<< Genesis 15 HEB >>


God encourages Abram, who asks for an heir.
1   אַחַ֣ר  הַדְּבָרִ֣ים  הָאֵ֗לֶּה  הָיָ֤ה  דְבַר־  יְהוָה֙  אֶל־  אַבְרָ֔ם  בַּֽמַּחֲזֶ֖ה  לֵאמֹ֑ר  אַל־  תִּירָ֣א  אַבְרָ֗ם  אָנֹכִי֙  מָגֵ֣ן  לָ֔ךְ  שְׂכָרְךָ֖  הַרְבֵּ֥ה  מְאֹֽד׃  2   וַיֹּ֣אמֶר  אַבְרָ֗ם  אֲדֹנָ֤י  יֱהוִה֙  מַה־  תִּתֶּן־  לִ֔י  וְאָנֹכִ֖י  הֹולֵ֣ךְ  עֲרִירִ֑י  וּבֶן־  מֶ֣שֶׁק  בֵּיתִ֔י  ה֖וּא  דַּמֶּ֥שֶׂק  אֱלִיעֶֽזֶר׃  3   וַיֹּ֣אמֶר  אַבְרָ֔ם  הֵ֣ן  לִ֔י  לֹ֥א  נָתַ֖תָּה  זָ֑רַע  וְהִנֵּ֥ה  בֶן־  בֵּיתִ֖י  יֹורֵ֥שׁ  אֹתִֽי׃ 


God promises him a son, and a multiplying of his seed.
4   וְהִנֵּ֨ה  דְבַר־  יְהוָ֤ה  אֵלָיו֙  לֵאמֹ֔ר  לֹ֥א  יִֽירָשְׁךָ֖  זֶ֑ה  כִּי־  אִם֙  אֲשֶׁ֣ר  יֵצֵ֣א  מִמֵּעֶ֔יךָ  ה֖וּא  יִֽירָשֶֽׁךָ׃  5   וַיֹּוצֵ֨א  אֹתֹ֜ו  הַח֗וּצָה  וַיֹּ֙אמֶר֙  הַבֶּט־  נָ֣א  הַשָּׁמַ֗יְמָה  וּסְפֹר֙  הַכֹּ֣וכָבִ֔ים  אִם־  תּוּכַ֖ל  לִסְפֹּ֣ר  אֹתָ֑ם  וַיֹּ֣אמֶר  לֹ֔ו  כֹּ֥ה  יִהְיֶ֖ה  זַרְעֶֽךָ׃ 


Abram is justified by faith.
6   וְהֶאֱמִ֖ן  בַּֽיהוָ֑ה  וַיַּחְשְׁבֶ֥הָ  לֹּ֖ו  צְדָקָֽה׃ 


Canaan is promised again,
7   וַיֹּ֖אמֶר  אֵלָ֑יו  אֲנִ֣י  יְהוָ֗ה  אֲשֶׁ֤ר  הֹוצֵאתִ֙יךָ֙  מֵא֣וּר  כַּשְׂדִּ֔ים  לָ֧תֶת  לְךָ֛  אֶת־  הָאָ֥רֶץ  הַזֹּ֖את  לְרִשְׁתָּֽהּ׃  8   וַיֹּאמַ֑ר  אֲדֹנָ֣י  יֱהוִ֔ה  בַּמָּ֥ה  אֵדַ֖ע  כִּ֥י  אִֽירָשֶֽׁנָּה׃ 


and confirmed by a sign, and a vision,
9   וַיֹּ֣אמֶר  אֵלָ֗יו  קְחָ֥ה  לִי֙  עֶגְלָ֣ה  מְשֻׁלֶּ֔שֶׁת  וְעֵ֥ז  מְשֻׁלֶּ֖שֶׁת  וְאַ֣יִל  מְשֻׁלָּ֑שׁ  וְתֹ֖ר  וְגֹוזָֽל׃  10   וַיִּֽקַּֽח־  לֹ֣ו  אֶת־  כָּל־  אֵ֗לֶּה  וַיְבַתֵּ֤ר  אֹתָם֙  בַּתָּ֔וֶךְ  וַיִּתֵּ֥ן  אִישׁ־  בִּתְרֹ֖ו  לִקְרַ֣את  רֵעֵ֑הוּ  וְאֶת־  הַצִפֹּ֖ר  לֹ֥א  בָתָֽר׃  11   וַיֵּ֥רֶד  הָעַ֖יִט  עַל־  הַפְּגָרִ֑ים  וַיַּשֵּׁ֥ב  אֹתָ֖ם  אַבְרָֽם׃  12   וַיְהִ֤י  הַשֶּׁ֙מֶשׁ֙  לָבֹ֔וא  וְתַרְדֵּמָ֖ה  נָפְלָ֣ה  עַל־  אַבְרָ֑ם  וְהִנֵּ֥ה  אֵימָ֛ה  חֲשֵׁכָ֥ה  גְדֹלָ֖ה  נֹפֶ֥לֶת  עָלָֽיו׃  13   וַיֹּ֣אמֶר  לְאַבְרָ֗ם  יָדֹ֨עַ  תֵּדַ֜ע  כִּי־  גֵ֣ר  יִהְיֶ֣ה  זַרְעֲךָ֗  בְּאֶ֙רֶץ֙  לֹ֣א  לָהֶ֔ם  וַעֲבָד֖וּם  וְעִנּ֣וּ  אֹתָ֑ם  אַרְבַּ֥ע  מֵאֹ֖ות  שָׁנָֽה׃  14   וְגַ֧ם  אֶת־  הַגֹּ֛וי  אֲשֶׁ֥ר  יַעֲבֹ֖דוּ  דָּ֣ן  אָנֹ֑כִי  וְאַחֲרֵי־  כֵ֥ן  יֵצְא֖וּ  בִּרְכֻ֥שׁ  גָּדֹֽול׃  15   וְאַתָּ֛ה  תָּבֹ֥וא  אֶל־  אֲבֹתֶ֖יךָ  בְּשָׁלֹ֑ום  תִּקָּבֵ֖ר  בְּשֵׂיבָ֥ה  טֹובָֽה׃  16   וְדֹ֥ור  רְבִיעִ֖י  יָשׁ֣וּבוּ  הֵ֑נָּה  כִּ֧י  לֹא־  שָׁלֵ֛ם  עֲוֹ֥ן  הָאֱמֹרִ֖י  עַד־  הֵֽנָּה׃  17   וַיְהִ֤י  הַשֶּׁ֙מֶשׁ֙  בָּ֔אָה  וַעֲלָטָ֖ה  הָיָ֑ה  וְהִנֵּ֨ה  תַנּ֤וּר  עָשָׁן֙  וְלַפִּ֣יד  אֵ֔שׁ  אֲשֶׁ֣ר  עָבַ֔ר  בֵּ֖ין  הַגְּזָרִ֥ים  הָאֵֽלֶּה׃ 


prophetic of the condition of his posterity till brought out of Egypt.
18   בַּיֹּ֣ום  הַה֗וּא  כָּרַ֧ת  יְהוָ֛ה  אֶת־  אַבְרָ֖ם  בְּרִ֣ית  לֵאמֹ֑ר  לְזַרְעֲךָ֗  נָתַ֙תִּי֙  אֶת־  הָאָ֣רֶץ  הַזֹּ֔את  מִנְּהַ֣ר  מִצְרַ֔יִם  עַד־  הַנָּהָ֥ר  הַגָּדֹ֖ל  נְהַר־  פְּרָֽת׃  19   אֶת־  הַקֵּינִי֙  וְאֶת־  הַקְּנִזִּ֔י  וְאֵ֖ת  הַקַּדְמֹנִֽי׃  20   וְאֶת־  הַחִתִּ֥י  וְאֶת־  הַפְּרִזִּ֖י  וְאֶת־  הָרְפָאִֽים׃  21   וְאֶת־  הָֽאֱמֹרִי֙  וְאֶת־  הַֽכְּנַעֲנִ֔י  וְאֶת־  הַגִּרְגָּשִׁ֖י  וְאֶת־  הַיְבוּסִֽי׃  ס 
<< Genesis 15 >>
Biblos Greek and Hebrew Study Bible © 2010 Biblos.com
Online Parallel Bible