WLC - Consonants Only 1 על נהרות׀ בבל שם ישבנו גם־בכינו בזכרנו את־ציון׃ 2 על־ערבים בתוכה תלינו כנרותינו׃ 3 כי שם שאלונו שובינו דברי־שיר ותוללינו שמחה שירו לנו משיר ציון׃ 4 איך נשיר את־שיר־יהוה על אדמת נכר׃ 5 אם־אשכחך ירושלם תשכח ימיני׃ 6 תדבק־לשוני׀ לחכי אם־לא אזכרכי אם־לא אעלה את־ירושלם על ראש שמחתי׃ 7 זכר יהוה׀ לבני אדום את יום ירושלם האמרים ערו׀ ערו עד היסוד בה׃ 8 בת־בבל השדודה אשרי שישלם־לך את־גמולך שגמלת לנו׃ 9 אשרי׀ שיאחז ונפץ את־עלליך אל־הסלע׃ Westminster Leningrad Codex. For comparative study, where possible, chapter and verse numbers are mapped to the traditional convention used by modern English texts. |
    |