<< Ezekiel 3 HEB >>


Ezekiel eats the scroll
1   וַיֹּ֣אמֶר  אֵלַ֔י  בֶּן־  אָדָ֕ם  אֵ֥ת  אֲשֶׁר־  תִּמְצָ֖א  אֱכֹ֑ול  אֱכֹול֙  אֶת־  הַמְּגִלָּ֣ה  הַזֹּ֔את  וְלֵ֥ךְ  דַּבֵּ֖ר  אֶל־  בֵּ֥ית  יִשְׂרָאֵֽל׃  2   וָאֶפְתַּ֖ח  אֶת־  פִּ֑י  וַיַּ֣אֲכִלֵ֔נִי  אֵ֖ת  הַמְּגִלָּ֥ה  הַזֹּֽאת׃  3   וַיֹּ֣אמֶר  אֵלַ֗י  בֶּן־  אָדָם֙  בִּטְנְךָ֤  תַֽאֲכֵל֙  וּמֵעֶ֣יךָ  תְמַלֵּ֔א  אֵ֚ת  הַמְּגִלָּ֣ה  הַזֹּ֔את  אֲשֶׁ֥ר  אֲנִ֖י  נֹתֵ֣ן  אֵלֶ֑יךָ  וָאֹ֣כְלָ֔ה  וַתְּהִ֥י  בְּפִ֖י  כִּדְבַ֥שׁ  לְמָתֹֽוק׃  פ 


God encourages him
4   וַיֹּ֖אמֶר  אֵלָ֑י  בֶּן־  אָדָ֗ם  לֶךְ־  בֹּא֙  אֶל־  בֵּ֣ית  יִשְׂרָאֵ֔ל  וְדִבַּרְתָּ֥  בִדְבָרַ֖י  אֲלֵיהֶֽם׃  5   כִּ֡י  לֹא֩  אֶל־  עַ֨ם  עִמְקֵ֥י  שָׂפָ֛ה  וְכִבְדֵ֥י  לָשֹׁ֖ון  אַתָּ֣ה  שָׁל֑וּחַ  אֶל־  בֵּ֖ית  יִשְׂרָאֵֽל׃  6   לֹ֣א  אֶל־  עַמִּ֣ים  רַבִּ֗ים  עִמְקֵ֤י  שָׂפָה֙  וְכִבְדֵ֣י  לָשֹׁ֔ון  אֲשֶׁ֥ר  לֹֽא־  תִשְׁמַ֖ע  דִּבְרֵיהֶ֑ם  אִם־  לֹ֤א  אֲלֵיהֶם֙  שְׁלַחְתִּ֔יךָ  הֵ֖מָּה  יִשְׁמְע֥וּ  אֵלֶֽיךָ׃  7   וּבֵ֣ית  יִשְׂרָאֵ֗ל  לֹ֤א  יֹאבוּ֙  לִשְׁמֹ֣עַ  אֵלֶ֔יךָ  כִּֽי־  אֵינָ֥ם  אֹבִ֖ים  לִשְׁמֹ֣עַ  אֵלָ֑י  כִּ֚י  כָּל־  בֵּ֣ית  יִשְׂרָאֵ֔ל  חִזְקֵי־  מֵ֥צַח  וּקְשֵׁי־  לֵ֖ב  הֵֽמָּה׃  8   הִנֵּ֨ה  נָתַ֧תִּי  אֶת־  פָּנֶ֛יךָ  חֲזָקִ֖ים  לְעֻמַּ֣ת  פְּנֵיהֶ֑ם  וְאֶֽת־  מִצְחֲךָ֥  חָזָ֖ק  לְעֻמַּ֥ת  מִצְחָֽם׃  9   כְּשָׁמִ֛יר  חָזָ֥ק  מִצֹּ֖ר  נָתַ֣תִּי  מִצְחֶ֑ךָ  לֹֽא־  תִירָ֤א  אֹותָם֙  וְלֹא־  תֵחַ֣ת  מִפְּנֵיהֶ֔ם  כִּ֛י  בֵּֽית־  מְרִ֖י  הֵֽמָּה׃  פ  10   וַיֹּ֖אמֶר  אֵלָ֑י  בֶּן־  אָדָ֕ם  אֶת־  כָּל־  דְּבָרַי֙  אֲשֶׁ֣ר  אֲדַבֵּ֣ר  אֵלֶ֔יךָ  קַ֥ח  בִּֽלְבָבְךָ֖  וּבְאָזְנֶ֥יךָ  שְׁמָֽע׃  11   וְלֵ֨ךְ  בֹּ֤א  אֶל־  הַגֹּולָה֙  אֶל־  בְּנֵ֣י  עַמֶּ֔ךָ  וְדִבַּרְתָּ֤  אֲלֵיהֶם֙  וְאָמַרְתָּ֣  אֲלֵיהֶ֔ם  כֹּ֥ה  אָמַ֖ר  אֲדֹנָ֣י  יְהֹוִ֑ה  אִֽם־  יִשְׁמְע֖וּ  וְאִם־  יֶחְדָּֽלוּ׃  12   וַתִּשָּׂאֵ֣נִי  ר֔וּחַ  וָאֶשְׁמַ֣ע  אַחֲרַ֔י  קֹ֖ול  רַ֣עַשׁ  גָּדֹ֑ול  בָּר֥וּךְ  כְּבֹוד־  יְהוָ֖ה  מִמְּקֹומֹֽו׃  13   וְקֹ֣ול  כַּנְפֵ֣י  הַחַיֹּ֗ות  מַשִּׁיקֹות֙  אִשָּׁ֣ה  אֶל־  אֲחֹותָ֔הּ  וְקֹ֥ול  הָאֹופַנִּ֖ים  לְעֻמָּתָ֑ם  וְקֹ֖ול  רַ֥עַשׁ  גָּדֹֽול׃  14   וְר֥וּחַ  נְשָׂאַ֖תְנִי  וַתִּקָּחֵ֑נִי  וָאֵלֵ֥ךְ  מַר֙  בַּחֲמַ֣ת  רוּחִ֔י  וְיַד־  יְהוָ֥ה  עָלַ֖י  חָזָֽקָה׃ 


God shows him the rule of prophecy
15   וָאָבֹ֨וא  אֶל־  הַגֹּולָ֜ה  תֵּ֣ל  אָ֠בִיב  הַיֹּשְׁבִ֤ים  אֶֽל־  נְהַר־  כְּבָר֙  [וָאֲשֶׁר  כ]  (וָֽאֵשֵׁ֔ב  ק)  הֵ֖מָּה  יֹושְׁבִ֣ים  שָׁ֑ם  וָאֵשֵׁ֥ב  שָׁ֛ם  שִׁבְעַ֥ת  יָמִ֖ים  מַשְׁמִ֥ים  בְּתֹוכָֽם׃  16   וַיְהִ֕י  מִקְצֵ֖ה  שִׁבְעַ֣ת  יָמִ֑ים  פ  וַיְהִ֥י  דְבַר־  יְהוָ֖ה  אֵלַ֥י  לֵאמֹֽר׃  17   בֶּן־  אָדָ֕ם  צֹפֶ֥ה  נְתַתִּ֖יךָ  לְבֵ֣ית  יִשְׂרָאֵ֑ל  וְשָׁמַעְתָּ֤  מִפִּי֙  דָּבָ֔ר  וְהִזְהַרְתָּ֥  אֹותָ֖ם  מִמֶּֽנִּי׃  18   בְּאָמְרִ֤י  לָֽרָשָׁע֙  מֹ֣ות  תָּמ֔וּת  וְלֹ֣א  הִזְהַרְתֹּ֗ו  וְלֹ֥א  דִבַּ֛רְתָּ  לְהַזְהִ֥יר  רָשָׁ֛ע  מִדַּרְכֹּ֥ו  הָרְשָׁעָ֖ה  לְחַיֹּתֹ֑ו  ה֤וּא  רָשָׁע֙  בַּעֲוֹנֹ֣ו  יָמ֔וּת  וְדָמֹ֖ו  מִיָּדְךָ֥  אֲבַקֵּֽשׁ׃  19   וְאַתָּה֙  כִּֽי־  הִזְהַ֣רְתָּ  רָשָׁ֔ע  וְלֹא־  שָׁב֙  מֵֽרִשְׁעֹ֔ו  וּמִדַּרְכֹּ֖ו  הָרְשָׁעָ֑ה  ה֚וּא  בַּעֲוֹנֹ֣ו  יָמ֔וּת  וְאַתָּ֖ה  אֶֽת־  נַפְשְׁךָ֥  הִצַּֽלְתָּ׃  ס  20   וּבְשׁ֨וּב  צַדִּ֤יק  מִצִּדְקֹו֙  וְעָ֣שָׂה  עָ֔וֶל  וְנָתַתִּ֥י  מִכְשֹׁ֛ול  לְפָנָ֖יו  ה֣וּא  יָמ֑וּת  כִּ֣י  לֹ֤א  הִזְהַרְתֹּו֙  בְּחַטָּאתֹ֣ו  יָמ֔וּת  וְלֹ֣א  תִזָּכַ֗רְןָ  צִדְקֹתָו֙  אֲשֶׁ֣ר  עָשָׂ֔ה  וְדָמֹ֖ו  מִיָּדְךָ֥  אֲבַקֵּֽשׁ׃  21   וְאַתָּ֞ה  כִּ֧י  הִזְהַרְתֹּ֣ו  צַדִּ֗יק  לְבִלְתִּ֥י  חֲטֹ֛א  צַדִּ֖יק  וְה֣וּא  לֹא־  חָטָ֑א  חָיֹ֤ו  יִֽחְיֶה֙  כִּ֣י  נִזְהָ֔ר  וְאַתָּ֖ה  אֶֽת־  נַפְשְׁךָ֥  הִצַּֽלְתָּ׃  ס 


God shuts and opens the prophet's mouth
22   וַתְּהִ֥י  עָלַ֛י  שָׁ֖ם  יַד־  יְהוָ֑ה  וַיֹּ֣אמֶר  אֵלַ֗י  ק֥וּם  צֵא֙  אֶל־  הַבִּקְעָ֔ה  וְשָׁ֖ם  אֲדַבֵּ֥ר  אֹותָֽךְ׃  23   וָאָקוּם֮  וָאֵצֵ֣א  אֶל־  הַבִּקְעָה֒  וְהִנֵּה־  שָׁ֤ם  כְּבֹוד־  יְהוָה֙  עֹמֵ֔ד  כַּכָּבֹ֕וד  אֲשֶׁ֥ר  רָאִ֖יתִי  עַל־  נְהַר־  כְּבָ֑ר  וָאֶפֹּ֖ל  עַל־  פָּנָֽי׃  24   וַתָּבֹא־  בִ֣י  ר֔וּחַ  וַתַּעֲמִדֵ֖נִי  עַל־  רַגְלָ֑י  וַיְדַבֵּ֤ר  אֹתִי֙  וַיֹּ֣אמֶר  אֵלַ֔י  בֹּ֥א  הִסָּגֵ֖ר  בְּתֹ֥וךְ  בֵּיתֶֽךָ׃  25   וְאַתָּ֣ה  בֶן־  אָדָ֗ם  הִנֵּ֨ה  נָתְנ֤וּ  עָלֶ֙יךָ֙  עֲבֹותִ֔ים  וַֽאֲסָר֖וּךָ  בָּהֶ֑ם  וְלֹ֥א  תֵצֵ֖א  בְּתֹוכָֽם׃  26   וּלְשֹֽׁונְךָ֙  אַדְבִּ֣יק  אֶל־  חִכֶּ֔ךָ  וְנֶֽאֱלַ֔מְתָּ  וְלֹא־  תִֽהְיֶ֥ה  לָהֶ֖ם  לְאִ֣ישׁ  מֹוכִ֑יחַ  כִּ֛י  בֵּ֥ית  מְרִ֖י  הֵֽמָּה׃  27   וּֽבְדַבְּרִ֤י  אֹֽותְךָ֙  אֶפְתַּ֣ח  אֶת־  פִּ֔יךָ  וְאָמַרְתָּ֣  אֲלֵיהֶ֔ם  כֹּ֥ה  אָמַ֖ר  אֲדֹנָ֣י  יְהֹוִ֑ה  הַשֹּׁמֵ֤עַ  יִשְׁמָע֙  וְהֶחָדֵ֣ל  יֶחְדָּ֔ל  כִּ֛י  בֵּ֥ית  מְרִ֖י  הֵֽמָּה׃  ס 
<< Ezekiel 3 >>
Biblos Greek and Hebrew Study Bible © 2010 Biblos.com
Online Parallel Bible