<< Proverbs 6 HEB >>


against indebtedness
1   בְּ֭נִי  אִם־  עָרַ֣בְתָּ  לְרֵעֶ֑ךָ  תָּקַ֖עְתָּ  לַזָּ֣ר  כַּפֶּֽיךָ׃  2   נֹוקַ֥שְׁתָּ  בְאִמְרֵי־  פִ֑יךָ  נִ֝לְכַּ֗דְתָּ  בְּאִמְרֵי־  פִֽיךָ׃  3   עֲשֵׂ֨ה  זֹ֥את  אֵפֹ֪וא  בְּנִ֡י  וְֽהִנָּצֵ֗ל  כִּ֘י  בָ֤אתָ  בְכַף־  רֵעֶ֑ךָ  לֵ֥ךְ  הִ֝תְרַפֵּ֗ס  וּרְהַ֥ב  רֵעֶֽיךָ׃  4   אַל־  תִּתֵּ֣ן  שֵׁנָ֣ה  לְעֵינֶ֑יךָ  וּ֝תְנוּמָ֗ה  לְעַפְעַפֶּֽיךָ׃  5   הִ֭נָּצֵל  כִּצְבִ֣י  מִיָּ֑ד  וּ֝כְצִפֹּ֗ור  מִיַּ֥ד  יָקֽוּשׁ׃  פ  לֵֽךְ־  אֶל־ 


idleness
6   נְמָלָ֥ה  עָצֵ֑ל  רְאֵ֖ה  דְרָכֶ֣יהָ  וַחֲכָֽם׃  7   אֲשֶׁ֖ר  אֵֽין־  לָ֥הּ  קָצִ֗ין  שֹׁטֵ֥ר  וּמֹשֵֽׁל׃  8   תָּכִ֣ין  בַּקַּ֣יִץ  לַחְמָ֑הּ  אָגְרָ֥ה  בַ֝קָּצִ֗יר  מַאֲכָלָֽהּ׃  9   עַד־  מָתַ֖י  עָצֵ֥ל  תִּשְׁכָּ֑ב  מָ֝תַ֗י  תָּק֥וּם  מִשְּׁנָתֶֽךָ׃  10   מְעַ֣ט  נֹות  מְעַ֣ט  תְּנוּמֹ֑ות  מְעַ֓ט  חִבֻּ֖ק  יָדַ֣יִם  לִשְׁכָּֽב׃  11   וּבָֽא־  כִמְהַלֵּ֥ךְ  רֵאשֶׁ֑ךָ  וּ֝מַחְסֹֽרְךָ֗  כְּאִ֣ישׁ  מָגֵֽן׃  פ 


and mischievousness
12   אָדָ֣ם  בְּ֭לִיַּעַל  אִ֣ישׁ  אָ֑וֶן  הֹ֝ולֵ֗ךְ  עִקְּשׁ֥וּת  פֶּֽה׃  13   קֹרֵ֣ץ  בְּ֭עֵינָיו  מֹלֵ֣ל  בְּרַגְלָ֑ו  מֹ֝רֶ֗ה  בְּאֶצְבְּעֹתָֽיו׃  14   תַּֽהְפֻּכֹ֨ות  בְּלִבֹּ֗ו  חֹרֵ֣שׁ  רָ֣ע  בְּכָל־  עֵ֑ת  [מְדָנִים  כ]  (מִדְיָנִ֥ים  ק)  יְשַׁלֵּֽחַ׃  15   עַל־  כֵּ֗ן  פִּ֭תְאֹם  יָבֹ֣וא  אֵידֹ֑ו  פֶּ֥תַע  יִ֝שָּׁבֵ֗ר  וְאֵ֣ין  מַרְפֵּֽא׃  פ 


seven things detestable to God
16   שֶׁשׁ־  הֵ֭נָּה  שָׂנֵ֣א  יְהוָ֑ה  וְ֝שֶׁ֗בַע  [תֹּועֲבֹות  כ]  (תֹּועֲבַ֥ת  ק)  נַפְשֹֽׁו׃  17   עֵינַ֣יִם  רָ֭מֹות  לְשֹׁ֣ון  שָׁ֑קֶר  וְ֝יָדַ֗יִם  שֹׁפְכֹ֥ות  דָּם־  נָקִֽי׃  18   לֵ֗ב  חֹ֭רֵשׁ  מַחְשְׁבֹ֣ות  אָ֑וֶן  רַגְלַ֥יִם  מְ֝מַהֲרֹ֗ות  לָר֥וּץ  לָֽרָעָה׃  19   יָפִ֣יחַ  כְּ֭זָבִים  עֵ֣ד  שָׁ֑קֶר  וּמְשַׁלֵּ֥חַ  מְ֝דָנִ֗ים  בֵּ֣ין  אַחִֽים׃  פ 


the blessings of obedience
20   נְצֹ֣ר  בְּ֭נִי  מִצְוַ֣ת  אָבִ֑יךָ  וְאַל־  תִּ֝טֹּ֗שׁ  תֹּורַ֥ת  אִמֶּֽךָ׃  21   קָשְׁרֵ֣ם  עַל־  לִבְּךָ֣  תָמִ֑יד  עָ֝נְדֵ֗ם  עַל־  גַּרְגְּרֹתֶֽךָ׃  22   בְּהִתְהַלֶּכְךָ֨  תַּנְחֶ֬ה  אֹתָ֗ךְ  בְּֽ֭שָׁכְבְּךָ  תִּשְׁמֹ֣ר  עָלֶ֑יךָ  וַ֝הֲקִיצֹ֗ותָ  הִ֣יא  תְשִׂיחֶֽךָ׃  23   כִּ֤י  נֵ֣ר  מִ֭צְוָה  וְתֹ֣ורָה  אֹ֑ור  וְדֶ֥רֶךְ  חַ֝יִּ֗ים  תֹּוכְחֹ֥ות  מוּסָֽר׃  24   לִ֭שְׁמָרְךָ  מֵאֵ֣שֶׁת  רָ֑ע  מֵֽ֝חֶלְקַ֗ת  לָשֹׁ֥ון  נָכְרִיָּֽה׃ 


the mischief of unfaithfulness
25   אַל־  תַּחְמֹ֣ד  יָ֭פְיָהּ  בִּלְבָבֶ֑ךָ  וְאַל־  תִּ֝קָּֽחֲךָ֗  בְּעַפְעַפֶּֽיהָ׃  26   כִּ֤י  בְעַד־  אִשָּׁ֥ה  זֹונָ֗ה  עַֽד־  כִּכַּ֫ר  לָ֥חֶם  וְאֵ֥שֶׁת  אִ֑ישׁ  נֶ֖פֶשׁ  יְקָרָ֣ה  תָצֽוּד׃  פ  27   הֲיַחְתֶּ֤ה  אִ֓ישׁ  אֵ֬שׁ  בְּחֵיקֹ֑ו  וּ֝בְגָדָ֗יו  לֹ֣א  תִשָּׂרַֽפְנָה׃  28   אִם־  יְהַלֵּ֣ךְ  אִ֭ישׁ  עַל־  הַגֶּחָלִ֑ים  וְ֝רַגְלָ֗יו  לֹ֣א  תִכָּוֶֽינָה׃  29   כֵּ֗ן  הַ֭בָּא  אֶל־  אֵ֣שֶׁת  רֵעֵ֑הוּ  לֹ֥א  יִ֝נָּקֶ֗ה  כָּֽל־  הַנֹּגֵ֥עַ  בָּֽהּ׃  30   לֹא־  יָב֣וּזוּ  לַ֭גַּנָּב  כִּ֣י  יִגְנֹ֑וב  לְמַלֵּ֥א  נַ֝פְשֹׁ֗ו  כִּ֣י  יִרְעָֽב׃  31   וְ֭נִמְצָא  יְשַׁלֵּ֣ם  שִׁבְעָתָ֑יִם  אֶת־  כָּל־  הֹ֖ון  בֵּיתֹ֣ו  יִתֵּֽן׃  32   נֹאֵ֣ף  אִשָּׁ֣ה  חֲסַר־  לֵ֑ב  מַֽשְׁחִ֥ית  נַ֝פְשֹׁ֗ו  ה֣וּא  יַעֲשֶֽׂנָּה׃  33   נֶֽגַע־  וְקָלֹ֥ון  יִמְצָ֑א  וְ֝חֶרְפָּתֹ֗ו  לֹ֣א  תִמָּחֶֽה׃  34   כִּֽי־  קִנְאָ֥ה  חֲמַת־  גָּ֑בֶר  וְלֹֽא־  יַ֝חְמֹ֗ול  בְּיֹ֣ום  נָקָֽם׃  35   לֹא־  יִ֭שָּׂא  פְּנֵ֣י  כָל־  כֹּ֑פֶר  וְלֹֽא־  יֹ֝אבֶ֗ה  כִּ֣י  תַרְבֶּה־  שֹֽׁחַד׃  פ 
<< Proverbs 6 >>
Biblos Greek and Hebrew Study Bible © 2010 Biblos.com
Online Parallel Bible