<< 1 Kings 5 HEB >>


Hiram, sending to congratulate Solomon, is desired to furnish him with timber
1   וַ֠יִּשְׁלַח  חִירָ֨ם  מֶֽלֶךְ־  צֹ֤ור  אֶת־  עֲבָדָיו֙  אֶל־  שְׁלֹמֹ֔ה  כִּ֣י  שָׁמַ֔ע  כִּ֥י  אֹתֹ֛ו  מָשְׁח֥וּ  לְמֶ֖לֶךְ  תַּ֣חַת  אָבִ֑יהוּ  כִּ֣י  אֹהֵ֗ב  הָיָ֥ה  חִירָ֛ם  לְדָוִ֖ד  כָּל־  הַיָּמִֽים׃  ס  2   וַיִּשְׁלַ֣ח  שְׁלֹמֹ֔ה  אֶל־  חִירָ֖ם  לֵאמֹֽר׃  3   אַתָּ֨ה  יָדַ֜עְתָּ  אֶת־  דָּוִ֣ד  אָבִ֗י  כִּ֣י  לֹ֤א  יָכֹל֙  לִבְנֹ֣ות  בַּ֗יִת  לְשֵׁם֙  יְהוָ֣ה  אֱלֹהָ֔יו  מִפְּנֵ֥י  הַמִּלְחָמָ֖ה  אֲשֶׁ֣ר  סְבָבֻ֑הוּ  עַ֤ד  תֵּת־  יְהוָה֙  אֹתָ֔ם  תַּ֖חַת  כַּפֹּ֥ות  [רַגְלֹו  כ]  (רַגְלָֽי׃  ק)  4   וְעַתָּ֕ה  הֵנִ֨יחַ  יְהוָ֧ה  אֱלֹהַ֛י  לִ֖י  מִסָּבִ֑יב  אֵ֣ין  שָׂטָ֔ן  וְאֵ֖ין  פֶּ֥גַע  רָֽע׃  5   וְהִנְנִ֣י  אֹמֵ֔ר  לִבְנֹ֣ות  בַּ֔יִת  לְשֵׁ֖ם  יְהוָ֣ה  אֱלֹהָ֑י  כַּאֲשֶׁ֣ר  דִּבֶּ֣ר  יְהוָ֗ה  אֶל־  דָּוִ֤ד  אָבִי֙  לֵאמֹ֔ר  בִּנְךָ֗  אֲשֶׁ֨ר  אֶתֵּ֤ן  תַּחְתֶּ֙יךָ֙  עַל־  כִּסְאֶ֔ךָ  הֽוּא־  יִבְנֶ֥ה  הַבַּ֖יִת  לִשְׁמִֽי׃  6   וְעַתָּ֡ה  צַוֵּה֩  וְיִכְרְתוּ־  לִ֨י  אֲרָזִ֜ים  מִן־  הַלְּבָנֹ֗ון  וַֽעֲבָדַי֙  יִהְי֣וּ  עִם־  עֲבָדֶ֔יךָ  וּשְׂכַ֤ר  עֲבָדֶ֙יךָ֙  אֶתֵּ֣ן  לְךָ֔  כְּכֹ֖ל  אֲשֶׁ֣ר  תֹּאמֵ֑ר  כִּ֣י  אַתָּ֣ה  יָדַ֗עְתָּ  כִּ֣י  אֵ֥ין  בָּ֛נוּ  אִ֛ישׁ  יֹדֵ֥עַ  לִכְרָת־  עֵצִ֖ים  כַּצִּדֹנִֽים׃ 


Hiram, blessing God for Solomon, furnishes him with trees.
7   וַיְהִ֞י  כִּשְׁמֹ֧עַ  חִירָ֛ם  אֶת־  דִּבְרֵ֥י  שְׁלֹמֹ֖ה  וַיִּשְׂמַ֣ח  מְאֹ֑ד  וַיֹּ֗אמֶר  בָּר֤וּךְ  יְהוָה֙  הַיֹּ֔ום  אֲשֶׁ֨ר  נָתַ֤ן  לְדָוִד֙  בֵּ֣ן  חָכָ֔ם  עַל־  הָעָ֥ם  הָרָ֖ב  הַזֶּֽה׃  8   וַיִּשְׁלַ֤ח  חִירָם֙  אֶל־  שְׁלֹמֹ֣ה  לֵאמֹ֔ר  שָׁמַ֕עְתִּי  אֵ֥ת  אֲשֶׁר־  שָׁלַ֖חְתָּ  אֵלָ֑י  אֲנִ֤י  אֶֽעֱשֶׂה֙  אֶת־  כָּל־  חֶפְצְךָ֔  בַּעֲצֵ֥י  אֲרָזִ֖ים  וּבַעֲצֵ֥י  בְרֹושִֽׁים׃  9   עֲ֠בָדַי  יֹרִ֨דוּ  מִן־  הַלְּבָנֹ֜ון  יָ֗מָּה  וַ֠אֲנִי  אֲשִׂימֵ֨ם  דֹּבְרֹ֤ות  בַּיָּם֙  עַֽד־  הַמָּקֹ֞ום  אֲשֶׁר־  תִּשְׁלַ֥ח  אֵלַ֛י  וְנִפַּצְתִּ֥ים  שָׁ֖ם  וְאַתָּ֣ה  תִשָּׂ֑א  וְאַתָּה֙  תַּעֲשֶׂ֣ה  אֶת־  חֶפְצִ֔י  לָתֵ֖ת  לֶ֥חֶם  בֵּיתִֽי׃  10   וַיְהִ֨י  חִירֹ֜ום  נֹתֵ֣ן  לִשְׁלֹמֹ֗ה  עֲצֵ֧י  אֲרָזִ֛ים  וַעֲצֵ֥י  בְרֹושִׁ֖ים  כָּל־  חֶפְצֹֽו׃  11   וּשְׁלֹמֹה֩  נָתַ֨ן  לְחִירָ֜ם  עֶשְׂרִים֩  אֶ֨לֶף  כֹּ֤ר  חִטִּים֙  מַכֹּ֣לֶת  לְבֵיתֹ֔ו  וְעֶשְׂרִ֥ים  כֹּ֖ר  שֶׁ֣מֶן  כָּתִ֑ית  כֹּֽה־  יִתֵּ֧ן  שְׁלֹמֹ֛ה  לְחִירָ֖ם  שָׁנָ֥ה  בְשָׁנָֽה׃  פ  12   וַיהוָ֗ה  נָתַ֤ן  חָכְמָה֙  לִשְׁלֹמֹ֔ה  כַּאֲשֶׁ֖ר  דִּבֶּר־  לֹ֑ו  וַיְהִ֣י  שָׁלֹ֗ם  בֵּ֤ין  חִירָם֙  וּבֵ֣ין  שְׁלֹמֹ֔ה  וַיִּכְרְת֥וּ  בְרִ֖ית  שְׁנֵיהֶֽם׃ 


The number of Solomon's workmen and laborers
13   וַיַּ֨עַל  הַמֶּ֧לֶךְ  שְׁלֹמֹ֛ה  מַ֖ס  מִכָּל־  יִשְׂרָאֵ֑ל  וַיְהִ֣י  הַמַּ֔ס  שְׁלֹשִׁ֥ים  אֶ֖לֶף  אִֽישׁ׃  14   וַיִּשְׁלָחֵ֣ם  לְבָנֹ֗ונָה  עֲשֶׂ֨רֶת  אֲלָפִ֤ים  בַּחֹ֙דֶשׁ֙  חֲלִיפֹ֔ות  חֹ֚דֶשׁ  יִהְי֣וּ  בַלְּבָנֹ֔ון  שְׁנַ֥יִם  חֳדָשִׁ֖ים  בְּבֵיתֹ֑ו  וַאֲדֹנִירָ֖ם  עַל־  הַמַּֽס׃  ס  15   וַיְהִ֧י  לִשְׁלֹמֹ֛ה  שִׁבְעִ֥ים  אֶ֖לֶף  נֹשֵׂ֣א  סַבָּ֑ל  וּשְׁמֹנִ֥ים  אֶ֖לֶף  חֹצֵ֥ב  בָּהָֽר׃  16   לְ֠בַד  מִשָּׂרֵ֨י  הַנִּצָּבִ֤ים  לִשְׁלֹמֹה֙  אֲשֶׁ֣ר  עַל־  הַמְּלָאכָ֔ה  שְׁלֹ֥שֶׁת  אֲלָפִ֖ים  וּשְׁלֹ֣שׁ  מֵאֹ֑ות  הָרֹדִ֣ים  בָּעָ֔ם  הָעֹשִׂ֖ים  בַּמְּלָאכָֽה׃  17   וַיְצַ֣ו  הַמֶּ֡לֶךְ  וַיַּסִּעוּ֩  אֲבָנִ֨ים  גְּדֹלֹ֜ות  אֲבָנִ֧ים  יְקָרֹ֛ות  לְיַסֵּ֥ד  הַבָּ֖יִת  אַבְנֵ֥י  גָזִֽית׃  18   וַֽיִּפְסְל֞וּ  בֹּנֵ֧י  שְׁלֹמֹ֛ה  וּבֹנֵ֥י  חִירֹ֖ום  וְהַגִּבְלִ֑ים  וַיָּכִ֛ינוּ  הָעֵצִ֥ים  וְהָאֲבָנִ֖ים  לִבְנֹ֥ות  הַבָּֽיִת׃  פ 
<< 1 Kings 5 >>
Biblos Greek and Hebrew Study Bible © 2010 Biblos.com
Online Parallel Bible