<< Isaiah 16 HEB >>


Moab is exhorted to yield obedience to the throne of David
1   שִׁלְחוּ־  כַ֥ר  מֹשֵֽׁל־  אֶ֖רֶץ  מִסֶּ֣לַע  מִדְבָּ֑רָה  אֶל־  הַ֖ר  בַּת־  צִיֹּֽון׃  2   וְהָיָ֥ה  כְעֹוף־  נֹודֵ֖ד  קֵ֣ן  מְשֻׁלָּ֑ח  תִּֽהְיֶ֙ינָה֙  בְּנֹ֣ות  מֹואָ֔ב  מַעְבָּרֹ֖ת  לְאַרְנֹֽון׃  3   [הָבִיאוּ  כ]  (הָבִ֤יאִי  ק)  עֵצָה֙  עֲשׂ֣וּ  פְלִילָ֔ה  שִׁ֧יתִי  כַלַּ֛יִל  צִלֵּ֖ךְ  בְּתֹ֣וךְ  צָהֳרָ֑יִם  סַתְּרִי֙  נִדָּחִ֔ים  נֹדֵ֖ד  אַל־  תְּגַלִּֽי׃  4   יָג֤וּרוּ  בָךְ֙  נִדָּחַ֔י  מֹואָ֛ב  הֱוִי־  סֵ֥תֶר  לָ֖מֹו  מִפְּנֵ֣י  שֹׁודֵ֑ד  כִּֽי־  אָפֵ֤ס  הַמֵּץ֙  כָּ֣לָה  שֹׁ֔ד  תַּ֥מּוּ  רֹמֵ֖ס  מִן־  הָאָֽרֶץ׃  5   וְהוּכַ֤ן  בַּחֶ֙סֶד֙  כִּסֵּ֔א  וְיָשַׁ֥ב  עָלָ֛יו  בֶּאֱמֶ֖ת  בְּאֹ֣הֶל  דָּוִ֑ד  שֹׁפֵ֛ט  וְדֹרֵ֥שׁ  מִשְׁפָּ֖ט  וּמְהִ֥ר  צֶֽדֶק׃ 


Moab is threatened for her pride
6   שָׁמַ֥עְנוּ  גְאֹון־  מֹואָ֖ב  גֵּ֣א  מְאֹ֑ד  גַּאֲוָתֹ֧ו  וּגְאֹונֹ֛ו  וְעֶבְרָתֹ֖ו  לֹא־  כֵ֥ן  בַּדָּֽיו׃  ס  7   לָכֵ֗ן  יְיֵלִ֥יל  מֹואָ֛ב  לְמֹואָ֖ב  כֻּלֹּ֣ה  יְיֵלִ֑יל  לַאֲשִׁישֵׁ֧י  קִיר־  חֲרֶ֛שֶׂת  תֶּהְגּ֖וּ  אַךְ־  נְכָאִֽים׃  8   כִּ֣י  שַׁדְמֹות֩  חֶשְׁבֹּ֨ון  אֻמְלָ֜ל  גֶּ֣פֶן  שִׂבְמָ֗ה  בַּעֲלֵ֤י  גֹויִם֙  הָלְמ֣וּ  שְׂרוּקֶּ֔יהָ  עַד־  יַעְזֵ֥ר  נָגָ֖עוּ  תָּ֣עוּ  מִדְבָּ֑ר  שְׁלֻ֣חֹותֶ֔יהָ  נִטְּשׁ֖וּ  עָ֥בְרוּ  יָֽם׃ 


The prophet bewails her
9   עַל־  כֵּ֡ן  אֶבְכֶּ֞ה  בִּבְכִ֤י  יַעְזֵר֙  גֶּ֣פֶן  שִׂבְמָ֔ה  אֲרַיָּ֙וֶךְ֙  דִּמְעָתִ֔י  חֶשְׁבֹּ֖ון  וְאֶלְעָלֵ֑ה  כִּ֧י  עַל־  קֵיצֵ֛ךְ  וְעַל־  קְצִירֵ֖ךְ  הֵידָ֥ד  נָפָֽל׃  10   וְנֶאֱסַ֨ף  שִׂמְחָ֤ה  וָגִיל֙  מִן־  הַכַּרְמֶ֔ל  וּבַכְּרָמִ֥ים  לֹֽא־  יְרֻנָּ֖ן  לֹ֣א  יְרֹעָ֑ע  יַ֗יִן  בַּיְקָבִ֛ים  לֹֽא־  יִדְרֹ֥ךְ  הַדֹּרֵ֖ךְ  הֵידָ֥ד  הִשְׁבַּֽתִּי׃  11   עַל־  כֵּן֙  מֵעַ֣י  לְמֹואָ֔ב  כַּכִּנֹּ֖ור  יֶֽהֱמ֑וּ  וְקִרְבִּ֖י  לְקִ֥יר  חָֽרֶשׂ׃ 


The judgment of Moab
12   וְהָיָ֧ה  כִֽי־  נִרְאָ֛ה  כִּֽי־  נִלְאָ֥ה  מֹואָ֖ב  עַל־  הַבָּמָ֑ה  וּבָ֧א  אֶל־  מִקְדָּשֹׁ֛ו  לְהִתְפַּלֵּ֖ל  וְלֹ֥א  יוּכָֽל׃  13   זֶ֣ה  הַדָּבָ֗ר  אֲשֶׁ֨ר  דִּבֶּ֧ר  יְהוָ֛ה  אֶל־  מֹואָ֖ב  מֵאָֽז׃  14   וְעַתָּ֗ה  דִּבֶּ֣ר  יְהוָה֮  לֵאמֹר֒  בְּשָׁלֹ֤שׁ  שָׁנִים֙  כִּשְׁנֵ֣י  שָׂכִ֔יר  וְנִקְלָה֙  כְּבֹ֣וד  מֹואָ֔ב  בְּכֹ֖ל  הֶהָמֹ֣ון  הָרָ֑ב  וּשְׁאָ֥ר  מְעַ֛ט  מִזְעָ֖ר  לֹ֥וא  כַבִּֽיר׃  ס 
<< Isaiah 16 >>
Biblos Greek and Hebrew Study Bible © 2010 Biblos.com
Online Parallel Bible