<< Ecclesiastes 4 HEB >>


vanity is increased unto men by oppression
1   וְשַׁ֣בְתִּֽי  אֲנִ֗י  וָאֶרְאֶה֙  אֶת־  כָּל־  הָ֣עֲשֻׁקִ֔ים  אֲשֶׁ֥ר  נַעֲשִׂ֖ים  תַּ֣חַת  הַשָּׁ֑מֶשׁ  וְהִנֵּ֣ה  דִּמְעַ֣ת  הָעֲשֻׁקִ֗ים  וְאֵ֤ין  לָהֶם֙  מְנַחֵ֔ם  וּמִיַּ֤ד  עֹֽשְׁקֵיהֶם֙  כֹּ֔חַ  וְאֵ֥ין  לָהֶ֖ם  מְנַחֵֽם׃  2   וְשַׁבֵּ֧חַ  אֲנִ֛י  אֶת־  הַמֵּתִ֖ים  שֶׁכְּבָ֣ר  מֵ֑תוּ  מִן־  הַ֣חַיִּ֔ים  אֲשֶׁ֛ר  הֵ֥מָּה  חַיִּ֖ים  עֲדֶֽנָה׃  3   וְטֹוב֙  מִשְּׁנֵיהֶ֔ם  אֵ֥ת  אֲשֶׁר־  עֲדֶ֖ן  לֹ֣א  הָיָ֑ה  אֲשֶׁ֤ר  לֹֽא־  רָאָה֙  אֶת־  הַמַּעֲשֶׂ֣ה  הָרָ֔ע  אֲשֶׁ֥ר  נַעֲשָׂ֖ה  תַּ֥חַת  הַשָּֽׁמֶשׁ׃ 


by envy
4   וְרָאִ֨יתִֽי  אֲנִ֜י  אֶת־  כָּל־  עָמָ֗ל  וְאֵת֙  כָּל־  כִּשְׁרֹ֣ון  הַֽמַּעֲשֶׂ֔ה  כִּ֛י  הִ֥יא  קִנְאַת־  אִ֖ישׁ  מֵרֵעֵ֑הוּ  גַּם־  זֶ֥ה  הֶ֖בֶל  וּרְע֥וּת  רֽוּחַ׃ 


by idleness
5   הַכְּסִיל֙  חֹבֵ֣ק  אֶת־  יָדָ֔יו  וְאֹכֵ֖ל  אֶת־  בְּשָׂרֹֽו׃  6   טֹ֕וב  מְלֹ֥א  כַ֖ף  נָ֑חַת  מִמְּלֹ֥א  חָפְנַ֛יִם  עָמָ֖ל  וּרְע֥וּת  רֽוּחַ׃ 


by covetousness
7   וְשַׁ֧בְתִּי  אֲנִ֛י  וָאֶרְאֶ֥ה  הֶ֖בֶל  תַּ֥חַת  הַשָּֽׁמֶשׁ׃  8   יֵ֣שׁ  אֶחָד֩  וְאֵ֨ין  שֵׁנִ֜י  גַּ֣ם  בֵּ֧ן  וָאָ֣ח  אֵֽין־  לֹ֗ו  וְאֵ֥ין  קֵץ֙  לְכָל־  עֲמָלֹ֔ו  גַּם־  [עֵינָיו  כ]  (עֵינֹ֖ו  ק)  לֹא־  תִשְׂבַּ֣ע  עֹ֑שֶׁר  וּלְמִ֣י  אֲנִ֣י  עָמֵ֗ל  וּמְחַסֵּ֤ר  אֶת־  נַפְשִׁי֙  מִטֹּובָ֔ה  גַּם־  זֶ֥ה  הֶ֛בֶל  וְעִנְיַ֥ן  רָ֖ע  הֽוּא׃ 


by solitariness
9   טֹובִ֥ים  הַשְּׁנַ֖יִם  מִן־  הָאֶחָ֑ד  אֲשֶׁ֧ר  יֵשׁ־  לָהֶ֛ם  שָׂכָ֥ר  טֹ֖וב  בַּעֲמָלָֽם׃  10   כִּ֣י  אִם־  יִפֹּ֔לוּ  הָאֶחָ֖ד  יָקִ֣ים  אֶת־  חֲבֵרֹ֑ו  וְאִ֣ילֹ֗ו  הָֽאֶחָד֙  שֶׁיִּפֹּ֔ול  וְאֵ֥ין  שֵׁנִ֖י  לַהֲקִימֹֽו׃  11   גַּ֛ם  אִם־  יִשְׁכְּב֥וּ  שְׁנַ֖יִם  וְחַ֣ם  לָהֶ֑ם  וּלְאֶחָ֖ד  אֵ֥יךְ  יֵחָֽם׃  12   וְאִֽם־  יִתְקְפֹו֙  הָאֶחָ֔ד  הַשְּׁנַ֖יִם  יַעַמְד֣וּ  נֶגְדֹּ֑ו  וְהַחוּט֙  הַֽמְשֻׁלָּ֔שׁ  לֹ֥א  בִמְהֵרָ֖ה  יִנָּתֵֽק׃ 


by willfulness
13   טֹ֛וב  יֶ֥לֶד  מִסְכֵּ֖ן  וְחָכָ֑ם  מִמֶּ֤לֶךְ  זָקֵן֙  וּכְסִ֔יל  אֲשֶׁ֛ר  לֹא־  יָדַ֥ע  לְהִזָּהֵ֖ר  עֹֽוד׃  14   כִּֽי־  מִבֵּ֥ית  הָסוּרִ֖ים  יָצָ֣א  לִמְלֹ֑ךְ  כִּ֛י  גַּ֥ם  בְּמַלְכוּתֹ֖ו  נֹולַ֥ד  רָֽשׁ׃  15   רָאִ֙יתִי֙  אֶת־  כָּל־  הַ֣חַיִּ֔ים  הַֽמְהַלְּכִ֖ים  תַּ֣חַת  הַשָּׁ֑מֶשׁ  עִ֚ם  הַיֶּ֣לֶד  הַשֵּׁנִ֔י  אֲשֶׁ֥ר  יַעֲמֹ֖ד  תַּחְתָּֽיו׃  16   אֵֽין־  קֵ֣ץ  לְכָל־  הָעָ֗ם  לְכֹ֤ל  אֲשֶׁר־  הָיָה֙  לִפְנֵיהֶ֔ם  גַּ֥ם  הָאַחֲרֹונִ֖ים  לֹ֣א  יִשְׂמְחוּ־  בֹ֑ו  כִּֽי־  גַם־  זֶ֥ה  הֶ֖בֶל  וְרַעְיֹ֥ון  רֽוּחַ׃ 
<< Ecclesiastes 4 >>
Biblos Greek and Hebrew Study Bible © 2010 Biblos.com
Online Parallel Bible