<< 1 Samuel 29 HEB >>


David marching with the Philistines
1   וַיִּקְבְּצ֧וּ  פְלִשְׁתִּ֛ים  אֶת־  כָּל־  מַחֲנֵיהֶ֖ם  אֲפֵ֑קָה  וְיִשְׂרָאֵ֣ל  חֹנִ֔ים  בַּעַ֖יִן  אֲשֶׁ֥ר  בְּיִזְרְעֶֽאל׃  2   וְסַרְנֵ֤י  פְלִשְׁתִּים֙  עֹֽבְרִ֔ים  לְמֵאֹ֖ות  וְלַאֲלָפִ֑ים  וְדָוִ֣ד  וַאֲנָשָׁ֗יו  עֹֽבְרִ֛ים  בָּאַחֲרֹנָ֖ה  עִם־  אָכִֽישׁ׃ 


is disallowed by their princes
3   וַיֹּֽאמְרוּ֙  שָׂרֵ֣י  פְלִשְׁתִּ֔ים  מָ֖ה  הָעִבְרִ֣ים  הָאֵ֑לֶּה  וַיֹּ֨אמֶר  אָכִ֜ישׁ  אֶל־  שָׂרֵ֣י  פְלִשְׁתִּ֗ים  הֲלֹֽוא־  זֶ֨ה  דָוִ֜ד  עֶ֣בֶד  שָׁא֣וּל  מֶֽלֶךְ־  יִשְׂרָאֵ֗ל  אֲשֶׁ֨ר  הָיָ֤ה  אִתִּי֙  זֶ֤ה  יָמִים֙  אֹו־  זֶ֣ה  שָׁנִ֔ים  וְלֹֽא־  מָצָ֤אתִי  בֹו֙  מְא֔וּמָה  מִיֹּ֥ום  נָפְלֹ֖ו  עַד־  הַיֹּ֥ום  הַזֶּֽה׃  פ  4   וַיִּקְצְפ֨וּ  עָלָ֜יו  שָׂרֵ֣י  פְלִשְׁתִּ֗ים  וַיֹּ֣אמְרוּ  לֹו֩  שָׂרֵ֨י  פְלִשְׁתִּ֜ים  הָשֵׁ֣ב  אֶת־  הָאִ֗ישׁ  וְיָשֹׁב֙  אֶל־  מְקֹומֹו֙  אֲשֶׁ֣ר  הִפְקַדְתֹּ֣ו  שָׁ֔ם  וְלֹֽא־  יֵרֵ֤ד  עִמָּ֙נוּ֙  בַּמִּלְחָמָ֔ה  וְלֹא־  יִֽהְיֶה־  לָּ֥נוּ  לְשָׂטָ֖ן  בַּמִּלְחָמָ֑ה  וּבַמֶּ֗ה  יִתְרַצֶּ֥ה  זֶה֙  אֶל־  אֲדֹנָ֔יו  הֲלֹ֕וא  בְּרָאשֵׁ֖י  הָאֲנָשִׁ֥ים  הָהֵֽם׃  5   הֲלֹוא־  זֶ֣ה  דָוִ֔ד  אֲשֶׁ֧ר  יַעֲנוּ־  לֹ֛ו  בַּמְּחֹלֹ֖ות  לֵאמֹ֑ר  הִכָּ֤ה  שָׁאוּל֙  בַּֽאֲלָפָ֔יו  וְדָוִ֖ד  [בְּרִבְבֹתֹו  כ]  (בְּרִבְבֹתָֽיו׃  ק)  ס 


Achish dismisses him, with commendations of his fidelity
6   וַיִּקְרָ֨א  אָכִ֜ישׁ  אֶל־  דָּוִ֗ד  וַיֹּ֣אמֶר  אֵ֠לָיו  חַי־  יְהוָ֞ה  כִּי־  יָשָׁ֣ר  אַתָּ֗ה  וְטֹ֣וב  בְּ֠עֵינַי  צֵאתְךָ֙  וּבֹאֲךָ֤  אִתִּי֙  בַּֽמַּחֲנֶ֔ה  כִּ֠י  לֹֽא־  מָצָ֤אתִֽי  בְךָ֙  רָעָ֔ה  מִיֹּ֛ום  בֹּאֲךָ֥  אֵלַ֖י  עַד־  הַיֹּ֣ום  הַזֶּ֑ה  וּבְעֵינֵ֥י  הַסְּרָנִ֖ים  לֹֽא־  טֹ֥וב  אָֽתָּה׃  7   וְעַתָּ֥ה  שׁ֖וּב  וְלֵ֣ךְ  בְּשָׁלֹ֑ום  וְלֹֽא־  תַעֲשֶׂ֣ה  רָ֔ע  בְּעֵינֵ֖י  סַרְנֵ֥י  פְלִשְׁתִּֽים׃  ס  8   וַיֹּ֨אמֶר  דָּוִ֜ד  אֶל־  אָכִ֗ישׁ  כִּ֣י  מֶ֤ה  עָשִׂ֙יתִי֙  וּמַה־  מָּצָ֣אתָ  בְעַבְדְּךָ֔  מִיֹּום֙  אֲשֶׁ֣ר  הָיִ֣יתִי  לְפָנֶ֔יךָ  עַ֖ד  הַיֹּ֣ום  הַזֶּ֑ה  כִּ֣י  לֹ֤א  אָבֹוא֙  וְנִלְחַ֔מְתִּי  בְּאֹיְבֵ֖י  אֲדֹנִ֥י  הַמֶּֽלֶךְ׃  9   וַיַּ֣עַן  אָכִישׁ֮  וַיֹּ֣אמֶר  אֶל־  דָּוִד֒  יָדַ֕עְתִּי  כִּ֣י  טֹ֥וב  אַתָּ֛ה  בְּעֵינַ֖י  כְּמַלְאַ֣ךְ  אֱלֹהִ֑ים  אַ֣ךְ  שָׂרֵ֤י  פְלִשְׁתִּים֙  אָֽמְר֔וּ  לֹֽא־  יַעֲלֶ֥ה  עִמָּ֖נוּ  בַּמִּלְחָמָֽה׃  10   וְעַתָּה֙  הַשְׁכֵּ֣ם  בַּבֹּ֔קֶר  וְעַבְדֵ֥י  אֲדֹנֶ֖יךָ  אֲשֶׁר־  בָּ֣אוּ  אִתָּ֑ךְ  וְהִשְׁכַּמְתֶּ֣ם  בַּבֹּ֔קֶר  וְאֹ֥ור  לָכֶ֖ם  וָלֵֽכוּ׃  11   וַיַּשְׁכֵּ֨ם  דָּוִ֜ד  ה֤וּא  וַֽאֲנָשָׁיו֙  לָלֶ֣כֶת  בַּבֹּ֔קֶר  לָשׁ֖וּב  אֶל־  אֶ֣רֶץ  פְּלִשְׁתִּ֑ים  וּפְלִשְׁתִּ֖ים  עָל֥וּ  יִזְרְעֶֽאל׃  ס 
<< 1 Samuel 29 >>
Biblos Greek and Hebrew Study Bible © 2010 Biblos.com
Online Parallel Bible