<< Job 5 HEB >>


Eliphaz shows that the end of the wicked is misery;
1   קְֽרָא־  נָ֭א  הֲיֵ֣שׁ  עֹונֶ֑ךָּ  וְאֶל־  מִ֖י  מִקְּדֹשִׁ֣ים  תִּפְנֶֽה׃  2   כִּֽי־  לֶֽ֭אֱוִיל  יַהֲרָג־  כָּ֑עַשׂ  וּ֝פֹתֶ֗ה  תָּמִ֥ית  קִנְאָֽה׃  3   אֲ‍ֽנִי־  רָ֭אִיתִי  אֱוִ֣יל  מַשְׁרִ֑ישׁ  וָאֶקֹּ֖וב  נָוֵ֣הוּ  פִתְאֹֽם׃  4   יִרְחֲק֣וּ  בָנָ֣יו  מִיֶּ֑שַׁע  וְיִֽדַּכְּא֥וּ  בַ֝שַּׁ֗עַר  וְאֵ֣ין  מַצִּֽיל׃  5   אֲשֶׁ֤ר  קְצִירֹ֨ו  רָ֘עֵ֤ב  יֹאכֵ֗ל  וְאֶֽל־  מִצִּנִּ֥ים  יִקָּחֵ֑הוּ  וְשָׁאַ֖ף  צַמִּ֣ים  חֵילָֽם׃ 


that man is born to trouble;
6   כִּ֤י  לֹא־  יֵצֵ֣א  מֵעָפָ֣ר  אָ֑וֶן  וּ֝מֵאֲדָמָ֗ה  לֹא־  יִצְמַ֥ח  עָמָֽל׃  7   כִּֽי־  אָ֭דָם  לְעָמָ֣ל  יוּלָּ֑ד  וּבְנֵי־  רֶ֝֗שֶׁף  יַגְבִּ֥יהוּ  עֽוּף׃ 


that God is to be regarded in affliction;
8   אוּלָ֗ם  אֲ֭נִי  אֶדְרֹ֣שׁ  אֶל־  אֵ֑ל  וְאֶל־  אֱ֝לֹהִ֗ים  אָשִׂ֥ים  דִּבְרָתִֽי׃  9   עֹשֶׂ֣ה  גְ֭דֹלֹות  וְאֵ֣ין  חֵ֑קֶר  נִ֝פְלָאֹ֗ות  עַד־  אֵ֥ין  מִסְפָּֽר׃  10   הַנֹּתֵ֣ן  מָ֭טָר  עַל־  פְּנֵי־  אָ֑רֶץ  וְשֹׁ֥לֵֽחַ  מַ֝יִם  עַל־  פְּנֵ֥י  חוּצֹֽות׃  11   לָשׂ֣וּם  שְׁפָלִ֣ים  לְמָרֹ֑ום  וְ֝קֹדְרִ֗ים  שָׂ֣גְבוּ  יֶֽשַׁע׃  12   מֵ֭פֵר  מַחְשְׁבֹ֣ות  עֲרוּמִ֑ים  וְֽלֹא־  תַעֲשֶׂ֥ינָה  יְ֝דֵיהֶ֗ם  תּוּשִׁיָּֽה׃  13   לֹכֵ֣ד  חֲכָמִ֣ים  בְּעָרְמָ֑ם  וַעֲצַ֖ת  נִפְתָּלִ֣ים  נִמְהָֽרָה׃  14   יֹומָ֥ם  יְפַגְּשׁוּ־  חֹ֑שֶׁךְ  וְ֝כַלַּ֗יְלָה  יְֽמַשְׁשׁ֥וּ  בַֽצָּהֳרָֽיִם׃  15   וַיֹּ֣שַׁע  מֵ֭חֶרֶב  מִפִּיהֶ֑ם  וּמִיַּ֖ד  חָזָ֣ק  אֶבְיֹֽון׃  16   וַתְּהִ֣י  לַדַּ֣ל  תִּקְוָ֑ה  וְ֝עֹלָ֗תָה  קָ֣פְצָה  פִּֽיהָ׃ 


the happy end of God's correction.
17   הִנֵּ֤ה  אַשְׁרֵ֣י  אֱ֭נֹושׁ  יֹוכִחֶ֣נּֽוּ  אֱלֹ֑והַּ  וּמוּסַ֥ר  דַּ֗י  אַל־  תִּמְאָֽס׃  18   כִּ֤י  ה֣וּא  יַכְאִ֣יב  וְיֶחְבָּ֑שׁ  יִ֝מְחַ֗ץ  [וְיָדֹו  כ]  (וְיָדָ֥יו  ק)  תִּרְפֶּֽינָה׃  19   בְּשֵׁ֣שׁ  צָ֭רֹות  יַצִּילֶ֑ךָּ  וּבְשֶׁ֓בַע  לֹא־  יִגַּ֖ע  בְּךָ֣  רָֽע׃  20   בְּ֭רָעָב  פָּֽדְךָ֣  מִמָּ֑וֶת  וּ֝בְמִלְחָמָ֗ה  מִ֣ידֵי  חָֽרֶב׃  21   בְּשֹׁ֣וט  לָ֭שֹׁון  תֵּחָבֵ֑א  וְֽלֹא־  תִירָ֥א  מִ֝שֹּׁ֗ד  כִּ֣י  יָבֹֽוא׃  22   לְשֹׁ֣ד  וּלְכָפָ֣ן  תִּשְׂחָ֑ק  וּֽמֵחַיַּ֥ת  הָ֝אָ֗רֶץ  אַל־  תִּירָֽא׃  23   כִּ֤י  עִם־  אַבְנֵ֣י  הַשָּׂדֶ֣ה  בְרִיתֶ֑ךָ  וְחַיַּ֥ת  הַ֝שָּׂדֶ֗ה  הָשְׁלְמָה־  לָֽךְ׃  24   וְֽ֭יָדַעְתָּ  כִּי־  שָׁלֹ֣ום  אָהֳלֶ֑ךָ  וּֽפָקַדְתָּ֥  נָ֝וְךָ  וְלֹ֣א  תֶחֱטָֽא׃  25   וְֽ֭יָדַעְתָּ  כִּי־  רַ֣ב  זַרְעֶ֑ךָ  וְ֝צֶאֱצָאֶ֗יךָ  כְּעֵ֣שֶׂב  הָאָֽרֶץ׃  26   תָּבֹ֣וא  בְכֶ֣לַח  אֱלֵי־  קָ֑בֶר  כַּעֲלֹ֖ות  גָּדִ֣ישׁ  בְּעִתֹּֽו׃  27   הִנֵּה־  זֹ֭את  חֲקַרְנ֥וּהָ  כֶּֽן־  הִ֑יא  מָעֶ֗נָּה  וְאַתָּ֥ה  דַֽע־  לָֽךְ׃  פ 
<< Job 5 >>
Biblos Greek and Hebrew Study Bible © 2010 Biblos.com
Online Parallel Bible