<< Psalms 5 HEB >>


David prays, and professes his study in prayer
1   לַמְנַצֵּ֥חַ  אֶֽל־  הַנְּחִילֹ֗ות  מִזְמֹ֥ור  לְדָוִֽד׃  אֲמָרַ֖י  הַאֲזִ֥ינָה  יְהוָ֗ה  בִּ֣ינָה  הֲגִֽיגִי׃  2   הַקְשִׁ֤יבָה  לְקֹ֬ול  שַׁוְעִ֗י  מַלְכִּ֥י  וֵאלֹהָ֑י  כִּֽי־  אֵ֝לֶ֗יךָ  אֶתְפַּלָּֽל׃  3   יְֽהוָ֗ה  בֹּ֖קֶר  תִּשְׁמַ֣ע  קֹולִ֑י  בֹּ֥קֶר  אֶֽעֱרָךְ־  לְ֝ךָ֗  וַאֲצַפֶּֽה׃ 


God favors not the wicked
4   כִּ֤י  לֹ֤א  אֵֽל־  חָפֵ֘ץ  רֶ֥שַׁע  אָ֑תָּה  לֹ֖א  יְגֻרְךָ֣  רָֽע׃  5   לֹֽא־  יִתְיַצְּב֣וּ  הֹֽ֭ולְלִים  לְנֶ֣גֶד  עֵינֶ֑יךָ  נֵ֗אתָ  כָּל־  פֹּ֥עֲלֵי  אָֽוֶן׃  6   תְּאַבֵּד֮  דֹּבְרֵ֪י  כָ֫זָ֥ב  אִישׁ־  דָּמִ֥ים  וּמִרְמָ֗ה  יְתָ֘עֵ֥ב  יְהוָֽה׃ 


David, professing his faith, prays to God to guide him
7   וַאֲנִ֗י  בְּרֹ֣ב  חַ֭סְדְּךָ  אָבֹ֣וא  בֵיתֶ֑ךָ  אֶשְׁתַּחֲוֶ֥ה  אֶל־  הֵֽיכַל־  קָ֝דְשְׁךָ֗  בְּיִרְאָתֶֽךָ׃  8   יְהוָ֤ה  נְחֵ֬נִי  בְצִדְקָתֶ֗ךָ  לְמַ֥עַן  שֹׁורְרָ֑י  [הֹושַׁר  כ]  (הַיְשַׁ֖ר  ק)  לְפָנַ֣י  דַּרְכֶּֽךָ׃  9   כִּ֤י  אֵ֪ין  בְּפִ֡יהוּ  נְכֹונָה֮  קִרְבָּ֪ם  הַ֫וֹּ֥ות  קֶֽבֶר־  פָּת֥וּחַ  גְּרֹונָ֑ם  לְ֝שֹׁונָ֗ם  יַחֲלִֽיקוּן׃ 


to destroy his enemies
10   הַֽאֲשִׁימֵ֨ם  אֱ‍ֽלֹהִ֗ים  יִפְּלוּ֮  מִֽמֹּעֲצֹ֪ותֵ֫יהֶ֥ם  בְּרֹ֣ב  פִּ֭שְׁעֵיהֶם  הַדִּיחֵ֑מֹו  כִּי־  מָ֥רוּ  בָֽךְ׃ 


and to preserve the godly
11   וְיִשְׂמְח֨וּ  כָל־  חֹ֪וסֵי  בָ֡ךְ  לְעֹולָ֣ם  יְ֭רַנֵּנוּ  וְתָסֵ֣ךְ  עָלֵ֑ימֹו  וְֽיַעְלְצ֥וּ  בְ֝ךָ֗  אֹהֲבֵ֥י  שְׁמֶֽךָ׃  12   כִּֽי־  אַתָּה֮  תְּבָרֵ֪ךְ  צַ֫דִּ֥יק  יְהוָ֑ה  כַּ֝צִּנָּ֗ה  רָצֹ֥ון  תַּעְטְרֶֽנּוּ׃ 
<< Psalm 5 >>
Biblos Greek and Hebrew Study Bible © 2010 Biblos.com
Online Parallel Bible