<< Psalms 72 HEB >>



David, praying for Solomon, shows the goodness and glory of God's kingdom
1   לִשְׁלֹמֹ֨ה  אֱ‍ֽלֹהִ֗ים  מִ֭שְׁפָּטֶיךָ  לְמֶ֣לֶךְ  תֵּ֑ן  וְצִדְקָתְךָ֥  לְבֶן־  מֶֽלֶךְ׃  2   יָדִ֣ין  עַמְּךָ֣  בְצֶ֑דֶק  וַעֲנִיֶּ֥יךָ  בְמִשְׁפָּֽט׃  3   יִשְׂא֤וּ  הָרִ֓ים  שָׁ֘לֹ֥ום  לָעָ֑ם  וּ֝גְבָעֹ֗ות  בִּצְדָקָֽה׃  4   יִשְׁפֹּ֤ט  עֲ‍ֽנִיֵּי־  עָ֗ם  יֹ֭ושִׁיעַ  לִבְנֵ֣י  אֶבְיֹ֑ון  וִֽידַכֵּ֣א  עֹושֵֽׁק׃  5   יִֽירָא֥וּךָ  עִם־  שָׁ֑מֶשׁ  וְלִפְנֵ֥י  יָ֝רֵ֗חַ  דֹּ֣ור  דֹּורִֽים׃  6   יֵ֭רֵד  כְּמָטָ֣ר  עַל־  גֵּ֑ז  כִּ֝רְבִיבִ֗ים  זַרְזִ֥יף  אָֽרֶץ׃  7   יִֽפְרַח־  בְּיָמָ֥יו  צַדִּ֑יק  וְרֹ֥ב  לֹ֗ום  עַד־  בְּלִ֥י  יָרֵֽחַ׃  8   וְ֭יֵרְדְּ  מִיָּ֣ם  עַד־  יָ֑ם  וּ֝מִנָּהָ֗ר  עַד־  אַפְסֵי־  אָֽרֶץ׃  9   לְ֭פָנָיו  יִכְרְע֣וּ  צִיִּ֑ים  וְ֝אֹיְבָ֗יו  עָפָ֥ר  יְלַחֵֽכוּ׃  10   מַלְכֵ֬י  תַרְשִׁ֣ישׁ  וְ֭אִיִּים  מִנְחָ֣ה  יָשִׁ֑יבוּ  מַלְכֵ֥י  שְׁבָ֥א  וּ֝סְבָ֗א  אֶשְׁכָּ֥ר  יַקְרִֽיבוּ׃  11   וְיִשְׁתַּחֲווּ־  לֹ֥ו  כָל־  מְלָכִ֑ים  כָּל־  גֹּויִ֥ם  יַֽעַבְדֽוּהוּ׃  12   כִּֽי־  יַ֭צִּיל  אֶבְיֹ֣ון  מְשַׁוֵּ֑עַ  וְ֝עָנִ֗י  וְֽאֵין־  עֹזֵ֥ר  לֹֽו׃  13   יָ֭חֹס  עַל־  דַּ֣ל  וְאֶבְיֹ֑ון  וְנַפְשֹׁ֖ות  אֶבְיֹונִ֣ים  יֹושִֽׁיעַ׃  14   מִתֹּ֣וךְ  וּ֭מֵחָמָס  יִגְאַ֣ל  נַפְשָׁ֑ם  וְיֵיקַ֖ר  דָּמָ֣ם  בְּעֵינָֽיו׃  15   וִיחִ֗י  וְיִתֶּן־  לֹו֮  מִזְּהַ֪ב  שְׁ֫בָ֥א  וְיִתְפַּלֵּ֣ל  בַּעֲדֹ֣ו  תָמִ֑יד  כָּל־  הַ֝יֹּ֗ום  יְבָרֲכֶֽנְהֽוּ׃  16   יְהִ֤י  פִסַּת־  בַּ֨ר  בָּאָרֶץ֮  בְּרֹ֪אשׁ  הָ֫רִ֥ים  יִרְעַ֣שׁ  כַּלְּבָנֹ֣ון  פִּרְיֹ֑ו  וְיָצִ֥יצוּ  מֵ֝עִ֗יר  כְּעֵ֣שֶׂב  הָאָֽרֶץ׃  17   יְהִ֤י  שְׁמֹ֨ו  לְֽעֹולָ֗ם  לִפְנֵי־  שֶׁמֶשׁ֮  [יָנִין  כ]  (יִנֹּ֪ון  ק)  שְׁ֫מֹ֥ו  וְיִתְבָּ֥רְכוּ  בֹ֑ו  כָּל־  גֹּויִ֥ם  יְאַשְּׁרֽוּהוּ׃ 


He blessed God
18   בָּר֤וּךְ  יְהוָ֣ה  אֱ֭לֹהִים  אֱלֹהֵ֣י  יִשְׂרָאֵ֑ל  עֹשֵׂ֖ה  נִפְלָאֹ֣ות  לְבַדֹּֽו׃  19   וּבָר֤וּךְ  שֵׁ֥ם  כְּבֹודֹ֗ו  לְעֹ֫ולָ֥ם  וְיִמָּלֵ֣א  כְ֭בֹודֹו  אֶת־  כֹּ֥ל  הָאָ֗רֶץ  אָ֘מֵ֥ן  וְאָמֵֽן׃  20   כָּלּ֥וּ  תְפִלֹּ֑ות  דָּ֝וִ֗ד  בֶּן־  יִשָֽׁי׃ 

<< Psalm 72 >>
Biblos Greek and Hebrew Study Bible © 2010 Biblos.com
Online Parallel Bible