Genesis 36 HEB<< Genesis 36 HEB >>



Esau's three wives.
1   וְאֵ֛לֶּה  תֹּלְדֹ֥ות  עֵשָׂ֖ו  ה֥וּא  אֱדֹֽום׃  2   עֵשָׂ֛ו  לָקַ֥ח  אֶת־  נָשָׁ֖יו  מִבְּנֹ֣ות  כְּנָ֑עַן  אֶת־  עָדָ֗ה  בַּת־  אֵילֹון֙  הַֽחִתִּ֔י  וְאֶת־  אָהֳלִֽיבָמָה֙  בַּת־  עֲנָ֔ה  בַּת־  צִבְעֹ֖ון  הַֽחִוִּֽי׃  3   וְאֶת־  בָּשְׂמַ֥ת  בַּת־  יִשְׁמָעֵ֖אל  אֲחֹ֥ות  נְבָיֹֽות׃  4   וַתֵּ֧לֶד  עָדָ֛ה  לְעֵשָׂ֖ו  אֶת־  אֱלִיפָ֑ז  וּבָ֣שְׂמַ֔ת  יָלְדָ֖ה  אֶת־  רְעוּאֵֽל׃  5   וְאָהֳלִֽיבָמָה֙  יָֽלְדָ֔ה  אֶת־  [יעישׁ  כ]  (יְע֥וּשׁ  ק)  וְאֶת־  יַעְלָ֖ם  וְאֶת־  קֹ֑רַח  אֵ֚לֶּה  בְּנֵ֣י  עֵשָׂ֔ו  אֲשֶׁ֥ר  יֻלְּדוּ־  לֹ֖ו  בְּאֶ֥רֶץ  כְּנָֽעַן׃ 


His removal to mount Seir.
6   וַיִּקַּ֣ח  עֵשָׂ֡ו  אֶת־  נָ֠שָׁיו  וְאֶת־  בָּנָ֣יו  וְאֶת־  בְּנֹתָיו֮  וְאֶת־  כָּל־  נַפְשֹׁ֣ות  בֵּיתֹו֒  וְאֶת־  מִקְנֵ֣הוּ  וְאֶת־  כָּל־  בְּהֶמְתֹּ֗ו  וְאֵת֙  כָּל־  קִנְיָנֹ֔ו  אֲשֶׁ֥ר  רָכַ֖שׁ  בְּאֶ֣רֶץ  כְּנָ֑עַן  וַיֵּ֣לֶךְ  אֶל־  אֶ֔רֶץ  מִפְּנֵ֖י  יַעֲקֹ֥ב  אָחִֽיו׃  7   כִּֽי־  הָיָ֧ה  רְכוּשָׁ֛ם  רָ֖ב  מִשֶּׁ֣בֶת  יַחְדָּ֑ו  וְלֹ֨א  יָֽכְלָ֜ה  אֶ֤רֶץ  מְגֽוּרֵיהֶם֙  לָשֵׂ֣את  אֹתָ֔ם  מִפְּנֵ֖י  מִקְנֵיהֶֽם׃  8   וַיֵּ֤שֶׁב  עֵשָׂו֙  בְּהַ֣ר  שֵׂעִ֔יר  עֵשָׂ֖ו  ה֥וּא  אֱדֹֽום׃ 


His sons.
9   וְאֵ֛לֶּה  תֹּלְדֹ֥ות  עֵשָׂ֖ו  אֲבִ֣י  אֱדֹ֑ום  בְּהַ֖ר  שֵׂעִֽיר׃  10   אֵ֖לֶּה  שְׁמֹ֣ות  בְּנֵֽי־  עֵשָׂ֑ו  אֱלִיפַ֗ז  בֶּן־  עָדָה֙  אֵ֣שֶׁת  עֵשָׂ֔ו  רְעוּאֵ֕ל  בֶּן־  בָּשְׂמַ֖ת  אֵ֥שֶׁת  עֵשָֽׂו׃  11   וַיִּהְי֖וּ  בְּנֵ֣י  אֱלִיפָ֑ז  תֵּימָ֣ן  אֹומָ֔ר  צְפֹ֥ו  וְגַעְתָּ֖ם  וּקְנַֽז׃  12   וְתִמְנַ֣ע  הָיְתָ֣ה  פִילֶ֗גֶשׁ  לֶֽאֱלִיפַז֙  בֶּן־  עֵשָׂ֔ו  וַתֵּ֥לֶד  לֶאֱלִיפַ֖ז  אֶת־  עֲמָלֵ֑ק  אֵ֕לֶּה  בְּנֵ֥י  עָדָ֖ה  אֵ֥שֶׁת  עֵשָֽׂו׃  13   וְאֵ֙לֶּה֙  בְּנֵ֣י  רְעוּאֵ֔ל  נַ֥חַת  וָזֶ֖רַח  שַׁמָּ֣ה  וּמִזָּ֑ה  אֵ֣לֶּ֣ה  הָי֔וּ  בְּנֵ֥י  בָשְׂמַ֖ת  אֵ֥שֶׁת  עֵשָֽׂו׃  14   וְאֵ֣לֶּה  הָי֗וּ  בְּנֵ֨י  אָהֳלִיבָמָ֧ה  בַת־  עֲנָ֛ה  בַּת־  צִבְעֹ֖ון  אֵ֣שֶׁת  עֵשָׂ֑ו  וַתֵּ֣לֶד  לְעֵשָׂ֔ו  אֶת־  [יעישׁ  כ]  (יְע֥וּשׁ  ק)  וְאֶת־  יַעְלָ֖ם  וְאֶת־  קֹֽרַח׃ 


The dukes which descended of his sons.
15   אֵ֖לֶּה  אַלּוּפֵ֣י  בְנֵֽי־  עֵשָׂ֑ו  בְּנֵ֤י  אֱלִיפַז֙  בְּכֹ֣ור  עֵשָׂ֔ו  אַלּ֤וּף  תֵּימָן֙  אַלּ֣וּף  אֹומָ֔ר  אַלּ֥וּף  צְפֹ֖ו  אַלּ֥וּף  קְנַֽז׃  16   אַלּֽוּף־  קֹ֛רַח  אַלּ֥וּף  גַּעְתָּ֖ם  אַלּ֣וּף  עֲמָלֵ֑ק  אֵ֣לֶּה  אַלּוּפֵ֤י  אֱלִיפַז֙  בְּאֶ֣רֶץ  אֱדֹ֔ום  אֵ֖לֶּה  בְּנֵ֥י  עָדָֽה׃  17   וְאֵ֗לֶּה  בְּנֵ֤י  רְעוּאֵל֙  בֶּן־  עֵשָׂ֔ו  אַלּ֥וּף  נַ֙חַת֙  אַלּ֣וּף  זֶ֔רַח  אַלּ֥וּף  שַׁמָּ֖ה  אַלּ֣וּף  מִזָּ֑ה  אֵ֣לֶּה  אַלּוּפֵ֤י  רְעוּאֵל֙  בְּאֶ֣רֶץ  אֱדֹ֔ום  אֵ֕לֶּה  בְּנֵ֥י  בָשְׂמַ֖ת  אֵ֥שֶׁת  עֵשָֽׂו׃  18   וְאֵ֗לֶּה  בְּנֵ֤י  אָהֳלִֽיבָמָה֙  אֵ֣שֶׁת  עֵשָׂ֔ו  אַלּ֥וּף  יְע֛וּשׁ  אַלּ֥וּף  יַעְלָ֖ם  אַלּ֣וּף  קֹ֑רַח  אֵ֣לֶּה  אַלּוּפֵ֞י  אָֽהֳלִיבָמָ֛ה  בַּת־  עֲנָ֖ה  אֵ֥שֶׁת  עֵשָֽׂו׃  19   אֵ֧לֶּה  בְנֵי־  עֵשָׂ֛ו  וְאֵ֥לֶּה  אַלּוּפֵיהֶ֖ם  ה֥וּא  אֱדֹֽום׃  ס 


The sons and dukes of Seir the Horite.
20   אֵ֤לֶּה  בְנֵֽי־  שֵׂעִיר֙  הַחֹרִ֔י  יֹשְׁבֵ֖י  הָאָ֑רֶץ  לֹוטָ֥ן  וְשֹׁובָ֖ל  וְצִבְעֹ֥ון  וַעֲנָֽה׃  21   וְדִשֹׁ֥ון  וְאֵ֖צֶר  וְדִישָׁ֑ן  אֵ֣לֶּה  אַלּוּפֵ֧י  הַחֹרִ֛י  בְּנֵ֥י  שֵׂעִ֖יר  בְּאֶ֥רֶץ  אֱדֹֽום׃  22   וַיִּהְי֥וּ  בְנֵי־  לֹוטָ֖ן  חֹרִ֣י  וְהֵימָ֑ם  וַאֲחֹ֥ות  לֹוטָ֖ן  תִּמְנָֽע׃  23   וְאֵ֙לֶּה֙  בְּנֵ֣י  שֹׁובָ֔ל  עַלְוָ֥ן  וּמָנַ֖חַת  וְעֵיבָ֑ל  שְׁפֹ֖ו  וְאֹונָֽם׃ 


Anah finds mules.
24   וְאֵ֥לֶּה  בְנֵֽי־  צִבְעֹ֖ון  וְאַיָּ֣ה  וַעֲנָ֑ה  ה֣וּא  עֲנָ֗ה  אֲשֶׁ֨ר  מָצָ֤א  אֶת־  הַיֵּמִם֙  בַּמִּדְבָּ֔ר  בִּרְעֹתֹ֥ו  אֶת־  הַחֲמֹרִ֖ים  לְצִבְעֹ֥ון  אָבִֽיו׃  25   וְאֵ֥לֶּה  בְנֵֽי־  עֲנָ֖ה  דִּשֹׁ֑ן  וְאָהֳלִיבָמָ֖ה  בַּת־  עֲנָֽה׃  26   וְאֵ֖לֶּה  בְּנֵ֣י  דִישָׁ֑ן  חֶמְדָּ֥ן  וְאֶשְׁבָּ֖ן  וְיִתְרָ֥ן  וּכְרָֽן׃  27   אֵ֖לֶּה  בְּנֵי־  אֵ֑צֶר  בִּלְהָ֥ן  וְזַעֲוָ֖ן  וַעֲקָֽן׃  28   אֵ֥לֶּה  בְנֵֽי־  דִישָׁ֖ן  ע֥וּץ  וַאֲרָֽן׃  29   אֵ֖לֶּה  אַלּוּפֵ֣י  הַחֹרִ֑י  אַלּ֤וּף  לֹוטָן֙  אַלּ֣וּף  שֹׁובָ֔ל  אַלּ֥וּף  צִבְעֹ֖ון  אַלּ֥וּף  עֲנָֽה׃  30   אַלּ֥וּף  דִּשֹׁ֛ן  אַלּ֥וּף  אֵ֖צֶר  אַלּ֣וּף  דִּישָׁ֑ן  אֵ֣לֶּה  אַלּוּפֵ֧י  הַחֹרִ֛י  לְאַלֻּפֵיהֶ֖ם  בְּאֶ֥רֶץ  שֵׂעִֽיר׃  פ 


The kings of Edom.
31   וְאֵ֙לֶּה֙  הַמְּלָכִ֔ים  אֲשֶׁ֥ר  מָלְכ֖וּ  בְּאֶ֣רֶץ  אֱדֹ֑ום  לִפְנֵ֥י  מְלָךְ־  מֶ֖לֶךְ  לִבְנֵ֥י  יִשְׂרָאֵֽל׃  32   וַיִּמְלֹ֣ךְ  בֶּאֱדֹ֔ום  בֶּ֖לַע  בֶּן־  בְּעֹ֑ור  וְשֵׁ֥ם  עִירֹ֖ו  דִּנְהָֽבָה׃  33   וַיָּ֖מָת  בָּ֑לַע  וַיִּמְלֹ֣ךְ  תַּחְתָּ֔יו  יֹובָ֥ב  בֶּן־  זֶ֖רַח  מִבָּצְרָֽה׃  34   וַיָּ֖מָת  יֹובָ֑ב  וַיִּמְלֹ֣ךְ  תַּחְתָּ֔יו  חֻשָׁ֖ם  מֵאֶ֥רֶץ  הַתֵּימָנִֽי׃  35   וַיָּ֖מָת  חֻשָׁ֑ם  וַיִּמְלֹ֨ךְ  תַּחְתָּ֜יו  הֲדַ֣ד  בֶּן־  בְּדַ֗ד  הַמַּכֶּ֤ה  אֶת־  מִדְיָן֙  בִּשְׂדֵ֣ה  מֹואָ֔ב  וְשֵׁ֥ם  עִירֹ֖ו  עֲוִֽית׃  36   וַיָּ֖מָת  הֲדָ֑ד  וַיִּמְלֹ֣ךְ  תַּחְתָּ֔יו  שַׂמְלָ֖ה  מִמַּשְׂרֵקָֽה׃  37   וַיָּ֖מָת  שַׂמְלָ֑ה  וַיִּמְלֹ֣ךְ  תַּחְתָּ֔יו  שָׁא֖וּל  מֵרְחֹבֹ֥ות  הַנָּהָֽר׃  38   וַיָּ֖מָת  שָׁא֑וּל  וַיִּמְלֹ֣ךְ  תַּחְתָּ֔יו  בַּ֥עַל  חָנָ֖ן  בֶּן־  עַכְבֹּֽור׃  39   וַיָּמָת֮  בַּ֣עַל  חָנָ֣ן  בֶּן־  עַכְבֹּור֒  וַיִּמְלֹ֤ךְ  תַּחְתָּיו֙  הֲדַ֔ר  וְשֵׁ֥ם  עִירֹ֖ו  פָּ֑עוּ  וְשֵׁ֨ם  אִשְׁתֹּ֤ו  מְהֵֽיטַבְאֵל֙  בַּת־  מַטְרֵ֔ד  בַּ֖ת  מֵ֥י  זָהָֽב׃ 


The dukes that descended of Esau.
40   וְ֠אֵלֶּה  שְׁמֹ֞ות  אַלּוּפֵ֤י  עֵשָׂו֙  לְמִשְׁפְּחֹתָ֔ם  לִמְקֹמֹתָ֖ם  בִּשְׁמֹתָ֑ם  אַלּ֥וּף  תִּמְנָ֛ע  אַלּ֥וּף  עַֽלְוָ֖ה  אַלּ֥וּף  יְתֵֽת׃  41   אַלּ֧וּף  אָהֳלִיבָמָ֛ה  אַלּ֥וּף  אֵלָ֖ה  אַלּ֥וּף  פִּינֹֽן׃  42   אַלּ֥וּף  קְנַ֛ז  אַלּ֥וּף  תֵּימָ֖ן  אַלּ֥וּף  מִבְצָֽר׃  43   אַלּ֥וּף  מַגְדִּיאֵ֖ל  אַלּ֣וּף  עִירָ֑ם  אֵ֣לֶּה  אַלּוּפֵ֣י  אֱדֹ֗ום  לְמֹֽשְׁבֹתָם֙  בְּאֶ֣רֶץ  אֲחֻזָּתָ֔ם  ה֥וּא  עֵשָׂ֖ו  אֲבִ֥י  אֱדֹֽום׃  פ 

<< Genesis 36 >>
Biblos Greek and Hebrew Study Bible © 2010 Biblos.com
Online Parallel Bible