<< 2 Peter 2 GRK >>


Peter warns of false teachers, showing the impiety and punishment both of them and their followers;
   1   Ἐγένοντο  δὲ  καὶ  ψευδοπροφῆται  ἐν  τῷ  λαῷ  ὡς  καὶ  ἐν  ὑμῖν  ἔσονται  ψευδοδιδάσκαλοι,  οἵτινες  παρεισάξουσιν  αἱρέσεις  ἀπωλείας  καὶ  τὸν  ἀγοράσαντα  αὐτοὺς  δεσπότην  ἀρνούμενοι.  ἐπάγοντες  ἑαυτοῖς  ταχινὴν  ἀπώλειαν,  2   καὶ  πολλοὶ  ἐξακολουθήσουσιν  αὐτῶν  ταῖς  ἀσελγείαις  δι’  οὒς  ἡ  ὁδὸς  τῆς  ἀληθείας  βλασφημηθήσεται,  3   καὶ  ἐν  πλεονεξίᾳ  πλαστοῖς  λόγοις  ὑμᾶς  ἐμπορεύσονται,  οἷς  τὸ  κρίμα  ἔκπαλαι  οὐκ  ἀργεῖ  καὶ  ἡ  ἀπώλεια  αὐτῶν  οὐ  νυστάζει. 
   4   Εἰ  γὰρ  ὁ  θεὸς  ἀγγέλων  ἁμαρτησάντων  οὐκ  ἐφείσατο  ἀλλὰ  σειροῖς  ζόφου  ταρταρώσας  παρέδωκεν  εἰς  κρίσιν  τηρουμένους,  5   καὶ  ἀρχαίου  κόσμου  οὐκ  ἐφείσατο  ἀλλὰ  ὄγδοον  Νῶε  δικαιοσύνης  κήρυκα  ἐφύλαξεν  κατακλυσμὸν  κόσμῳ  ἀσεβῶν  ἐπάξας,  6   καὶ  πόλεις  Σοδόμων  καὶ  Γομόρρας  τεφρώσας  κατέκρινεν  ὑπόδειγμα  μελλόντων  ἀσεβέσιν  τεθεικώς, 


from which the godly shall be delivered, as Lot was out of Sodom;
7   καὶ  δίκαιον  Λὼτ  καταπονούμενον  ὑπὸ  τῆς  τῶν  ἀθέσμων  ἐν  ἀσελγείᾳ  ἀναστροφῆς  ἐρρύσατο·  8   βλέμματι  γὰρ  καὶ  ἀκοῇ  δίκαιος  ἐγκατοικῶν  ἐν  αὐτοῖς  ἡμέραν  ἐξ  ἡμέρας  ψυχὴν  δικαίαν  ἀνόμοις  ἔργοις  ἐβασάνιζεν·  9   οἶδεν  κύριος  εὐσεβεῖς  ἐκ  πειρασμοῦ  ῥύεσθαι,  ἀδίκους  δὲ  εἰς  ἡμέραν  κρίσεως  κολαζομένους  τηρεῖν, 


and more fully describes the manners of those profane and blasphemous seducers.
10   μάλιστα  δὲ  τοὺς  ὀπίσω  σαρκὸς  ἐν  ἐπιθυμίᾳ  μιασμοῦ  πορευομένους  καὶ  κυριότητος  καταφρονοῦντας. 
   Τολμηταὶ  αὐθάδεις,  δόξας  οὐ  τρέμουσιν  βλασφημοῦντες,  11   ὅπου  ἄγγελοι  ἰσχύϊ  καὶ  δυνάμει  μείζονες  ὄντες  οὐ  φέρουσιν  κατ’  αὐτῶν  παρὰ  κυρίῳ  βλάσφημον  κρίσιν.  12   οὗτοι  δὲ  ὡς  ἄλογα  ζῷα  γεγεννημένα  φυσικὰ  εἰς  ἅλωσιν  καὶ  φθορὰν  ἐν  οἷς  ἀγνοοῦσιν  βλασφημοῦντες,  ἐν  τῇ  φθορᾷ  αὐτῶν  καὶ  φθαρήσονται  13   ἀδικούμενοι  μισθὸν  ἀδικίας,  ἡδονὴν  ἡγούμενοι  τὴν  ἐν  ἡμέρᾷ  τρυφήν,  σπίλοι  καὶ  μῶμοι  ἐντρυφῶντες  ἐν  ταῖς  ἀπάταις  αὐτῶν  συνευωχούμενοι  ὑμῖν,  14   ὀφθαλμοὺς  ἔχοντες  μεστοὺς  μοιχαλίδος  καὶ  ἀκαταπάστους  ἁμαρτίας.  δελεάζοντες  ψυχὰς  ἀστηρίκτους,  καρδίαν  γεγυμνασμένην  πλεονεξίας  ἔχοντες,  κατάρας  τέκνα·  15   καταλείποντες  εὐθεῖαν  ὁδὸν  ἐπλανήθησαν,  ἐξακολουθήσαντες  τῇ  ὁδῷ  τοῦ  βαλαὰμ  τοῦ  βεωρ,  ὃς  μισθὸν  ἀδικίας  ἠγάπησεν  16   ἔλεγξιν  δὲ  ἔσχεν  ἰδίας  παρανομίας·  ὑποζύγιον  ἀφώνον  ἐν  ἀνθρώπου  φωνῇ  φθεγξάμενον  ἐκώλυσεν  τὴν  τοῦ  προφήτου  παραφρονίαν. 
   17   Οὕτοι  εἰσιν  πηγαὶ  ἄνυδροι  καὶ  ὀμίχλαι  ὑπὸ  λαίλαπος  ἐλαυνόμεναι,  οἷς  ὁ  ζόφος  τοῦ  σκότους  τετήρηται.  18   ὑπέρογκα  γὰρ  ματαιότητος  φθεγγόμενοι  δελεάζουσιν  ἐν  ἐπιθυμίαις  σαρκὸς  ἀσελγείαις  τοὺς  ὀλίγως  αποφεύγοντας  τοὺς  ἐν  πλάνῃ  ἀναστρεφομένους,  19   ἐλευθερίαν  αὐτοῖς  ἐπαγγελλόμενοι,  αὐτοὶ  δοῦλοι  ὑπάρχοντες  τῆς  φθορᾶς·  ᾧ  γάρ  τις  ἥττηται  τούτῳ  δεδούλωται.  20   εἰ  γὰρ  ἀποφυγόντες  τὰ  μιάσματα  τοῦ  κόσμου  ἐν  ἐπιγνώσει  τοῦ  κυρίου  καὶ  σωτῆρος  Ἰησοῦ  Χριστοῦ  τούτοις  δὲ  πάλιν  ἐμπλακέντες  ἡττῶνται  γέγονεν  αὐτοῖς  τὰ  ἔσχατα  χείρονα  τῶν  πρώτων.  21   κρεῖττον  γὰρ  ἦν  αὐτοῖς  μὴ  ἐπεγνωκέναι  τὴν  ὁδὸν  τῆς  δικαιοσύνης  ἢ  ἐπιγνοῦσιν  ὑποστρέψαι  ἐκ  τῆς  παραδοθείσης  αὐτοῖς  ἀγίας  ἐντολῆς.  22   συμβέβηκεν  αὐτοῖς  τὸ  τῆς  ἀληθοῦς  παροιμίας· 
      Κύων  ἐπιστρέψας  ἐπὶ  τὸ  ἴδιον  ἐξέραμα, 
καὶ 
      Ὗς  λουσαμένη  εἰς  κυλισμὸν  βορβόρου. 
<< 2 Peter 2 >>
Biblos Greek and Hebrew Study Bible © 2010 Biblos.com
Online Parallel Bible