<< Psalms 36 HEB >>


The grievous state of the wicked
1   לַמְנַצֵּ֬חַ  לְעֶֽבֶד־  יְהוָ֬ה  לְדָוִֽד׃  נְאֻֽם־  פֶּ֣שַׁע  לָ֭רָשָׁע  בְּקֶ֣רֶב  לִבִּ֑י  אֵֽין־  פַּ֥חַד  אֱ֝לֹהִ֗ים  לְנֶ֣גֶד  עֵינָֽיו׃  2   כִּֽי־  הֶחֱלִ֣יק  אֵלָ֣יו  בְּעֵינָ֑יו  לִמְצֹ֖א  עֲוֹנֹ֣ו  לִשְׂנֹֽא׃  3   דִּבְרֵי־  פִ֭יו  אָ֣וֶן  וּמִרְמָ֑ה  חָדַ֖ל  לְהַשְׂכִּ֣יל  לְהֵיטִֽיב׃  4   אָ֤וֶן  יַחְשֹׁ֗ב  עַֽל־  מִשְׁכָּ֫בֹ֥ו  יִ֭תְיַצֵּב  עַל־  דֶּ֣רֶךְ  לֹא־  טֹ֑וב  רָ֝֗ע  לֹ֣א  יִמְאָֽס׃  5   יְ֭הוָה  בְּהַשָּׁמַ֣יִם  חַסְדֶּ֑ךָ  אֱ֝מֽוּנָתְךָ֗  עַד־  שְׁחָקִֽים׃  6   צִדְקָֽתְךָ֨  כְּֽהַרְרֵי־  אֵ֗ל  מִ֭שְׁפָּטֶךָ  תְּהֹ֣ום  רַבָּ֑ה  אָ֤דָֽם־  וּבְהֵמָ֖ה  תֹושִׁ֣יעַ  יְהוָֽה׃  7   מַה־  יָּקָ֥ר  חַסְדְּךָ֗  אֱלֹ֫הִ֥ים  וּבְנֵ֥י  אָדָ֑ם  בְּצֵ֥ל  כְּ֝נָפֶ֗יךָ  יֶחֱסָיֽוּן׃ 


The excellence of God's mercy
8   יִ֭רְוְיֻן  מִדֶּ֣שֶׁן  בֵּיתֶ֑ךָ  וְנַ֖חַל  עֲדָנֶ֣יךָ  תַשְׁקֵֽם׃  9   כִּֽי־  עִ֭מְּךָ  מְקֹ֣ור  חַיִּ֑ים  בְּ֝אֹורְךָ֗  נִרְאֶה־  אֹֽור׃ 


David prays for favor to God's children
10   מְשֹׁ֣ךְ  חַ֭סְדְּךָ  לְיֹדְעֶ֑יךָ  וְ֝צִדְקָֽתְךָ֗  לְיִשְׁרֵי־  לֵֽב׃  11   אַל־  תְּ֭בֹואֵנִי  רֶ֣גֶל  גַּאֲוָ֑ה  וְיַד־  רְ֝שָׁעִ֗ים  אַל־  תְּנִדֵֽנִי׃  12   שָׁ֣ם  נָ֭פְלוּ  פֹּ֣עֲלֵי  אָ֑וֶן  דֹּ֝ח֗וּ  וְלֹא־  יָ֥כְלוּ  קֽוּם׃ 
<< Psalm 36 >>
Biblos Greek and Hebrew Study Bible © 2010 Biblos.com
Online Parallel Bible