<< 2 Chronicles 3 HEB >>


The place and time of building the temple
1   וַיָּ֣חֶל  שְׁלֹמֹ֗ה  לִבְנֹ֤ות  אֶת־  בֵּית־  יְהוָה֙  בִּיר֣וּשָׁלִַ֔ם  בְּהַר֙  הַמֹּ֣ורִיָּ֔ה  אֲשֶׁ֥ר  נִרְאָ֖ה  לְדָוִ֣יד  אָבִ֑יהוּ  אֲשֶׁ֤ר  הֵכִין֙  בִּמְקֹ֣ום  דָּוִ֔יד  בְּגֹ֖רֶן  אָרְנָ֥ן  הַיְבוּסִֽי׃  2   וַ֠יָּחֶל  לִבְנֹ֞ות  בַּחֹ֤דֶשׁ  הַשֵּׁנִי֙  בַּשֵּׁנִ֔י  בִּשְׁנַ֥ת  אַרְבַּ֖ע  לְמַלְכוּתֹֽו׃ 


The measure and ornaments of the house
3   וְאֵ֙לֶּה֙  הוּסַ֣ד  שְׁלֹמֹ֔ה  לִבְנֹ֖ות  אֶת־  בֵּ֣ית  הָאֱלֹהִ֑ים  הָאֹ֡רֶךְ  אַמֹּ֞ות  בַּמִּדָּ֤ה  הָרִֽאשֹׁונָה֙  אַמֹּ֣ות  שִׁשִּׁ֔ים  וְרֹ֖חַב  אַמֹּ֥ות  עֶשְׂרִֽים׃  4   וְהָאוּלָ֡ם  אֲשֶׁר֩  עַל־  פְּנֵ֨י  הָאֹ֜רֶךְ  עַל־  פְּנֵ֤י  רֹֽחַב־  הַבַּ֙יִת֙  אַמֹּ֣ות  עֶשְׂרִ֔ים  וְהַגֹּ֖בַהּ  מֵאָ֣ה  וְעֶשְׂרִ֑ים  וַיְצַפֵּ֥הוּ  מִפְּנִ֖ימָה  זָהָ֥ב  טָהֹֽור׃  5   וְאֵ֣ת  הַבַּ֣יִת  הַגָּדֹ֗ול  חִפָּה֙  עֵ֣ץ  בְּרֹושִׁ֔ים  וַיְחַפֵּ֖הוּ  זָהָ֣ב  טֹ֑וב  וַיַּ֧עַל  עָלָ֛יו  תִּמֹרִ֖ים  וְשַׁרְשְׁרֹֽות׃  6   וַיְצַ֧ף  אֶת־  הַבַּ֛יִת  אֶ֥בֶן  יְקָרָ֖ה  לְתִפְאָ֑רֶת  וְהַזָּהָ֖ב  זְהַ֥ב  פַּרְוָֽיִם׃  7   וַיְחַ֨ף  אֶת־  הַבַּ֜יִת  הַקֹּרֹ֧ות  הַסִּפִּ֛ים  וְקִֽירֹותָ֥יו  וְדַלְתֹותָ֖יו  זָהָ֑ב  וּפִתַּ֥ח  כְּרוּבִ֖ים  עַל־  הַקִּירֹֽות׃  ס  8   וַיַּ֙עַשׂ֙  אֶת־  בֵּֽית־  קֹ֣דֶשׁ  הַקֳּדָשִׁ֔ים  אָרְכֹּ֞ו  עַל־  פְּנֵ֤י  רֹֽחַב־  הַבַּ֙יִת֙  אַמֹּ֣ות  עֶשְׂרִ֔ים  וְרָחְבֹּ֖ו  אַמֹּ֣ות  עֶשְׂרִ֑ים  וַיְחַפֵּ֙הוּ֙  זָהָ֣ב  טֹ֔וב  לְכִכָּרִ֖ים  שֵׁ֥שׁ  מֵאֹֽות׃  9   וּמִשְׁקָ֛ל  לְמִסְמְרֹ֥ות  לִשְׁקָלִ֖ים  חֲמִשִּׁ֣ים  זָהָ֑ב  וְהָעֲלִיֹּ֖ות  חִפָּ֥ה  זָהָֽב׃  10   וַיַּ֜עַשׂ  בְּבֵֽית־  קֹ֤דֶשׁ  הַקֳּדָשִׁים֙  כְּרוּבִ֣ים  שְׁנַ֔יִם  מַעֲשֵׂ֖ה  צַעֲצֻעִ֑ים  וַיְצַפּ֥וּ  אֹתָ֖ם  זָהָֽב׃ 


The cherubim
11   וְכַנְפֵי֙  הַכְּרוּבִ֔ים  אָרְכָּ֖ם  אַמֹּ֣ות  עֶשְׂרִ֑ים  כְּנַ֨ף  הָאֶחָ֜ד  לְאַמֹּ֣ות  חָמֵ֗שׁ  מַגַּ֙עַת֙  לְקִ֣יר  הַבַּ֔יִת  וְהַכָּנָ֤ף  הָאַחֶ֙רֶת֙  אַמֹּ֣ות  חָמֵ֔שׁ  מַגִּ֕יעַ  לִכְנַ֖ף  הַכְּר֥וּב  הָאַחֵֽר׃  12   וּכְנַ֨ף  הַכְּר֤וּב  הָאֶחָד֙  אַמֹּ֣ות  חָמֵ֔שׁ  מַגִּ֖יעַ  לְקִ֣יר  הַבָּ֑יִת  וְהַכָּנָ֤ף  הָאַחֶ֙רֶת֙  אַמֹּ֣ות  חָמֵ֔שׁ  דְּבֵקָ֕ה  לִכְנַ֖ף  הַכְּר֥וּב  הָאַחֵֽר׃  13   כַּנְפֵי֙  הַכְּרוּבִ֣ים  הָאֵ֔לֶּה  פֹּֽרְשִׂ֖ים  אַמֹּ֣ות  עֶשְׂרִ֑ים  וְהֵ֛ם  עֹמְדִ֥ים  עַל־  רַגְלֵיהֶ֖ם  וּפְנֵיהֶ֥ם  לַבָּֽיִת׃  ס 


The veil and pillars
14   וַיַּ֙עַשׂ֙  אֶת־  הַפָּרֹ֔כֶת  תְּכֵ֥לֶת  וְאַרְגָּמָ֖ן  וְכַרְמִ֣יל  וּב֑וּץ  וַיַּ֥עַל  עָלָ֖יו  כְּרוּבִֽים׃  ס  15   וַיַּ֜עַשׂ  לִפְנֵ֤י  הַבַּ֙יִת֙  עַמּוּדִ֣ים  שְׁנַ֔יִם  אַמֹּ֕ות  שְׁלֹשִׁ֥ים  וְחָמֵ֖שׁ  אֹ֑רֶךְ  וְהַצֶּ֥פֶת  אֲשֶׁר־  עַל־  רֹאשֹׁ֖ו  אַמֹּ֥ות  חָמֵֽשׁ׃  ס  16   וַיַּ֤עַשׂ  שַׁרְשְׁרֹות֙  בַּדְּבִ֔יר  וַיִּתֵּ֖ן  עַל־  רֹ֣אשׁ  הָעַמֻּדִ֑ים  וַיַּ֤עַשׂ  רִמֹּונִים֙  מֵאָ֔ה  וַיִּתֵּ֖ן  בַּֽשַּׁרְשְׁרֹֽות׃  17   וַיָּ֤קֶם  אֶת־  הָֽעַמּוּדִים֙  עַל־  פְּנֵ֣י  הַהֵיכָ֔ל  אֶחָ֥ד  מִיָּמִ֖ין  וְאֶחָ֣ד  מֵֽהַשְּׂמֹ֑אול  וַיִּקְרָ֤א  שֵׁם־  [הַיְמִינִי  כ]  (הַיְמָנִי֙  ק)  יָכִ֔ין  וְשֵׁ֥ם  הַשְּׂמָאלִ֖י  בֹּֽעַז׃  ס 
<< 2 Chronicles 3 >>
Biblos Greek and Hebrew Study Bible © 2010 Biblos.com
Online Parallel Bible