<< 1 Chronicles 20 HEB >>


Rabbah is besieged by Joab, spoiled by David, and the people thereof tortured
1   וַיְהִ֡י  לְעֵת֩  תְּשׁוּבַ֨ת  הַשָּׁנָ֜ה  לְעֵ֣ת  צֵ֣את  הַמְּלָכִ֗ים  וַיִּנְהַ֣ג  יֹואָב֩  אֶת־  חֵ֨יל  הַצָּבָ֜א  וַיַּשְׁחֵ֣ת  אֶת־  אֶ֣רֶץ  בְּנֵֽי־  עַמֹּ֗ון  וַיָּבֹא֙  וַיָּ֣צַר  אֶת־  רַבָּ֔ה  וְדָוִ֖יד  יֹשֵׁ֣ב  בִּירֽוּשָׁלִָ֑ם  וַיַּ֥ךְ  יֹואָ֛ב  אֶת־  רַבָּ֖ה  וַיֶּֽהֶרְסֶֽהָ׃  2   וַיִּקַּ֣ח  דָּוִ֣יד  אֶת־  עֲטֶֽרֶת־  מַלְכָּם֩  מֵעַ֨ל  רֹאשֹׁ֜ו  וַֽיִּמְצָאָ֣הּ  מִשְׁקַ֣ל  כִּכַּר־  זָהָ֗ב  וּבָהּ֙  אֶ֣בֶן  יְקָרָ֔ה  וַתְּהִ֖י  עַל־  רֹ֣אשׁ  דָּוִ֑יד  וּשְׁלַ֥ל  הָעִ֛יר  הֹוצִ֖יא  הַרְבֵּ֥ה  מְאֹֽד׃  3   וְאֶת־  הָעָ֨ם  אֲשֶׁר־  בָּ֜הּ  הֹוצִ֗יא  וַיָּ֨שַׂר  בַּמְּגֵרָ֜ה  וּבַחֲרִיצֵ֤י  הַבַּרְזֶל֙  וּבַמְּגֵרֹ֔ות  וְכֵן֙  יַעֲשֶׂ֣ה  דָוִ֔יד  לְכֹ֖ל  עָרֵ֣י  בְנֵי־  עַמֹּ֑ון  וַיָּ֧שָׁב  דָּוִ֛יד  וְכָל־  הָעָ֖ם  יְרוּשָׁלִָֽם׃  פ 


Three giants are slain in overthrows of the Philistines.
4   וַיְהִי֙  אַחֲרֵיכֵ֔ן  וַתַּעֲמֹ֧ד  מִלְחָמָ֛ה  בְּגֶ֖זֶר  עִם־  פְּלִשְׁתִּ֑ים  אָ֣ז  הִכָּ֞ה  סִבְּכַ֣י  הַחֻֽשָׁתִ֗י  אֶת־  סִפַּ֛י  מִילִדֵ֥י  הָרְפָאִ֖ים  וַיִּכָּנֵֽעוּ׃  5   וַתְּהִי־  עֹ֥וד  מִלְחָמָ֖ה  אֶת־  פְּלִשְׁתִּ֑ים  וַיַּ֞ךְ  אֶלְחָנָ֣ן  בֶּן־  [יָעוּר  כ]  (יָעִ֗יר  ק)  אֶת־  לַחְמִי֙  אֲחִי֙  גָּלְיָ֣ת  הַגִּתִּ֔י  וְעֵ֣ץ  חֲנִיתֹ֔ו  כִּמְנֹ֖ור  אֹרְגִֽים׃  6   וַתְּהִי־  עֹ֥וד  מִלְחָמָ֖ה  בְּגַ֑ת  וַיְהִ֣י  אִ֣ישׁ  מִדָּ֗ה  וְאֶצְבְּעֹתָ֤יו  שֵׁשׁ־  וָשֵׁשׁ֙  עֶשְׂרִ֣ים  וְאַרְבַּ֔ע  וְגַם־  ה֖וּא  נֹולַ֥ד  לְהָרָפָֽא׃  7   וַיְחָרֵ֖ף  אֶת־  יִשְׂרָאֵ֑ל  וַיַּכֵּ֙הוּ֙  יְהֹ֣ונָתָ֔ן  בֶּן־  שִׁמְעָ֖א  אֲחִ֥י  דָוִֽיד׃  8   אֵ֛ל  נוּלְּד֥וּ  לְהָרָפָ֖א  בְּגַ֑ת  וַיִּפְּל֥וּ  בְיַד־  דָּוִ֖יד  וּבְיַד־  עֲבָדָֽיו׃  פ 
<< 1 Chronicles 20 >>
Biblos Greek and Hebrew Study Bible © 2010 Biblos.com
Online Parallel Bible