<< Ecclesiastes 6 HEB >>


the vanity of riches without use
1   יֵ֣שׁ  רָעָ֔ה  אֲשֶׁ֥ר  רָאִ֖יתִי  תַּ֣חַת  הַשָּׁ֑מֶשׁ  וְרַבָּ֥ה  הִ֖יא  עַל־  הָאָדָֽם׃  2   אִ֣ישׁ  אֲשֶׁ֣ר  יִתֶּן־  לֹ֣ו  הָאֱלֹהִ֡ים  עֹשֶׁר֩  וּנְכָסִ֨ים  וְכָבֹ֜וד  וְֽאֵינֶ֨נּוּ  חָסֵ֥ר  לְנַפְשֹׁ֣ו  מִכֹּ֣ל  אֲשֶׁר־  יִתְאַוֶּ֗ה  וְלֹֽא־  יַשְׁלִיטֶ֤נּוּ  הָֽאֱלֹהִים֙  לֶאֱכֹ֣ל  מִמֶּ֔נּוּ  כִּ֛י  אִ֥ישׁ  נָכְרִ֖י  יֹֽאכֲלֶ֑נּוּ  זֶ֥ה  הֶ֛בֶל  וָחֳלִ֥י  רָ֖ע  הֽוּא׃ 


though a man have many children and a long life
3   אִם־  יֹולִ֣יד  אִ֣ישׁ  מֵאָ֡ה  וְשָׁנִים֩  רַבֹּ֨ות  יִֽחְיֶ֜ה  וְרַ֣ב  שֶׁיִּהְי֣וּ  יְמֵֽי־  שָׁנָ֗יו  וְנַפְשֹׁו֙  לֹא־  תִשְׂבַּ֣ע  מִן־  הַטֹּובָ֔ה  וְגַם־  קְבוּרָ֖ה  לֹא־  הָ֣יְתָה  לֹּ֑ו  אָמַ֕רְתִּי  טֹ֥וב  מִמֶּ֖נּוּ  הַנָּֽפֶל׃  4   כִּֽי־  בַהֶ֥בֶל  בָּ֖א  וּבַחֹ֣שֶׁךְ  יֵלֵ֑ךְ  וּבַחֹ֖שֶׁךְ  שְׁמֹ֥ו  יְכֻסֶּֽה׃  5   גַּם־  שֶׁ֥מֶשׁ  לֹא־  רָאָ֖ה  וְלֹ֣א  יָדָ֑ע  נַ֥חַת  לָזֶ֖ה  מִזֶּֽה׃  6   וְאִלּ֣וּ  חָיָ֗ה  אֶ֤לֶף  שָׁנִים֙  פַּעֲמַ֔יִם  וְטֹובָ֖ה  לֹ֣א  רָאָ֑ה  הֲלֹ֛א  אֶל־  מָקֹ֥ום  אֶחָ֖ד  הַכֹּ֥ל  הֹולֵֽךְ׃ 


the vanity of sight and wandering desires
7   כָּל־  עֲמַ֥ל  הָאָדָ֖ם  לְפִ֑יהוּ  וְגַם־  הַנֶּ֖פֶשׁ  לֹ֥א  תִמָּלֵֽא׃  8   כִּ֛י  מַה־  יֹּותֵ֥ר  לֶחָכָ֖ם  מִֽן־  הַכְּסִ֑יל  מַה־  לֶּעָנִ֣י  יֹודֵ֔עַ  לַהֲלֹ֖ךְ  נֶ֥גֶד  הַחַיִּֽים׃  9   טֹ֛וב  מַרְאֵ֥ה  עֵינַ֖יִם  מֵֽהֲלָךְ־  נָ֑פֶשׁ  גַּם־  זֶ֥ה  הֶ֖בֶל  וּרְע֥וּת  רֽוּחַ׃ 


The conclusion of vanities
10   מַה־  שֶּֽׁהָיָ֗ה  כְּבָר֙  נִקְרָ֣א  שְׁמֹ֔ו  וְנֹודָ֖ע  אֲשֶׁר־  ה֣וּא  אָדָ֑ם  וְלֹא־  יוּכַ֣ל  לָדִ֔ין  עִ֥ם  [שֶׁהַתְקִיף  כ]  (שֶׁתַּקִּ֖יף  ק)  מִמֶּֽנּוּ׃  11   כִּ֛י  יֵשׁ־  דְּבָרִ֥ים  הַרְבֵּ֖ה  מַרְבִּ֣ים  הָ֑בֶל  מַה־  יֹּתֵ֖ר  לָאָדָֽם׃  12   כִּ֣י  מִֽי־  יֹודֵעַ֩  מַה־  טֹּ֨וב  לָֽאָדָ֜ם  בַּֽחַיִּ֗ים  מִסְפַּ֛ר  יְמֵי־  חַיֵּ֥י  הֶבְלֹ֖ו  וְיַעֲשֵׂ֣ם  כַּצֵּ֑ל  אֲשֶׁר֙  מִֽי־  יַגִּ֣יד  לָֽאָדָ֔ם  מַה־  יִּהְיֶ֥ה  אַחֲרָ֖יו  תַּ֥חַת  הַשָּֽׁמֶשׁ׃ 
<< Ecclesiastes 6 >>
Biblos Greek and Hebrew Study Bible © 2010 Biblos.com
Online Parallel Bible