<< Isaiah 50 HEB >>


Christ shows Israel's Sin is not to be imputed to him,
1   כֹּ֣ה  אָמַ֣ר  יְהוָ֗ה  אֵ֣י  זֶ֠ה  סֵ֣פֶר  כְּרִית֤וּת  אִמְּכֶם֙  אֲשֶׁ֣ר  שִׁלַּחְתִּ֔יהָ  אֹ֚ו  מִ֣י  מִנֹּושַׁ֔י  אֲשֶׁר־  מָכַ֥רְתִּי  אֶתְכֶ֖ם  לֹ֑ו  הֵ֤ן  בַּעֲוֹנֹֽתֵיכֶם֙  נִמְכַּרְתֶּ֔ם  וּבְפִשְׁעֵיכֶ֖ם  שֻׁלְּחָ֥ה  אִמְּכֶֽם׃ 


by his ability to save
2   מַדּ֨וּעַ  בָּ֜אתִי  וְאֵ֣ין  אִ֗ישׁ  קָרָֽאתִי֮  וְאֵ֣ין  עֹונֶה֒  הֲקָצֹ֨ור  קָצְרָ֤ה  יָדִי֙  מִפְּד֔וּת  וְאִם־  אֵֽין־  בִּ֥י  כֹ֖חַ  לְהַצִּ֑יל  הֵ֣ן  בְּגַעֲרָתִ֞י  אַחֲרִ֣יב  יָ֗ם  אָשִׂ֤ים  נְהָרֹות֙  מִדְבָּ֔ר  תִּבְאַ֤שׁ  דְּגָתָם֙  מֵאֵ֣ין  מַ֔יִם  וְתָמֹ֖ת  בַּצָּמָֽא׃  3   אַלְבִּ֥ישׁ  שָׁמַ֖יִם  קַדְר֑וּת  וְשַׂ֖ק  אָשִׂ֥ים  כְּסוּתָֽם׃  ס  4   אֲדֹנָ֣י  יְהֹוִ֗ה  נָ֤תַן  לִי֙  לְשֹׁ֣ון  לִמּוּדִ֔ים  לָדַ֛עַת  לָע֥וּת  אֶת־  יָעֵ֖ף  דָּבָ֑ר  יָעִ֣יר  בַּבֹּ֣קֶר  בַּבֹּ֗קֶר  יָעִ֥יר  לִי֙  אֹ֔זֶן  לִשְׁמֹ֖עַ  כַּלִּמּוּדִֽים׃ 


By his obedience in that work
5   אֲדֹנָ֤י  יְהוִה֙  פָּתַֽח־  לִ֣י  אֹ֔זֶן  וְאָנֹכִ֖י  לֹ֣א  מָרִ֑יתִי  אָחֹ֖ור  לֹ֥א  נְסוּגֹֽתִי׃  6   גֵּוִי֙  נָתַ֣תִּי  לְמַכִּ֔ים  וּלְחָיַ֖י  לְמֹֽרְטִ֑ים  פָּנַי֙  לֹ֣א  הִסְתַּ֔רְתִּי  מִכְּלִמֹּ֖ות  וָרֹֽק׃ 


And by his confidence in that assistance
7   וַאדֹנָ֤י  יְהוִה֙  יַֽעֲזָר־  לִ֔י  עַל־  כֵּ֖ן  לֹ֣א  נִכְלָ֑מְתִּי  עַל־  כֵּ֞ן  שַׂ֤מְתִּי  פָנַי֙  כַּֽחַלָּמִ֔ישׁ  וָאֵדַ֖ע  כִּי־  לֹ֥א  אֵבֹֽושׁ׃  8   קָרֹוב֙  מַצְדִּיקִ֔י  מִֽי־  יָרִ֥יב  אִתִּ֖י  נַ֣עַמְדָה  יָּ֑חַד  מִֽי־  בַ֥עַל  מִשְׁפָּטִ֖י  יִגַּ֥שׁ  אֵלָֽי׃  9   הֵ֣ן  אֲדֹנָ֤י  יְהוִה֙  יַֽעֲזָר־  לִ֔י  מִי־  ה֖וּא  יַרְשִׁיעֵ֑נִי  הֵ֤ן  כֻּלָּם֙  כַּבֶּ֣גֶד  יִבְל֔וּ  עָ֖שׁ  יֹאכְלֵֽם׃ 


An exhortation to trust in God, and not in ourselves
10   מִ֤י  בָכֶם֙  יְרֵ֣א  יְהוָ֔ה  שֹׁמֵ֖עַ  בְּקֹ֣ול  עַבְדֹּ֑ו  אֲשֶׁ֣ר  הָלַ֣ךְ  חֲשֵׁכִ֗ים  וְאֵ֥ין  נֹ֙גַהּ֙  לֹ֔ו  יִבְטַח֙  בְּשֵׁ֣ם  יְהוָ֔ה  וְיִשָּׁעֵ֖ן  בֵּאלֹהָֽיו׃  11   הֵ֧ן  כֻּלְּכֶ֛ם  קֹ֥דְחֵי  אֵ֖שׁ  מְאַזְּרֵ֣י  זִיקֹ֑ות  לְכ֣וּ  בְּא֣וּר  אֶשְׁכֶ֗ם  וּבְזִיקֹות֙  בִּֽעַרְתֶּ֔ם  מִיָּדִי֙  הָיְתָה־  זֹּ֣את  לָכֶ֔ם  לְמַעֲצֵבָ֖ה  תִּשְׁכָּבֽוּן׃  פ 
<< Isaiah 50 >>
Biblos Greek and Hebrew Study Bible © 2010 Biblos.com
Online Parallel Bible