<< Psalms 81 HEB >>


An exhortation to a solemn praising of God
1   לַמְנַצֵּ֬חַ  עַֽל־  הַגִּתִּ֬ית  לְאָסָֽף׃  הַ֭רְנִינוּ  לֵאלֹהִ֣ים  עוּזֵּ֑נוּ  הָ֝רִ֗יעוּ  לֵאלֹהֵ֥י  יַעֲקֹֽב׃  2   שְֽׂאוּ־  זִ֭מְרָה  וּתְנוּ־  תֹ֑ף  כִּנֹּ֖ור  נָעִ֣ים  עִם־  נָֽבֶל׃  3   תִּקְע֣וּ  בַחֹ֣דֶשׁ  שֹׁופָ֑ר  בַּ֝כֵּ֗סֶה  לְיֹ֣ום  חַגֵּֽנוּ׃ 


God challenges that duty by reason of his benefits
4   כִּ֤י  חֹ֣ק  לְיִשְׂרָאֵ֣ל  ה֑וּא  מִ֝שְׁפָּ֗ט  לֵאלֹהֵ֥י  יַעֲקֹֽב׃  5   עֵ֤דוּת  בִּֽיהֹ֘וסֵ֤ף  שָׂמֹ֗ו  בְּ֭צֵאתֹו  עַל־  אֶ֣רֶץ  מִצְרָ֑יִם  שְׂפַ֖ת  לֹא־  יָדַ֣עְתִּי  אֶשְׁמָֽע׃  6   הֲסִירֹ֣ותִי  מִסֵּ֣בֶל  שִׁכְמֹ֑ו  כַּ֝פָּ֗יו  מִדּ֥וּד  תַּעֲבֹֽרְנָה׃  7   בַּצָּרָ֥ה  קָרָ֗אתָ  וָאֲחַ֫לְּצֶ֥ךָּ  אֶ֭עֶנְךָ  בְּסֵ֣תֶר  רַ֑עַם  אֶבְחָֽנְךָ֨  עַל־  מֵ֖י  מְרִיבָ֣ה  סֶֽלָה׃ 


God, exhorting to obedience, complains of their disobedience, which proves their own hurt.
8   שְׁמַ֣ע  עַ֭מִּי  וְאָעִ֣ידָה  בָּ֑ךְ  יִ֝שְׂרָאֵ֗ל  אִם־  תִּֽשְׁמַֽע־  לִֽי׃  9   לֹֽא־  יִהְיֶ֣ה  בְ֭ךָ  אֵ֣ל  זָ֑ר  וְלֹ֥א  תִ֝שְׁתַּחֲוֶ֗ה  לְאֵ֣ל  נֵכָֽר׃  10   אָנֹכִ֨י  יְה֘וָ֤ה  אֱלֹהֶ֗יךָ  הַֽ֭מַּעַלְךָ  מֵאֶ֣רֶץ  מִצְרָ֑יִם  הַרְחֶב־  פִּ֝֗יךָ  וַאֲמַלְאֵֽהוּ׃  11   וְלֹא־  שָׁמַ֣ע  עַמִּ֣י  לְקֹולִ֑י  וְ֝יִשְׂרָאֵ֗ל  לֹא־  אָ֥בָה  לִֽי׃  12   וָֽ֭אֲשַׁלְּחֵהוּ  בִּשְׁרִיר֣וּת  לִבָּ֑ם  יֵ֝לְכ֗וּ  בְּֽמֹועֲצֹותֵיהֶֽם׃  13   ל֗וּ  עַ֭מִּי  שֹׁמֵ֣עַֽ  לִ֑י  יִ֝שְׂרָאֵ֗ל  בִּדְרָכַ֥י  יְהַלֵּֽכוּ׃  14   כִּ֭מְעַט  אֹויְבֵיהֶ֣ם  אַכְנִ֑יעַ  וְעַ֥ל  צָ֝רֵיהֶ֗ם  אָשִׁ֥יב  יָדִֽי׃  15   מְשַׂנְאֵ֣י  יְ֭הוָה  יְכַֽחֲשׁוּ־  לֹ֑ו  וִיהִ֖י  עִתָּ֣ם  לְעֹולָֽם׃  16   וַֽ֭יַּאֲכִילֵהוּ  מֵחֵ֣לֶב  חִטָּ֑ה  וּ֝מִצּ֗וּר  דְּבַ֣שׁ  אַשְׂבִּיעֶֽךָ׃ 
<< Psalm 81 >>
Biblos Greek and Hebrew Study Bible © 2010 Biblos.com
Online Parallel Bible