<< Exodus 17 HEB >>


The people murmur for water to Rephidim
1   וַ֠יִּסְעוּ  כָּל־  עֲדַ֨ת  בְּנֵֽי־  יִשְׂרָאֵ֧ל  מִמִּדְבַּר־  סִ֛ין  לְמַסְעֵיהֶ֖ם  עַל־  פִּ֣י  יְהוָ֑ה  וַֽיַּחֲנוּ֙  בִּרְפִידִ֔ים  וְאֵ֥ין  מַ֖יִם  לִשְׁתֹּ֥ת  הָעָֽם׃  2   וַיָּ֤רֶב  הָעָם֙  עִם־  מֹשֶׁ֔ה  וַיֹּ֣אמְר֔וּ  תְּנוּ־  לָ֥נוּ  מַ֖יִם  וְנִשְׁתֶּ֑ה  וַיֹּ֤אמֶר  לָהֶם֙  מֹשֶׁ֔ה  מַה־  תְּרִיבוּן֙  עִמָּדִ֔י  מַה־  תְּנַסּ֖וּן  אֶת־  יְהוָֽה׃  3   וַיִּצְמָ֨א  שָׁ֤ם  הָעָם֙  לַמַּ֔יִם  וַיָּ֥לֶן  הָעָ֖ם  עַל־  מֹשֶׁ֑ה  וַיֹּ֗אמֶר  לָ֤מָּה  זֶּה֙  הֶעֱלִיתָ֣נוּ  מִמִּצְרַ֔יִם  לְהָמִ֥ית  אֹתִ֛י  וְאֶת־  בָּנַ֥י  וְאֶת־  מִקְנַ֖י  בַּצָּמָֽא׃  4   וַיִּצְעַ֤ק  מֹשֶׁה֙  אֶל־  יְהוָ֣ה  לֵאמֹ֔ר  מָ֥ה  אֶעֱשֶׂ֖ה  לָעָ֣ם  הַזֶּ֑ה  עֹ֥וד  מְעַ֖ט  וּסְקָלֻֽנִי׃  5   וַיֹּ֨אמֶר  יְהוָ֜ה  אֶל־  מֹשֶׁ֗ה  עֲבֹר֙  לִפְנֵ֣י  הָעָ֔ם  וְקַ֥ח  אִתְּךָ֖  מִזִּקְנֵ֣י  יִשְׂרָאֵ֑ל  וּמַטְּךָ֗  אֲשֶׁ֨ר  הִכִּ֤יתָ  בֹּו֙  אֶת־  הַיְאֹ֔ר  קַ֥ח  בְּיָדְךָ֖  וְהָלָֽכְתָּ׃ 


God send them for water to the rock in Horeb
6   הִנְנִ֣י  עֹמֵד֩  לְפָנֶ֨יךָ  שָּׁ֥ם  עַֽל־  הַצּוּר֮  בְּחֹרֵב֒  וְהִכִּ֣יתָ  בַצּ֗וּר  וְיָצְא֥וּ  מִמֶּ֛נּוּ  מַ֖יִם  וְשָׁתָ֣ה  הָעָ֑ם  וַיַּ֤עַשׂ  כֵּן֙  מֹשֶׁ֔ה  לְעֵינֵ֖י  זִקְנֵ֥י  יִשְׂרָאֵֽל׃ 


The place is called Massah and Meribah
7   וַיִּקְרָא֙  שֵׁ֣ם  הַמָּקֹ֔ום  מַסָּ֖ה  וּמְרִיבָ֑ה  עַל־  רִ֣יב  בְּנֵ֣י  יִשְׂרָאֵ֗ל  וְעַ֨ל  נַסֹּתָ֤ם  אֶת־  יְהוָה֙  לֵאמֹ֔ר  הֲיֵ֧שׁ  יְהוָ֛ה  בְּקִרְבֵּ֖נוּ  אִם־  אָֽיִן׃  פ 


Amalek is overcome by Joshua, while Moses holds up his hand
8   וַיָּבֹ֖א  עֲמָלֵ֑ק  וַיִּלָּ֥חֶם  עִם־  יִשְׂרָאֵ֖ל  בִּרְפִידִֽם׃  9   וַיֹּ֨אמֶר  מֹשֶׁ֤ה  אֶל־  יְהֹושֻׁ֙עַ֙  בְּחַר־  לָ֣נוּ  אֲנָשִׁ֔ים  וְצֵ֖א  הִלָּחֵ֣ם  בַּעֲמָלֵ֑ק  מָחָ֗ר  אָנֹכִ֤י  נִצָּב֙  עַל־  רֹ֣אשׁ  הַגִּבְעָ֔ה  וּמַטֵּ֥ה  הָאֱלֹהִ֖ים  בְּיָדִֽי׃  10   וַיַּ֣עַשׂ  יְהֹושֻׁ֗עַ  כַּאֲשֶׁ֤ר  אָֽמַר־  לֹו֙  מֹשֶׁ֔ה  לְהִלָּחֵ֖ם  בַּעֲמָלֵ֑ק  וּמֹשֶׁה֙  אַהֲרֹ֣ן  וְח֔וּר  עָל֖וּ  רֹ֥אשׁ  הַגִּבְעָֽה׃  11   וְהָיָ֗ה  כַּאֲשֶׁ֨ר  יָרִ֥ים  מֹשֶׁ֛ה  יָדֹ֖ו  וְגָבַ֣ר  יִשְׂרָאֵ֑ל  וְכַאֲשֶׁ֥ר  יָנִ֛יחַ  יָדֹ֖ו  וְגָבַ֥ר  עֲמָלֵֽק׃  12   וִידֵ֤י  מֹשֶׁה֙  כְּבֵדִ֔ים  וַיִּקְחוּ־  אֶ֛בֶן  וַיָּשִׂ֥ימוּ  תַחְתָּ֖יו  וַיֵּ֣שֶׁב  עָלֶ֑יהָ  וְאַהֲרֹ֨ן  וְח֜וּר  תָּֽמְכ֣וּ  בְיָדָ֗יו  מִזֶּ֤ה  אֶחָד֙  וּמִזֶּ֣ה  אֶחָ֔ד  וַיְהִ֥י  יָדָ֛יו  אֱמוּנָ֖ה  עַד־  בֹּ֥א  הַשָּֽׁמֶשׁ׃  13   וַיַּחֲלֹ֧שׁ  יְהֹושֻׁ֛עַ  אֶת־  עֲמָלֵ֥ק  וְאֶת־  עַמֹּ֖ו  לְפִי־  חָֽרֶב׃  פ 


Amalek is doomed to destruction; and Moses builds the altar Jehovah-nissi
14   וַיֹּ֨אמֶר  יְהוָ֜ה  אֶל־  מֹשֶׁ֗ה  כְּתֹ֨ב  זֹ֤את  זִכָּרֹון֙  בַּסֵּ֔פֶר  וְשִׂ֖ים  בְּאָזְנֵ֣י  יְהֹושֻׁ֑עַ  כִּֽי־  מָחֹ֤ה  אֶמְחֶה֙  אֶת־  זֵ֣כֶר  עֲמָלֵ֔ק  מִתַּ֖חַת  הַשָּׁמָֽיִם׃  15   וַיִּ֥בֶן  מֹשֶׁ֖ה  מִזְבֵּ֑חַ  וַיִּקְרָ֥א  שְׁמֹ֖ו  יְהוָ֥ה  נִסִּֽי׃  16   וַיֹּ֗אמֶר  כִּֽי־  יָד֙  עַל־  כֵּ֣ס  יָ֔הּ  מִלְחָמָ֥ה  לַיהוָ֖ה  בַּֽעֲמָלֵ֑ק  מִדֹּ֖ר  דֹּֽר׃  פ 
<< Exodus 17 >>
Biblos Greek and Hebrew Study Bible © 2010 Biblos.com
Online Parallel Bible