<< Psalms 25 HEB >>


David's confidence in prayer
1   לְדָוִ֡ד  אֵלֶ֥יךָ  יְ֝הוָ֗ה  נַפְשִׁ֥י  אֶשָּֽׂא׃  2   אֱ‍ֽלֹהַ֗י  בְּךָ֣  בָ֭טַחְתִּי  אַל־  אֵבֹ֑ושָׁה  אַל־  יַֽעַלְצ֖וּ  אֹיְבַ֣י  לִֽי׃  3   גַּ֣ם  כָּל־  קֹ֭וֶיךָ  לֹ֣א  יֵבֹ֑שׁוּ  יֵ֝בֹ֗שׁוּ  הַבֹּוגְדִ֥ים  רֵיקָֽם׃  4   דְּרָכֶ֣יךָ  יְ֭הוָה  הֹודִיעֵ֑נִי  אֹ֖רְחֹותֶ֣יךָ  לַמְּדֵֽנִי׃  5   הַדְרִ֘יכֵ֤נִי  בַאֲמִתֶּ֨ךָ  וְֽלַמְּדֵ֗נִי  כִּֽי־  אַ֭תָּה  אֱלֹהֵ֣י  יִשְׁעִ֑י  אֹותְךָ֥  קִ֝וִּ֗יתִי  כָּל־  הַיֹּֽום׃  6   זְכֹר־  רַחֲמֶ֣יךָ  יְ֭הוָה  וַחֲסָדֶ֑יךָ  כִּ֖י  מֵעֹולָ֣ם  הֵֽמָּה׃ 


He prays for remission of sins
7   חַטֹּ֤אות  נְעוּרַ֨י  וּפְשָׁעַ֗י  אַל־  תִּ֫זְכֹּ֥ר  כְּחַסְדְּךָ֥  זְכָר־  לִי־  אַ֑תָּה  לְמַ֖עַן  טוּבְךָ֣  יְהוָֽה׃  8   טֹוב־  וְיָשָׁ֥ר  יְהוָ֑ה  עַל־  כֵּ֤ן  יֹורֶ֖ה  חַטָּאִ֣ים  בַּדָּֽרֶךְ׃  9   יַדְרֵ֣ךְ  עֲ֭נָוִים  בַּמִּשְׁפָּ֑ט  וִֽילַמֵּ֖ד  עֲנָוִ֣ים  דַּרְכֹּֽו׃  10   כָּל־  אָרְחֹ֣ות  יְ֭הוָה  חֶ֣סֶד  וֶאֱמֶ֑ת  לְנֹצְרֵ֥י  בְ֝רִיתֹ֗ו  וְעֵדֹתָֽיו׃  11   לְמַֽעַן־  שִׁמְךָ֥  יְהוָ֑ה  וְֽסָלַחְתָּ֥  לַ֝עֲוֹנִ֗י  כִּ֣י  רַב־  הֽוּא׃  12   מִי־  זֶ֣ה  הָ֭אִישׁ  יְרֵ֣א  יְהוָ֑ה  יֹ֝ורֶ֗נּוּ  בְּדֶ֣רֶךְ  יִבְחָֽר׃  13   נַ֭פְשֹׁו  בְּטֹ֣וב  תָּלִ֑ין  וְ֝זַרְעֹ֗ו  יִ֣ירַשׁ  אָֽרֶץ׃  14   סֹ֣וד  יְ֭הוָה  לִירֵאָ֑יו  וּ֝בְרִיתֹ֗ו  לְהֹודִיעָֽם׃  15   עֵינַ֣י  תָּ֭מִיד  אֶל־  יְהוָ֑ה  כִּ֤י  הֽוּא־  יֹוצִ֖יא  מֵרֶ֣שֶׁת  רַגְלָֽי׃ 


and for help in affliction
16   פְּנֵה־  אֵלַ֥י  וְחָנֵּ֑נִי  כִּֽי־  יָחִ֖יד  וְעָנִ֣י  אָֽנִי׃  17   צָרֹ֣ות  לְבָבִ֣י  הִרְחִ֑יבוּ  מִ֝מְּצֽוּקֹותַ֗י  הֹוצִיאֵֽנִי׃  18   רְאֵ֣ה  עָ֭נְיִי  וַעֲמָלִ֑י  וְ֝שָׂ֗א  לְכָל־  חַטֹּאותָֽי׃  19   רְאֵֽה־  אֹויְבַ֥י  כִּי־  רָ֑בּוּ  וְשִׂנְאַ֖ת  חָמָ֣ס  שְׂנֵאֽוּנִי׃  20   שָׁמְרָ֣ה  נַ֭פְשִׁי  וְהַצִּילֵ֑נִי  אַל־  אֵ֝בֹ֗ושׁ  כִּֽי־  חָסִ֥יתִי  בָֽךְ׃  21   תֹּם־  וָיֹ֥שֶׁר  יִצְּר֑וּנִי  כִּ֝֗י  קִוִּיתִֽיךָ׃  22   פְּדֵ֣ה  אֱ֭לֹהִים  אֶת־  יִשְׂרָאֵ֑ל  מִ֝כֹּ֗ל  צָֽרֹותָיו 
<< Psalm 25 >>
Biblos Greek and Hebrew Study Bible © 2010 Biblos.com
Online Parallel Bible