<< Exodus 6 HEB >>



God renews his promise by his name JEHOVAH
1   וַיֹּ֤אמֶר  יְהוָה֙  אֶל־  מֹשֶׁ֔ה  עַתָּ֣ה  תִרְאֶ֔ה  אֲשֶׁ֥ר  אֶֽעֱשֶׂ֖ה  לְפַרְעֹ֑ה  כִּ֣י  בְיָ֤ד  חֲזָקָה֙  יְשַׁלְּחֵ֔ם  וּבְיָ֣ד  חֲזָקָ֔ה  יְגָרְשֵׁ֖ם  מֵאַרְצֹֽו׃  ס  2   וַיְדַבֵּ֥ר  אֱלֹהִ֖ים  אֶל־  מֹשֶׁ֑ה  וַיֹּ֥אמֶר  אֵלָ֖יו  אֲנִ֥י  יְהוָֽה׃  3   וָאֵרָ֗א  אֶל־  אַבְרָהָ֛ם  אֶל־  יִצְחָ֥ק  וְאֶֽל־  יַעֲקֹ֖ב  בְּאֵ֣ל  שַׁדָּ֑י  וּשְׁמִ֣י  יְהוָ֔ה  לֹ֥א  נֹודַ֖עְתִּי  לָהֶֽם׃  4   וְגַ֨ם  הֲקִמֹ֤תִי  אֶת־  בְּרִיתִי֙  אִתָּ֔ם  לָתֵ֥ת  לָהֶ֖ם  אֶת־  אֶ֣רֶץ  כְּנָ֑עַן  אֵ֛ת  אֶ֥רֶץ  מְגֻרֵיהֶ֖ם  אֲשֶׁר־  גָּ֥רוּ  בָֽהּ׃  5   וְגַ֣ם  אֲנִ֣י  שָׁמַ֗עְתִּי  אֶֽת־  נַאֲקַת֙  בְּנֵ֣י  יִשְׂרָאֵ֔ל  אֲשֶׁ֥ר  מִצְרַ֖יִם  מַעֲבִדִ֣ים  אֹתָ֑ם  וָאֶזְכֹּ֖ר  אֶת־  בְּרִיתִֽי׃  6   לָכֵ֞ן  אֱמֹ֥ר  לִבְנֵֽי־  יִשְׂרָאֵל֮  אֲנִ֣י  יְהוָה֒  וְהֹוצֵאתִ֣י  אֶתְכֶ֗ם  מִתַּ֙חַת֙  סִבְלֹ֣ת  מִצְרַ֔יִם  וְהִצַּלְתִּ֥י  אֶתְכֶ֖ם  מֵעֲבֹדָתָ֑ם  וְגָאַלְתִּ֤י  אֶתְכֶם֙  בִּזְרֹ֣ועַ  נְטוּיָ֔ה  וּבִשְׁפָטִ֖ים  גְּדֹלִֽים׃  7   וְלָקַחְתִּ֨י  אֶתְכֶ֥ם  לִי֙  לְעָ֔ם  וְהָיִ֥יתִי  לָכֶ֖ם  לֵֽאלֹהִ֑ים  וִֽידַעְתֶּ֗ם  כִּ֣י  אֲנִ֤י  יְהוָה֙  אֱלֹ֣הֵיכֶ֔ם  הַמֹּוצִ֣יא  אֶתְכֶ֔ם  מִתַּ֖חַת  סִבְלֹ֥ות  מִצְרָֽיִם׃  8   וְהֵבֵאתִ֤י  אֶתְכֶם֙  אֶל־  הָאָ֔רֶץ  אֲשֶׁ֤ר  נָשָׂ֙אתִי֙  אֶת־  יָדִ֔י  לָתֵ֣ת  אֹתָ֔הּ  לְאַבְרָהָ֥ם  לְיִצְחָ֖ק  וּֽלְיַעֲקֹ֑ב  וְנָתַתִּ֨י  אֹתָ֥הּ  לָכֶ֛ם  מֹורָשָׁ֖ה  אֲנִ֥י  יְהוָֽה׃ 


Moses vainly attempts to encourage the Israelites
9   וַיְדַבֵּ֥ר  מֹשֶׁ֛ה  כֵּ֖ן  אֶל־  בְּנֵ֣י  יִשְׂרָאֵ֑ל  וְלֹ֤א  שָֽׁמְעוּ֙  אֶל־  מֹשֶׁ֔ה  מִקֹּ֣צֶר  ר֔וּחַ  וּמֵעֲבֹדָ֖ה  קָשָֽׁה׃  פ 


He and Aaron are again sent to Pharaoh
10   וַיְדַבֵּ֥ר  יְהוָ֖ה  אֶל־  מֹשֶׁ֥ה  לֵּאמֹֽר׃  11   בֹּ֣א  דַבֵּ֔ר  אֶל־  פַּרְעֹ֖ה  מֶ֣לֶךְ  מִצְרָ֑יִם  וִֽישַׁלַּ֥ח  אֶת־  בְּנֵֽי־  יִשְׂרָאֵ֖ל  מֵאַרְצֹֽו׃  12   וַיְדַבֵּ֣ר  מֹשֶׁ֔ה  לִפְנֵ֥י  יְהוָ֖ה  לֵאמֹ֑ר  הֵ֤ן  בְּנֵֽי־  יִשְׂרָאֵל֙  לֹֽא־  שָׁמְע֣וּ  אֵלַ֔י  וְאֵיךְ֙  יִשְׁמָעֵ֣נִי  פַרְעֹ֔ה  וַאֲנִ֖י  עֲרַ֥ל  שְׂפָתָֽיִם׃  פ  13   וַיְדַבֵּ֣ר  יְהוָה֮  אֶל־  מֹשֶׁ֣ה  וְאֶֽל־  אַהֲרֹן֒  וַיְצַוֵּם֙  אֶל־  בְּנֵ֣י  יִשְׂרָאֵ֔ל  וְאֶל־  פַּרְעֹ֖ה  מֶ֣לֶךְ  מִצְרָ֑יִם  לְהֹוצִ֥יא  אֶת־  בְּנֵֽי־  יִשְׂרָאֵ֖ל  מֵאֶ֥רֶץ  מִצְרָֽיִם׃  ס 


Genealogies of Reuben, Simeon and Levi, of whom came Moses and Aaron
14   אֵ֖לֶּה  רָאשֵׁ֣י  בֵית־  אֲבֹתָ֑ם  בְּנֵ֨י  רְאוּבֵ֜ן  בְּכֹ֣ר  יִשְׂרָאֵ֗ל  חֲנֹ֤וךְ  וּפַלּוּא֙  חֶצְרֹ֣ון  וְכַרְמִ֔י  אֵ֖לֶּה  מִשְׁפְּחֹ֥ת  רְאוּבֵֽן׃  15   וּבְנֵ֣י  שִׁמְעֹ֗ון  יְמוּאֵ֨ל  וְיָמִ֤ין  וְאֹ֙הַד֙  וְיָכִ֣ין  וְצֹ֔חַר  וְשָׁא֖וּל  בֶּן־  הַֽכְּנַעֲנִ֑ית  אֵ֖לֶּה  מִשְׁפְּחֹ֥ת  שִׁמְעֹֽון׃  16   וְאֵ֨לֶּה  שְׁמֹ֤ות  בְּנֵֽי־  לֵוִי֙  לְתֹ֣לְדֹתָ֔ם  גֵּרְשֹׁ֕ון  וּקְהָ֖ת  וּמְרָרִ֑י  וּשְׁנֵי֙  חַיֵּ֣י  לֵוִ֔י  שֶׁ֧בַע  וּשְׁלֹשִׁ֛ים  וּמְאַ֖ת  שָׁנָֽה׃  17   בְּנֵ֥י  גֵרְשֹׁ֛ון  לִבְנִ֥י  וְשִׁמְעִ֖י  לְמִשְׁפְּחֹתָֽם׃  18   וּבְנֵ֣י  קְהָ֔ת  עַמְרָ֣ם  וְיִצְהָ֔ר  וְחֶבְרֹ֖ון  וְעֻזִּיאֵ֑ל  וּשְׁנֵי֙  חַיֵּ֣י  קְהָ֔ת  שָׁלֹ֧שׁ  וּשְׁלֹשִׁ֛ים  וּמְאַ֖ת  שָׁנָֽה׃  19   וּבְנֵ֥י  מְרָרִ֖י  מַחְלִ֣י  וּמוּשִׁ֑י  אֵ֛לֶּה  מִשְׁפְּחֹ֥ת  הַלֵּוִ֖י  לְתֹלְדֹתָֽם׃  20   וַיִּקַּ֨ח  עַמְרָ֜ם  אֶת־  יֹוכֶ֤בֶד  דֹּֽדָתֹו֙  לֹ֣ו  לְאִשָּׁ֔ה  וַתֵּ֣לֶד  לֹ֔ו  אֶֽת־  אַהֲרֹ֖ן  וְאֶת־  מֹשֶׁ֑ה  וּשְׁנֵי֙  חַיֵּ֣י  עַמְרָ֔ם  שֶׁ֧בַע  וּשְׁלֹשִׁ֛ים  וּמְאַ֖ת  שָׁנָֽה׃  21   וּבְנֵ֖י  יִצְהָ֑ר  קֹ֥רַח  וָנֶ֖פֶג  וְזִכְרִֽי׃  22   וּבְנֵ֖י  עֻזִּיאֵ֑ל  מִֽישָׁאֵ֥ל  וְאֶלְצָפָ֖ן  וְסִתְרִֽי׃  23   וַיִּקַּ֨ח  אַהֲרֹ֜ן  אֶת־  אֱלִישֶׁ֧בַע  בַּת־  עַמִּינָדָ֛ב  אֲחֹ֥ות  נַחְשֹׁ֖ון  לֹ֣ו  לְאִשָּׁ֑ה  וַתֵּ֣לֶד  לֹ֗ו  אֶת־  נָדָב֙  וְאֶת־  אֲבִיה֔וּא  אֶת־  אֶלְעָזָ֖ר  וְאֶת־  אִֽיתָמָֽר׃  24   וּבְנֵ֣י  קֹ֔רַח  אַסִּ֥יר  וְאֶלְקָנָ֖ה  וַאֲבִיאָסָ֑ף  אֵ֖לֶּה  מִשְׁפְּחֹ֥ת  הַקָּרְחִֽי׃  25   וְאֶלְעָזָ֨ר  בֶּֽן־  אַהֲרֹ֜ן  לָקַֽח־  לֹ֨ו  מִבְּנֹ֤ות  פּֽוּטִיאֵל֙  לֹ֣ו  לְאִשָּׁ֔ה  וַתֵּ֥לֶד  לֹ֖ו  אֶת־  פִּֽינְחָ֑ס  אֵ֗לֶּה  רָאשֵׁ֛י  אֲבֹ֥ות  הַלְוִיִּ֖ם  לְמִשְׁפְּחֹתָֽם׃ 


The history resumed
26   ה֥וּא  אַהֲרֹ֖ן  וּמֹשֶׁ֑ה  אֲשֶׁ֨ר  אָמַ֤ר  יְהוָה֙  לָהֶ֔ם  הֹוצִ֜יאוּ  אֶת־  בְּנֵ֧י  יִשְׂרָאֵ֛ל  מֵאֶ֥רֶץ  מִצְרַ֖יִם  עַל־  צִבְאֹתָֽם׃  27   הֵ֗ם  הַֽמְדַבְּרִים֙  אֶל־  פַּרְעֹ֣ה  מֶֽלֶךְ־  מִצְרַ֔יִם  לְהֹוצִ֥יא  אֶת־  בְּנֵֽי־  יִשְׂרָאֵ֖ל  מִמִּצְרָ֑יִם  ה֥וּא  מֹשֶׁ֖ה  וְאַהֲרֹֽן׃  28   וַיְהִ֗י  בְּיֹ֨ום  דִּבֶּ֧ר  יְהוָ֛ה  אֶל־  מֹשֶׁ֖ה  בְּאֶ֥רֶץ  מִצְרָֽיִם׃  פ  29   וַיְדַבֵּ֧ר  יְהוָ֛ה  אֶל־  מֹשֶׁ֥ה  לֵּאמֹ֖ר  אֲנִ֣י  יְהוָ֑ה  דַּבֵּ֗ר  אֶל־  פַּרְעֹה֙  מֶ֣לֶךְ  מִצְרַ֔יִם  אֵ֛ת  כָּל־  אֲשֶׁ֥ר  אֲנִ֖י  דֹּבֵ֥ר  אֵלֶֽיךָ׃  30   וַיֹּ֥אמֶר  מֹשֶׁ֖ה  לִפְנֵ֣י  יְהוָ֑ה  הֵ֤ן  אֲנִי֙  עֲרַ֣ל  שְׂפָתַ֔יִם  וְאֵ֕יךְ  יִשְׁמַ֥ע  אֵלַ֖י  פַּרְעֹֽה׃  פ 

<< Exodus 6 >>
Biblos Greek and Hebrew Study Bible © 2010 Biblos.com
Online Parallel Bible