<< Numbers 10 HEB >>


The use of the silver trumpets
1   וַיְדַבֵּ֥ר  יְהוָ֖ה  אֶל־  מֹשֶׁ֥ה  לֵּאמֹֽר׃  2   עֲשֵׂ֣ה  לְךָ֗  שְׁתֵּי֙  חֲצֹֽוצְרֹ֣ת  כֶּ֔סֶף  מִקְשָׁ֖ה  תַּעֲשֶׂ֣ה  אֹתָ֑ם  וְהָי֤וּ  לְךָ֙  לְמִקְרָ֣א  הָֽעֵדָ֔ה  וּלְמַסַּ֖ע  אֶת־  הַֽמַּחֲנֹֽות׃  3   וְתָקְע֖וּ  בָּהֵ֑ן  וְנֹֽועֲד֤וּ  אֵלֶ֙יךָ֙  כָּל־  הָ֣עֵדָ֔ה  אֶל־  פֶּ֖תַח  אֹ֥הֶל  מֹועֵֽד׃  4   וְאִם־  בְּאַחַ֖ת  יִתְקָ֑עוּ  וְנֹועֲד֤וּ  אֵלֶ֙יךָ֙  הַנְּשִׂיאִ֔ים  רָאשֵׁ֖י  אַלְפֵ֥י  יִשְׂרָאֵֽל׃  5   וּתְקַעְתֶּ֖ם  תְּרוּעָ֑ה  וְנָֽסְעוּ֙  הַֽמַּחֲנֹ֔ות  הַחֹנִ֖ים  קֵֽדְמָה׃  6   וּתְקַעְתֶּ֤ם  תְּרוּעָה֙  שֵׁנִ֔ית  וְנָֽסְעוּ֙  הַֽמַּחֲנֹ֔ות  הַחֹנִ֖ים  תֵּימָ֑נָה  תְּרוּעָ֥ה  יִתְקְע֖וּ  לְמַסְעֵיהֶֽם׃  7   וּבְהַקְהִ֖יל  אֶת־  הַקָּהָ֑ל  תִּתְקְע֖וּ  וְלֹ֥א  תָרִֽיעוּ׃  8   וּבְנֵ֤י  אַהֲרֹן֙  הַכֹּ֣הֲנִ֔ים  יִתְקְע֖וּ  בַּֽחֲצֹצְרֹ֑ות  וְהָי֥וּ  לָכֶ֛ם  לְחֻקַּ֥ת  עֹולָ֖ם  לְדֹרֹתֵיכֶֽם׃  9   וְכִֽי־  תָבֹ֨אוּ  מִלְחָמָ֜ה  בְּאַרְצְכֶ֗ם  עַל־  הַצַּר֙  הַצֹּרֵ֣ר  אֶתְכֶ֔ם  וַהֲרֵעֹתֶ֖ם  בַּחֲצֹצְרֹ֑ות  וֲנִזְכַּרְתֶּ֗ם  לִפְנֵי֙  יְהוָ֣ה  אֱלֹֽהֵיכֶ֔ם  וְנֹושַׁעְתֶּ֖ם  מֵאֹיְבֵיכֶֽם׃  10   וּבְיֹ֨ום  שִׂמְחַתְכֶ֥ם  וּֽבְמֹועֲדֵיכֶם֮  וּבְרָאשֵׁ֣י  חָדְשֵׁיכֶם֒  וּתְקַעְתֶּ֣ם  בַּחֲצֹֽצְרֹ֗ת  עַ֚ל  עֹלֹ֣תֵיכֶ֔ם  וְעַ֖ל  זִבְחֵ֣י  שַׁלְמֵיכֶ֑ם  וְהָי֨וּ  לָכֶ֤ם  לְזִכָּרֹון֙  לִפְנֵ֣י  אֱלֹֽהֵיכֶ֔ם  אֲנִ֖י  יְהוָ֥ה  אֱלֹהֵיכֶֽם׃  פ 


The Israelites move from Sinai to Paran
11   וַיְהִ֞י  בַּשָּׁנָ֧ה  הַשֵּׁנִ֛ית  בַּחֹ֥דֶשׁ  הַשֵּׁנִ֖י  בְּעֶשְׂרִ֣ים  בַּחֹ֑דֶשׁ  נַעֲלָה֙  הֶֽעָנָ֔ן  מֵעַ֖ל  מִשְׁכַּ֥ן  הָעֵדֻֽת׃  12   וַיִּסְע֧וּ  בְנֵֽי־  יִשְׂרָאֵ֛ל  לְמַסְעֵיהֶ֖ם  מִמִּדְבַּ֣ר  סִינָ֑י  וַיִּשְׁכֹּ֥ן  הֶעָנָ֖ן  בְּמִדְבַּ֥ר  פָּארָֽן׃  13   וַיִּסְע֖וּ  בָּרִאשֹׁנָ֑ה  עַל־  פִּ֥י  יְהוָ֖ה  בְּיַד־  מֹשֶֽׁה׃ 


The order of their march
14   וַיִּסַּ֞ע  דֶּ֣גֶל  מַחֲנֵ֧ה  בְנֵֽי־  יְהוּדָ֛ה  בָּרִאשֹׁנָ֖ה  לְצִבְאֹתָ֑ם  וְעַל־  צְבָאֹ֔ו  נַחְשֹׁ֖ון  בֶּן־  עַמִּינָדָֽב׃  15   וְעַ֨ל־  צְבָ֔א  מַטֵּ֖ה  בְּנֵ֣י  יִשָׂשכָ֑ר  נְתַנְאֵ֖ל  בֶּן־  צוּעָֽר׃  16   וְעַ֨ל־  צְבָ֔א  מַטֵּ֖ה  בְּנֵ֣י  זְבוּלֻ֑ן  אֱלִיאָ֖ב  בֶּן־  חֵלֹֽון׃  17   וְהוּרַ֖ד  הַמִּשְׁכָּ֑ן  וְנָסְע֤וּ  בְנֵֽי־  גֵרְשֹׁון֙  וּבְנֵ֣י  מְרָרִ֔י  נֹשְׂאֵ֖י  הַמִּשְׁכָּֽן׃  ס  18   וְנָסַ֗ע  דֶּ֛גֶל  מַחֲנֵ֥ה  רְאוּבֵ֖ן  לְצִבְאֹתָ֑ם  וְעַל־  צְבָאֹ֔ו  אֱלִיצ֖וּר  בֶּן־  שְׁדֵיאֽוּר׃  19   וְעַ֨ל־  צְבָ֔א  מַטֵּ֖ה  בְּנֵ֣י  שִׁמְעֹ֑ון  שְׁלֻֽמִיאֵ֖ל  בֶּן־  צוּרִֽי  שַׁדָּֽי׃  20   וְעַל־  צְבָ֖א  מַטֵּ֣ה  בְנֵי־  גָ֑ד  אֶלְיָסָ֖ף  בֶּן־  דְּעוּאֵֽל׃  21   וְנָסְעוּ֙  הַקְּהָתִ֔ים  נֹשְׂאֵ֖י  הַמִּקְדָּ֑שׁ  וְהֵקִ֥ימוּ  אֶת־  הַמִּשְׁכָּ֖ן  עַד־  בֹּאָֽם׃  ס  22   וְנָסַ֗ע  דֶּ֛גֶל  מַחֲנֵ֥ה  בְנֵֽי־  אֶפְרַ֖יִם  לְצִבְאֹתָ֑ם  וְעַל־  צְבָאֹ֔ו  אֱלִישָׁמָ֖ע  בֶּן־  עַמִּיהֽוּד׃  23   וְעַ֨ל־  צְבָ֔א  מַטֵּ֖ה  בְּנֵ֣י  מְנַשֶּׁ֑ה  גַּמְלִיאֵ֖ל  בֶּן־  פְּדָה־  צֽוּר  24   וְעַ֨ל־  צְבָ֔א  מַטֵּ֖ה  בְּנֵ֣י  בִנְיָמִ֑ן  אֲבִידָ֖ן  בֶּן־  גִּדְעֹונִֽי׃  ס  25   וְנָסַ֗ע  דֶּ֚גֶל  מַחֲנֵ֣ה  בְנֵי־  דָ֔ן  מְאַסֵּ֥ף  לְכָל־  הַֽמַּחֲנֹ֖ת  לְצִבְאֹתָ֑ם  וְעַל־  צְבָאֹ֔ו  אֲחִיעֶ֖זֶר  בֶּן־  עַמִּישַׁדָּֽי  26   וְעַל־  צְבָ֔א  מַטֵּ֖ה  בְּנֵ֣י  אָשֵׁ֑ר  פַּגְעִיאֵ֖ל  בֶּן־  עָכְרָֽן׃  27   וְעַ֨ל־  צְבָ֔א  מַטֵּ֖ה  בְּנֵ֣י  נַפְתָּלִ֑י  אֲחִירַ֖ע  בֶּן־  עֵינָֽן׃  28   אֵ֛לֶּה  מַסְעֵ֥י  בְנֵֽי־  יִשְׂרָאֵ֖ל  לְצִבְאֹתָ֑ם  וַיִּסָּֽעוּ׃  ס 


Hobab is entreated by Moses not to leave them
29   וַיֹּ֣אמֶר  מֹשֶׁ֗ה  לְ֠חֹבָב  בֶּן־  רְעוּאֵ֣ל  הַמִּדְיָנִי֮  חֹתֵ֣ן  מֹשֶׁה֒  נֹסְעִ֣ים  אֲנַ֗חְנוּ  אֶל־  הַמָּקֹום֙  אֲשֶׁ֣ר  אָמַ֣ר  יְהוָ֔ה  אֹתֹ֖ו  אֶתֵּ֣ן  לָכֶ֑ם  לְכָ֤ה  אִתָּ֙נוּ֙  וְהֵטַ֣בְנוּ  לָ֔ךְ  כִּֽי־  יְהוָ֥ה  דִּבֶּר־  טֹ֖וב  עַל־  יִשְׂרָאֵֽל׃  30   וַיֹּ֥אמֶר  אֵלָ֖יו  לֹ֣א  אֵלֵ֑ךְ  כִּ֧י  אִם־  אֶל־  אַרְצִ֛י  וְאֶל־  מֹולַדְתִּ֖י  אֵלֵֽךְ׃  31   וַיֹּ֕אמֶר  אַל־  נָ֖א  תַּעֲזֹ֣ב  אֹתָ֑נוּ  כִּ֣י  עַל־  כֵּ֣ן  יָדַ֗עְתָּ  חֲנֹתֵ֙נוּ֙  בַּמִּדְבָּ֔ר  וְהָיִ֥יתָ  לָּ֖נוּ  לְעֵינָֽיִם׃  32   וְהָיָ֖ה  כִּי־  תֵלֵ֣ךְ  עִמָּ֑נוּ  וְהָיָ֣ה  הַטֹּ֣וב  הַה֗וּא  אֲשֶׁ֨ר  יֵיטִ֧יב  יְהוָ֛ה  עִמָּ֖נוּ  וְהֵטַ֥בְנוּ  לָֽךְ׃ 


The blessing of Moses at the removing and resting of the ark
33   וַיִּסְעוּ֙  מֵהַ֣ר  יְהוָ֔ה  דֶּ֖רֶךְ  שְׁלֹ֣שֶׁת  יָמִ֑ים  וַאֲרֹ֨ון  בְּרִית־  יְהוָ֜ה  נֹסֵ֣עַ  לִפְנֵיהֶ֗ם  דֶּ֚רֶךְ  שְׁלֹ֣שֶׁת  יָמִ֔ים  לָת֥וּר  לָהֶ֖ם  מְנוּחָֽה׃  34   וַעֲנַ֧ן  יְהוָ֛ה  עֲלֵיהֶ֖ם  יֹומָ֑ם  בְּנָסְעָ֖ם  מִן־  הַֽמַּחֲנֶֽה׃    ס  35   וַיְהִ֛י  בִּנְסֹ֥עַ  הָאָרֹ֖ן  וַיֹּ֣אמֶר  מֹשֶׁ֑ה  קוּמָ֣ה  יְהוָ֗ה  וְיָפֻ֙צוּ֙  אֹֽיְבֶ֔יךָ  וְיָנֻ֥סוּ  מְשַׂנְאֶ֖יךָ  מִפָּנֶֽיךָ׃  36   וּבְנֻחֹ֖ה  יֹאמַ֑ר  שׁוּבָ֣ה  יְהוָ֔ה  רִֽבְבֹ֖ות  אַלְפֵ֥י  יִשְׂרָאֵֽל׃    פ 
<< Numbers 10 >>
Biblos Greek and Hebrew Study Bible © 2010 Biblos.com
Online Parallel Bible