<< Ruth 1 HEB >>


Elimelech, driven by famine into Moab, dies there
1   וַיְהִ֗י  בִּימֵי֙  שְׁפֹ֣ט  הַשֹּׁפְטִ֔ים  וַיְהִ֥י  רָעָ֖ב  בָּאָ֑רֶץ  וַיֵּ֨לֶךְ  אִ֜ישׁ  מִבֵּ֧ית  לֶ֣חֶם  יְהוּדָ֗ה  לָגוּר֙  בִּשְׂדֵ֣י  מֹואָ֔ב  ה֥וּא  וְאִשְׁתֹּ֖ו  וּשְׁנֵ֥י  בָנָֽיו׃  2   וְשֵׁ֣ם  הָאִ֣ישׁ  אֱ‍ֽלִימֶ֡לֶךְ  וְשֵׁם֩  אִשְׁתֹּ֨ו  נָעֳמִ֜י  וְשֵׁ֥ם  שְׁנֵֽי־  בָנָ֣יו  מַחְלֹ֤ון  וְכִלְיֹון֙  אֶפְרָתִ֔ים  מִבֵּ֥ית  לֶ֖חֶם  יְהוּדָ֑ה  וַיָּבֹ֥אוּ  שְׂדֵי־  מֹואָ֖ב  וַיִּֽהְיוּ־  שָֽׁם׃  3   וַיָּ֥מָת  אֱלִימֶ֖לֶךְ  אִ֣ישׁ  נָעֳמִ֑י  וַתִּשָּׁאֵ֥ר  הִ֖יא  וּשְׁנֵ֥י  בָנֶֽיהָ׃ 


Mahlon and Chilion, having married wives of Moab, die also
4   וַיִּשְׂא֣וּ  לָהֶ֗ם  נָשִׁים֙  מֹֽאֲבִיֹּ֔ות  שֵׁ֤ם  הָֽאַחַת֙  עָרְפָּ֔ה  וְשֵׁ֥ם  הַשֵּׁנִ֖ית  ר֑וּת  וַיֵּ֥שְׁבוּ  שָׁ֖ם  כְּעֶ֥שֶׂר  שָׁנִֽים׃  5   וַיָּמ֥וּתוּ  גַם־  שְׁנֵיהֶ֖ם  מַחְלֹ֣ון  וְכִלְיֹ֑ון  וַתִּשָּׁאֵר֙  הָֽאִשָּׁ֔ה  מִשְּׁנֵ֥י  יְלָדֶ֖יהָ  וּמֵאִישָֽׁהּ׃ 


Naomi, returning homeward
6   וַתָּ֤קָם  הִיא֙  וְכַלֹּתֶ֔יהָ  וַתָּ֖שָׁב  מִשְּׂדֵ֣י  מֹואָ֑ב  כִּ֤י  שָֽׁמְעָה֙  בִּשְׂדֵ֣ה  מֹואָ֔ב  כִּֽי־  פָקַ֤ד  יְהוָה֙  אֶת־  עַמֹּ֔ו  לָתֵ֥ת  לָהֶ֖ם  לָֽחֶם׃  7   וַתֵּצֵ֗א  מִן־  הַמָּקֹום֙  אֲשֶׁ֣ר  הָיְתָה־  שָׁ֔מָּה  וּשְׁתֵּ֥י  כַלֹּתֶ֖יהָ  עִמָּ֑הּ  וַתֵּלַ֣כְנָה  בַדֶּ֔רֶךְ  לָשׁ֖וּב  אֶל־  אֶ֥רֶץ  יְהוּדָֽה׃ 


dissuades her two daughters-in-law from going with her
8   וַתֹּ֤אמֶר  נָעֳמִי֙  לִשְׁתֵּ֣י  כַלֹּתֶ֔יהָ  לֵ֣כְנָה  שֹּׁ֔בְנָה  אִשָּׁ֖ה  לְבֵ֣ית  אִמָּ֑הּ  [יַעֲשֶׂה  כ]  (יַ֣עַשׂ  ק)  יְהוָ֤ה  עִמָּכֶם֙  חֶ֔סֶד  כַּאֲשֶׁ֧ר  עֲשִׂיתֶ֛ם  עִם־  הַמֵּתִ֖ים  וְעִמָּדִֽי׃  9   יִתֵּ֤ן  יְהוָה֙  לָכֶ֔ם  וּמְצֶ֣אןָ  מְנוּחָ֔ה  אִשָּׁ֖ה  בֵּ֣ית  אִישָׁ֑הּ  וַתִּשַּׁ֣ק  לָהֶ֔ן  וַתִּשֶּׂ֥אנָה  קֹולָ֖ן  וַתִּבְכֶּֽינָה׃  10   וַתֹּאמַ֖רְנָה־  לָּ֑הּ  כִּי־  אִתָּ֥ךְ  נָשׁ֖וּב  לְעַמֵּֽךְ׃  11   וַתֹּ֤אמֶר  נָעֳמִי֙  שֹׁ֣בְנָה  בְנֹתַ֔י  לָ֥מָּה  תֵלַ֖כְנָה  עִמִּ֑י  הַֽעֹֽוד־  לִ֤י  בָנִים֙  בְּֽמֵעַ֔י  וְהָי֥וּ  לָכֶ֖ם  לַאֲנָשִֽׁים׃  12   שֹׁ֤בְנָה  בְנֹתַי֙  לֵ֔כְןָ  כִּ֥י  זָקַ֖נְתִּי  מִהְיֹ֣ות  לְאִ֑ישׁ  כִּ֤י  אָמַ֙רְתִּי֙  יֶשׁ־  לִ֣י  תִקְוָ֔ה  גַּ֣ם  הָיִ֤יתִי  הַלַּ֙יְלָה֙  לְאִ֔ישׁ  וְגַ֖ם  יָלַ֥דְתִּי  בָנִֽים׃  13   הֲלָהֵ֣ן  תְּשַׂבֵּ֗רְנָה  עַ֚ד  אֲשֶׁ֣ר  יִגְדָּ֔לוּ  הֲלָהֵן֙  תֵּֽעָגֵ֔נָה  לְבִלְתִּ֖י  הֱיֹ֣ות  לְאִ֑ישׁ  אַ֣ל  בְּנֹתַ֗י  כִּֽי־  מַר־  לִ֤י  מְאֹד֙  מִכֶּ֔ם  כִּֽי־  יָצְאָ֥ה  בִ֖י  יַד־  יְהוָֽה׃ 


Orpah leaves her, but Ruth with great constancy accompanies her
14   וַתִּשֶּׂ֣נָה  קֹולָ֔ן  וַתִּבְכֶּ֖ינָה  עֹ֑וד  וַתִּשַּׁ֤ק  עָרְפָּה֙  לַחֲמֹותָ֔הּ  וְר֖וּת  דָּ֥בְקָה  בָּֽהּ׃  15   וַתֹּ֗אמֶר  הִנֵּה֙  שָׁ֣בָה  יְבִמְתֵּ֔ךְ  אֶל־  עַמָּ֖הּ  וְאֶל־  אֱלֹהֶ֑יהָ  שׁ֖וּבִי  אַחֲרֵ֥י  יְבִמְתֵּֽךְ׃  16   וַתֹּ֤אמֶר  רוּת֙  אַל־  תִּפְגְּעִי־  בִ֔י  לְעָזְבֵ֖ךְ  לָשׁ֣וּב  מֵאַחֲרָ֑יִךְ  כִּ֠י  אֶל־  אֲשֶׁ֨ר  תֵּלְכִ֜י  אֵלֵ֗ךְ  וּבַאֲשֶׁ֤ר  תָּלִ֙ינִי֙  אָלִ֔ין  עַמֵּ֣ךְ  עַמִּ֔י  וֵאלֹהַ֖יִךְ  אֱלֹהָֽי׃  17   בַּאֲשֶׁ֤ר  תָּמ֙וּתִי֙  אָמ֔וּת  וְשָׁ֖ם  אֶקָּבֵ֑ר  כֹּה֩  יַעֲשֶׂ֨ה  יְהוָ֥ה  לִי֙  וְכֹ֣ה  יֹסִ֔יף  כִּ֣י  הַמָּ֔וֶת  יַפְרִ֖יד  בֵּינִ֥י  וּבֵינֵֽךְ׃  18   וַתֵּ֕רֶא  כִּֽי־  מִתְאַמֶּ֥צֶת  הִ֖יא  לָלֶ֣כֶת  אִתָּ֑הּ  וַתֶּחְדַּ֖ל  לְדַבֵּ֥ר  אֵלֶֽיהָ׃ 


The two come to Bethlehem, where they are gladly received
19   וַתֵּלַ֣כְנָה  שְׁתֵּיהֶ֔ם  עַד־  בֹּאָ֖נָה  בֵּ֣ית  לָ֑חֶם  וַיְהִ֗י  כְּבֹאָ֙נָה֙  בֵּ֣ית  לֶ֔חֶם  וַתֵּהֹ֤ם  כָּל־  הָעִיר֙  עֲלֵיהֶ֔ן  וַתֹּאמַ֖רְנָה  הֲזֹ֥את  נָעֳמִֽי׃  20   וַתֹּ֣אמֶר  אֲלֵיהֶ֔ן  אַל־  תִּקְרֶ֥אנָה  לִ֖י  נָעֳמִ֑י  קְרֶ֤אןָ  לִי֙  מָרָ֔א  כִּי־  הֵמַ֥ר  שַׁדַּ֛י  לִ֖י  מְאֹֽד׃  21   אֲנִי֙  מְלֵאָ֣ה  הָלַ֔כְתִּי  וְרֵיקָ֖ם  הֱשִׁיבַ֣נִי  יְהוָ֑ה  לָ֣מָּה  תִקְרֶ֤אנָה  לִי֙  נָעֳמִ֔י  וַֽיהוָה֙  עָ֣נָה  בִ֔י  וְשַׁדַּ֖י  הֵ֥רַֽע  לִֽי׃  22   וַתָּ֣שָׁב  נָעֳמִ֗י  וְר֨וּת  הַמֹּואֲבִיָּ֤ה  כַלָּתָהּ֙  עִמָּ֔הּ  הַשָּׁ֖בָה  מִשְּׂדֵ֣י  מֹואָ֑ב  וְהֵ֗מָּה  בָּ֚אוּ  בֵּ֣ית  לֶ֔חֶם  בִּתְחִלַּ֖ת  קְצִ֥יר  שְׂעֹרִֽים׃ 
<< Ruth 1 >>
Biblos Greek and Hebrew Study Bible © 2010 Biblos.com
Online Parallel Bible