥ל  תַּחְבֹּ֖ל  שַׂלְמַ֣ת  רֵעֶ֑ךָ  עַד־  בֹּ֥א  הַשֶּׁ֖מֶשׁ  תְּשִׁיבֶ֥נּוּ  לֹֽו׃  27   כִּ֣י  הִ֤וא  [כְסוּתָה  כ]  (כְסוּתֹו֙  ק)  לְבַדָּ֔הּ  הִ֥וא  שִׂמְלָתֹ֖ו  לְעֹרֹ֑ו  בַּמֶּ֣ה  יִשְׁכָּ֔ב  וְהָיָה֙  כִּֽי־  יִצְעַ֣ק  אֵלַ֔י  וְשָׁמַעְתִּ֖י  כִּֽי־  חַנּ֥וּן  אָֽנִי׃  ס 


Of reverence to magistrates
28   אֱלֹהִ֖ים  לֹ֣א  תְקַלֵּ֑ל  וְנָשִׂ֥יא  בְעַמְּךָ֖  לֹ֥א  תָאֹֽר׃ 


Of the first fruits
29   מְלֵאָתְךָ֥  וְדִמְעֲךָ֖  לֹ֣א  תְאַחֵ֑ר  בְּכֹ֥ור  בָּנֶ֖יךָ  תִּתֶּן־  לִּֽי  30   כֵּֽן־  תַּעֲשֶׂ֥ה  לְשֹׁרְךָ֖  לְצֹאנֶ֑ךָ  שִׁבְעַ֤ת  יָמִים֙  יִהְיֶ֣ה  עִם־  אִמֹּ֔ו  בַּיֹּ֥ום  הַשְּׁמִינִ֖י  תִּתְּנֹו־  לִֽי׃ 


Of torn flesh
31   וְאַנְשֵׁי־  קֹ֖דֶשׁ  תִּהְי֣וּן  לִ֑י  וּבָשָׂ֨ר  בַּשָּׂדֶ֤ה  טְרֵפָה֙  לֹ֣א  תֹאכֵ֔לוּ  לַכֶּ֖לֶב  תַּשְׁלִכ֥וּן  אֹתֹֽו׃  ס 
<< Exodus 22 >>
Biblos Greek and Hebrew Study Bible © 2010 Biblos.com
Online Parallel Bible