<< Psalms 20 HEB >>


The church blesses the King in his exploits
1   לַמְנַצֵּ֗חַ  מִזְמֹ֥ור  לְדָוִֽד׃  יַֽעַנְךָ֣  יְ֭הוָה  בְּיֹ֣ום  צָרָ֑ה  יְ֝שַׂגֶּבְךָ֗  שֵׁ֤ם  אֱלֹהֵ֬י  יַעֲקֹֽב׃  2   יִשְׁלַֽח־  עֶזְרְךָ֥  מִקֹּ֑דֶשׁ  וּ֝מִצִּיֹּ֗ון  יִסְעָדֶֽךָּ׃  3   יִזְכֹּ֥ר  כָּל־  מִנְחֹתֶ֑ךָ  וְעֹולָתְךָ֖  יְדַשְּׁנֶ֣ה  סֶֽלָה׃  4   יִֽתֶּן־  לְךָ֥  כִלְבָבֶ֑ךָ  וְֽכָל־  עֲצָתְךָ֥  יְמַלֵּֽא׃  5   נְרַנְּנָ֤ה  בִּ֘ישׁ֤וּעָתֶ֗ךָ  וּבְשֵֽׁם־  אֱלֹהֵ֥ינוּ  נִדְגֹּ֑ל  יְמַלֵּ֥א  יְ֝הוָ֗ה  כָּל־  מִשְׁאֲלֹותֶֽיךָ׃  6   עַתָּ֤ה  יָדַ֗עְתִּי  כִּ֤י  הֹושִׁ֥יעַ  יְהוָ֗ה  מְשִׁ֫יחֹ֥ו  יַ֭עֲנֵהוּ  מִשְּׁמֵ֣י  קָדְשֹׁ֑ו  בִּ֝גְבֻרֹ֗ות  יֵ֣שַׁע  יְמִינֹֽו׃ 


and expresses her confidence in God's helpfulness
7   אֵ֣לֶּה  בָ֭רֶכֶב  וְאֵ֣לֶּה  בַסּוּסִ֑ים  וַאֲנַ֓חְנוּ  בְּשֵׁם־  יְהוָ֖ה  אֱלֹהֵ֣ינוּ  נַזְכִּֽיר׃  8   הֵ֭מָּה  כָּרְע֣וּ  וְנָפָ֑לוּ  וַאֲנַ֥חְנוּ  קַּ֝֗מְנוּ  וַנִּתְעֹודָֽד׃  9   יְהוָ֥ה  הֹושִׁ֑יעָה  הַ֝מֶּ֗לֶךְ  יַעֲנֵ֥נוּ  בְיֹום־  קָרְאֵֽנוּ׃ 
<< Psalm 20 >>
Biblos Greek and Hebrew Study Bible © 2010 Biblos.com
Online Parallel Bible