<< Genesis 2 HEB >>


The first Sabbath.
1   וַיְכֻלּ֛וּ  הַשָּׁמַ֥יִם  וְהָאָ֖רֶץ  וְכָל־  צְבָאָֽם׃  2   וַיְכַ֤ל  אֱלֹהִים֙  בַּיֹּ֣ום  הַשְּׁבִיעִ֔י  מְלַאכְתֹּ֖ו  אֲשֶׁ֣ר  עָשָׂ֑ה  וַיִּשְׁבֹּת֙  בַּיֹּ֣ום  הַשְּׁבִיעִ֔י  מִכָּל־  מְלַאכְתֹּ֖ו  אֲשֶׁ֥ר  עָשָֽׂה׃  3   וַיְבָ֤רֶךְ  אֱלֹהִים֙  אֶת־  יֹ֣ום  הַשְּׁבִיעִ֔י  וַיְקַדֵּ֖שׁ  אֹתֹ֑ו  כִּ֣י  בֹ֤ו  שָׁבַת֙  מִכָּל־  מְלַאכְתֹּ֔ו  אֲשֶׁר־  בָּרָ֥א  אֱלֹהִ֖ים  לַעֲשֹֽׂות׃  פ 


Further details concerning the manner of creation.
4   אֵ֣לֶּה  תֹולְדֹ֧ות  הַשָּׁמַ֛יִם  וְהָאָ֖רֶץ  בְּהִבָּֽרְאָ֑ם  בְּיֹ֗ום  עֲשֹׂ֛ות  יְהוָ֥ה  אֱלֹהִ֖ים  אֶ֥רֶץ  וְשָׁמָֽיִם׃  5   וְכֹ֣ל  שִׂ֣יחַ  הַשָּׂדֶ֗ה  טֶ֚רֶם  יִֽהְיֶ֣ה  בָאָ֔רֶץ  וְכָל־  עֵ֥שֶׂב  הַשָּׂדֶ֖ה  טֶ֣רֶם  יִצְמָ֑ח  כִּי֩  לֹ֨א  הִמְטִ֜יר  יְהוָ֤ה  אֱלֹהִים֙  עַל־  הָאָ֔רֶץ  וְאָדָ֣ם  אַ֔יִן  לַֽעֲבֹ֖ד  אֶת־  הָֽאֲדָמָֽה׃  6   וְאֵ֖ד  יַֽעֲלֶ֣ה  מִן־  הָאָ֑רֶץ  וְהִשְׁקָ֖ה  אֶֽת־  כָּל־  פְּנֵֽי־  הָֽאֲדָמָֽה׃  7   וַיִּיצֶר֩  יְהוָ֨ה  אֱלֹהִ֜ים  אֶת־  הָֽאָדָ֗ם  עָפָר֙  מִן־  הָ֣אֲדָמָ֔ה  וַיִּפַּ֥ח  בְּאַפָּ֖יו  נִשְׁמַ֣ת  חַיִּ֑ים  וַֽיְהִ֥י  הָֽאָדָ֖ם  לְנֶ֥פֶשׁ  חַיָּֽה׃ 


The planting of the garden of Eden, and its situation;
8   וַיִּטַּ֞ע  יְהוָ֧ה  אֱלֹהִ֛ים  גַּן־  בְּעֵ֖דֶן  מִקֶּ֑דֶם  וַיָּ֣שֶׂם  שָׁ֔ם  אֶת־  הָֽאָדָ֖ם  אֲשֶׁ֥ר  יָצָֽר׃  9   וַיַּצְמַ֞ח  יְהוָ֤ה  אֱלֹהִים֙  מִן־  הָ֣אֲדָמָ֔ה  כָּל־  עֵ֛ץ  נֶחְמָ֥ד  לְמַרְאֶ֖ה  וְטֹ֣וב  לְמַאֲכָ֑ל  וְעֵ֤ץ  הַֽחַיִּים֙  בְּתֹ֣וךְ  הַגָּ֔ן  וְעֵ֕ץ  הַדַּ֖עַת  טֹ֥וב  וָרָֽע׃  10   וְנָהָר֙  יֹצֵ֣א  מֵעֵ֔דֶן  לְהַשְׁקֹ֖ות  אֶת־  הַגָּ֑ן  וּמִשָּׁם֙  יִפָּרֵ֔ד  וְהָיָ֖ה  לְאַרְבָּעָ֥ה  רָאשִֽׁים׃  11   שֵׁ֥ם  הָֽאֶחָ֖ד  פִּישֹׁ֑ון  ה֣וּא  הַסֹּבֵ֗ב  אֵ֚ת  כָּל־  אֶ֣רֶץ  הַֽחֲוִילָ֔ה  אֲשֶׁר־  שָׁ֖ם  הַזָּהָֽב׃  12   וּֽזֲהַ֛ב  הָאָ֥רֶץ  הַהִ֖וא  טֹ֑וב  שָׁ֥ם  הַבְּדֹ֖לַח  וְאֶ֥בֶן  הַשֹּֽׁהַם׃  13   וְשֵֽׁם־  הַנָּהָ֥ר  הַשֵּׁנִ֖י  גִּיחֹ֑ון  ה֣וּא  הַסֹּובֵ֔ב  אֵ֖ת  כָּל־  אֶ֥רֶץ  כּֽוּשׁ׃  14   וְשֵׁ֨ם  הַנָּהָ֤ר  הַשְּׁלִישִׁי֙  חִדֶּ֔קֶל  ה֥וּא  הַֽהֹלֵ֖ךְ  קִדְמַ֣ת  אַשּׁ֑וּר  וְהַנָּהָ֥ר  הָֽרְבִיעִ֖י  ה֥וּא  פְרָֽת׃ 


man is placed in it; and the tree of knowledge forbidden.
15   וַיִּקַּ֛ח  יְהוָ֥ה  אֱלֹהִ֖ים  אֶת־  הָֽאָדָ֑ם  וַיַּנִּחֵ֣הוּ  בְגַן־  עֵ֔דֶן  לְעָבְדָ֖הּ  וּלְשָׁמְרָֽהּ׃  16   וַיְצַו֙  יְהוָ֣ה  אֱלֹהִ֔ים  עַל־  הָֽאָדָ֖ם  לֵאמֹ֑ר  מִכֹּ֥ל  עֵֽץ־  הַגָּ֖ן  אָכֹ֥ל  תֹּאכֵֽל׃  17   וּמֵעֵ֗ץ  הַדַּ֙עַת֙  טֹ֣וב  וָרָ֔ע  לֹ֥א  תֹאכַ֖ל  מִמֶּ֑נּוּ  כִּ֗י  בְּיֹ֛ום  אֲכָלְךָ֥  מִמֶּ֖נּוּ  מֹ֥ות  תָּמֽוּת׃ 


The animals are named by Adam.
18   וַיֹּ֙אמֶר֙  יְהוָ֣ה  אֱלֹהִ֔ים  לֹא־  טֹ֛וב  הֱיֹ֥ות  הָֽאָדָ֖ם  לְבַדֹּ֑ו  אֶֽעֱשֶׂהּ־  לֹּ֥ו  עֵ֖זֶר  כְּנֶגְדֹּֽו׃  19   וַיִּצֶר֩  יְהוָ֨ה  אֱלֹהִ֜ים  מִן־  הָֽאֲדָמָ֗ה  כָּל־  חַיַּ֤ת  הַשָּׂדֶה֙  וְאֵת֙  כָּל־  עֹ֣וף  הַשָּׁמַ֔יִם  וַיָּבֵא֙  אֶל־  הָ֣אָדָ֔ם  לִרְאֹ֖ות  מַה־  יִּקְרָא־  לֹ֑ו  וְכֹל֩  אֲשֶׁ֨ר  יִקְרָא־  לֹ֧ו  הָֽאָדָ֛ם  נֶ֥פֶשׁ  חַיָּ֖ה  ה֥וּא  שְׁמֹֽו׃  20   וַיִּקְרָ֨א  הָֽאָדָ֜ם  שֵׁמֹ֗ות  לְכָל־  הַבְּהֵמָה֙  וּלְעֹ֣וף  הַשָּׁמַ֔יִם  וּלְכֹ֖ל  חַיַּ֣ת  הַשָּׂדֶ֑ה  וּלְאָדָ֕ם  לֹֽא־  מָצָ֥א  עֵ֖זֶר  כְּנֶגְדֹּֽו׃ 


The making of woman, and the institution of marriage.
21   וַיַּפֵּל֩  יְהוָ֨ה  אֱלֹהִ֧ים  תַּרְדֵּמָ֛ה  עַל־  הָאָדָ֖ם  וַיִּישָׁ֑ן  וַיִּקַּ֗ח  אַחַת֙  מִצַּלְעֹתָ֔יו  וַיִּסְגֹּ֥ר  בָּשָׂ֖ר  תַּחְתֶּֽנָּה׃  22   וַיִּבֶן֩  יְהוָ֨ה  אֱלֹהִ֧ים  אֶֽת־  הַצֵּלָ֛ע  אֲשֶׁר־  לָקַ֥ח  מִן־  הָֽאָדָ֖ם  לְאִשָּׁ֑ה  וַיְבִאֶ֖הָ  אֶל־  הָֽאָדָֽם׃  23   וַיֹּאמֶר֮  הָֽאָדָם֒  זֹ֣את  הַפַּ֗עַם  עֶ֚צֶם  מֵֽעֲצָמַ֔י  וּבָשָׂ֖ר  מִבְּשָׂרִ֑י  לְזֹאת֙  יִקָּרֵ֣א  אִשָּׁ֔ה  כִּ֥י  מֵאִ֖ישׁ  לֻֽקֳחָה־  זֹּֽאת׃  24   עַל־  כֵּן֙  יַֽעֲזָב־  אִ֔ישׁ  אֶת־  אָבִ֖יו  וְאֶת־  אִמֹּ֑ו  וְדָבַ֣ק  בְּאִשְׁתֹּ֔ו  וְהָי֖וּ  לְבָשָׂ֥ר  אֶחָֽד׃  25   וַיִּֽהְי֤וּ  שְׁנֵיהֶם֙  עֲרוּמִּ֔ים  הָֽאָדָ֖ם  וְאִשְׁתֹּ֑ו  וְלֹ֖א  יִתְבֹּשָֽׁשׁוּ׃ 
<< Genesis 2 >>
Biblos Greek and Hebrew Study Bible © 2010 Biblos.com
Online Parallel Bible