Ǝnǝfilal n Ǝjemar d ǝlkǝttab wa tǝwar talxatimt

1Tǝzzar oggeɣ daɣ ǝfus wa n ǝɣil ǝn wa iqqiman fǝl tǝxawit ta n taɣmar ǝlkǝttab iwar akatab sa sǝr ammas ǝd sa sǝr afalla. Ǝlkǝttab wen ǝwarnat-tu ǝssayat tǝlxatimen, a das-ǝmosnen šisǝɣfal. 2Oggeɣ angalos iknân tǝla ǝn tarna igannu s ǝmǝsli issohen: «Ma imos wa ewadan ad alǝm ǝlkǝttab wa, aru tǝlxatimen šin t-ǝwarnen?» 3Mišan wǝr t-illa daɣ jǝnnawan za wala amaḍal, wala daw amaḍal, i ifragan allam n ǝlkǝttab wen, wala inǝy awa t-ihan. 4Tǝzzar ad halla wǝllen id wǝr t-illa i ifragan allam n ǝlkǝttab wen, wala deɣ ifrâg anay n awa t-ihan.

5Tǝzzar inn-i iyyan daɣ ǝmɣaran: «Ayyu tala! Ǝnǝy, ahar wa n tawšet ǝn Yahuda, a d-igmâdan ǝzzurrǝyya ǝn Dawǝd, ǝnta a d-ornan, amaran ǝnta fadda a zʼalǝman ǝlkǝttab wa d ǝssayat tǝlxatimen-net.»

6Tǝzzar oggeɣ Ǝjemar ibdâdan daɣ ammas ǝn tǝxawit ta n taɣmar ǝd mudaran win ǝkkoz, daɣ garegaray n ǝmɣaran. Ǝjemar wen ola d ǝmudar igzaman, amaran ila ǝssa ǝskawan d ǝssayat šittawen ǝmmittalnen [ǝssa] ǝrruxanitan ǝn Mǝššina a d-issoka ǝddǝnet ketnet. 7Ihoz-in y ad igrǝw ǝlkǝttab daɣ ǝfus wa n ǝɣil ǝn wa iqqiman fǝl tǝxawit ta n taɣmar. 8Assaɣa wad igraw Ǝjemar ǝlkǝttab, ǝnkaran mudaran win ǝkkoz, d ǝmɣaran win sanatat tǝmǝrwen d ǝkkoz ǝssǝjadan dat-ǝs. Akkiyyan daɣ-san ittâf tǝhǝrdănt, ǝd tǝkǝrwasen n urǝɣ ǝdnâynen aḍutan ǝzodnen taqqadnen ǝmmittalnen šiwatriwen ǝn mizdagan. 9Ǝssiggadan daɣ tǝmmal taynayat, gannin:

Kay a ihoran d agaraw n ǝlkǝttab, tarzaɣ talxatimt-net,

id ǝtǝwǝgzam a tǝgeɣ.

Amaran azni-nak as tǝrzama tǝdarfit n aytedan

ǝn tawšeten kul d awalan kul ǝd tǝmattiwen kul

ǝd kallan kul, tewayaq-qan-du ǝs tarrayt ta n Mǝššina.

10Tǝgeq-qan imǝnokalan ǝd limaman,

ǝɣbâdnen Ǝmǝli-nana,

amaran ad ǝxkǝman fǝl ǝddǝnet.

11Ǝlasaɣ-in asawad, tǝzzar ǝsleɣ i maslan n angalosan ǝknânen igǝt. Ǝmosan igiman ǝn giman, ɣilayɣalayan tǝxawit ta n taɣmar, ɣilayɣalayan imudaran d ǝmɣaran. 12Ǝssiggadan gannin s ǝmǝsli issohen:

«Ǝjemar wa igzaman iqqal takutay,

ihor d agaraw ǝn tarna

ǝd tǝgǝrgist ǝd masnat

ǝd tǝɣurad d ǝtǝwǝsǝɣmar

ǝd tanaya ǝd tǝmmalen!»

13Tǝzzar ǝsleɣ daɣ amazay wen da i tǝxǝllak kul daɣ jǝnnawan d amaḍal, ǝd daw amaḍal, ǝd gǝrwan, ganninat:

«Tǝmmalen ǝd saɣmar ǝd tanaya

ǝd tarna har faw

in wa iqqiman fǝl tǝxawit ta n taɣmar

d Ǝjemar!»

14Tǝzzar ǝnnan mudaran win ǝkkoz: «Amin!» Ǝssǝjadan ǝmɣaran ǝɣbadan Mǝššina d Ǝjemar.