<< Song of Solomon 6 HEB >>


the church professes her faith in Christ
1   אָ֚נָה  הָלַ֣ךְ  דֹּודֵ֔ךְ  הַיָּפָ֖ה  בַּנָּשִׁ֑ים  אָ֚נָה  פָּנָ֣ה  דֹודֵ֔ךְ  וּנְבַקְשֶׁ֖נּוּ  עִמָּֽךְ׃  2   דֹּודִי֙  יָרַ֣ד  לְגַנֹּ֔ו  לַעֲרוּגֹ֖ות  הַבֹּ֑שֶׂם  לִרְעֹות֙  בַּגַּנִּ֔ים  וְלִלְקֹ֖ט  שֹֽׁושַׁנִּֽים׃  3   אֲנִ֤י  לְדֹודִי֙  וְדֹודִ֣י  לִ֔י  הָרֹעֶ֖ה  בַּשֹּׁושַׁנִּֽים׃  ס 


Christ shows the graces of the church
4   יָפָ֨ה  אַ֤תְּ  רַעְיָתִי֙  כְּתִרְצָ֔ה  נָאוָ֖ה  כִּירוּשָׁלִָ֑ם  אֲיֻמָּ֖ה  כַּנִּדְגָּלֹֽות׃  5   הָסֵ֤בִּי  עֵינַ֙יִךְ֙  מִנֶּגְדִּ֔י  שֶׁ֥הֵ֖ם  הִרְהִיבֻ֑נִי  שַׂעְרֵךְ֙  כְּעֵ֣דֶר  הָֽעִזִּ֔ים  שֶׁגָּלְשׁ֖וּ  מִן־  הַגִּלְעָֽד׃  6   שִׁנַּ֙יִךְ֙  כְּעֵ֣דֶר  הָֽרְחֵלִ֔ים  שֶׁעָל֖וּ  מִן־  הָרַחְצָ֑ה  שֶׁכֻּלָּם֙  מַתְאִימֹ֔ות  וְשַׁכֻּלָ֖ה  אֵ֥ין  בָּהֶֽם׃  7   כְּפֶ֤לַח  הָרִמֹּון֙  רַקָּתֵ֔ךְ  מִבַּ֖עַד  לְצַמָּתֵֽךְ׃  8   שִׁשִּׁ֥ים  הֵ֙מָּה֙  מְּלָכֹ֔ות  וּשְׁמֹנִ֖ים  פִּֽילַגְשִׁ֑ים  וַעֲלָמֹ֖ות  אֵ֥ין  מִסְפָּֽר׃  9   אַחַ֥ת  הִיא֙  יֹונָתִ֣י  תַמָּתִ֔י  אַחַ֥ת  הִיא֙  לְאִמָּ֔הּ  בָּרָ֥ה  הִ֖יא  לְיֹֽולַדְתָּ֑הּ  רָא֤וּהָ  בָנֹות֙  וַֽיְאַשְּׁר֔וּהָ  מְלָכֹ֥ות  וּפִֽילַגְשִׁ֖ים  וַֽיְהַלְלֽוּהָ׃  ס 


and his love toward her
10   מִי־  זֹ֥את  הַנִּשְׁקָפָ֖ה  כְּמֹו־  שָׁ֑חַר  יָפָ֣ה  כַלְּבָנָ֗ה  בָּרָה֙  כַּֽחַמָּ֔ה  אֲיֻמָּ֖ה  כַּנִּדְגָּלֹֽות׃  ס  11   אֶל־  גִּנַּ֤ת  אֱגֹוז֙  יָרַ֔דְתִּי  לִרְאֹ֖ות  בְּאִבֵּ֣י  הַנָּ֑חַל  לִרְאֹות֙  הֲפָֽרְחָ֣ה  הַגֶּ֔פֶן  הֵנֵ֖צוּ  הָרִמֹּנִֽים׃  12   לֹ֣א  יָדַ֔עְתִּי  נַפְשִׁ֣י  שָׂמַ֔תְנִי  מַרְכְּבֹ֖ות  עַמִּי־  נָדִֽיב׃  13   שׁ֤וּבִי  שׁ֙וּבִי֙  הַשּׁ֣וּלַמִּ֔ית  שׁ֥וּבִי  שׁ֖וּבִי  וְנֶחֱזֶה־  בָּ֑ךְ  מַֽה־  תֶּחֱזוּ֙  בַּשּׁ֣וּלַמִּ֔ית  כִּמְחֹלַ֖ת  הַֽמַּחֲנָֽיִם׃ 
<< Song of Solomon 6 >>
Biblos Greek and Hebrew Study Bible © 2010 Biblos.com
Online Parallel Bible