<< Jonah 2 HEB >>


The prayer of Jonah.
1   וַיִּתְפַּלֵּ֣ל  יֹונָ֔ה  אֶל־  יְהוָ֖ה  אֱלֹהָ֑יו  מִמְּעֵ֖י  הַדָּגָֽה׃  2   וַיֹּ֗אמֶר  קָ֠רָאתִי  מִצָּ֥רָה  לִ֛י  אֶל־  יְהוָ֖ה  וַֽיַּעֲנֵ֑נִי  מִבֶּ֧טֶן  שְׁאֹ֛ול  שִׁוַּ֖עְתִּי  שָׁמַ֥עְתָּ  קֹולִֽי׃  3   וַתַּשְׁלִיכֵ֤נִי  מְצוּלָה֙  בִּלְבַ֣ב  יַמִּ֔ים  וְנָהָ֖ר  יְסֹבְבֵ֑נִי  כָּל־  מִשְׁבָּרֶ֥יךָ  וְגַלֶּ֖יךָ  עָלַ֥י  עָבָֽרוּ׃  4   וַאֲנִ֣י  אָמַ֔רְתִּי  נִגְרַ֖שְׁתִּי  מִנֶּ֣גֶד  עֵינֶ֑יךָ  אַ֚ךְ  אֹוסִ֣יף  לְהַבִּ֔יט  אֶל־  הֵיכַ֖ל  קָדְשֶֽׁךָ׃  5   אֲפָפ֤וּנִי  מַ֙יִם֙  עַד־  נֶ֔פֶשׁ  תְּהֹ֖ום  יְסֹבְבֵ֑נִי  ס֖וּף  חָב֥וּשׁ  לְרֹאשִֽׁי׃  6   לְקִצְבֵ֤י  הָרִים֙  יָרַ֔דְתִּי  הָאָ֛רֶץ  בְּרִחֶ֥יהָ  בַעֲדִ֖י  לְעֹולָ֑ם  וַתַּ֧עַל  מִשַּׁ֛חַת  חַיַּ֖י  יְהוָ֥ה  אֱלֹהָֽי׃  7   בְּהִתְעַטֵּ֤ף  עָלַי֙  נַפְשִׁ֔י  אֶת־  יְהוָ֖ה  זָכָ֑רְתִּי  וַתָּבֹ֤וא  אֵלֶ֙יךָ֙  תְּפִלָּתִ֔י  אֶל־  הֵיכַ֖ל  קָדְשֶֽׁךָ׃  8   מְשַׁמְּרִ֖ים  הַבְלֵי־  שָׁ֑וְא  חַסְדָּ֖ם  יַעֲזֹֽבוּ׃  9   וַאֲנִ֗י  בְּקֹ֤ול  תֹּודָה֙  אֶזְבְּחָה־  לָּ֔ךְ  אֲשֶׁ֥ר  נָדַ֖רְתִּי  אֲשַׁלֵּ֑מָה  יְשׁוּעָ֖תָה  לַיהוָֽה׃  ס 


He is delivered out of the belly of the fish.
10   וַיֹּ֥אמֶר  יְהוָ֖ה  לַדָּ֑ג  וַיָּקֵ֥א  אֶת־  יֹונָ֖ה  אֶל־  הַיַּבָּשָֽׁה׃  פ 
<< Jonah 2 >>
Biblos Greek and Hebrew Study Bible © 2010 Biblos.com
Online Parallel Bible