ישע32

לבא הֵן לְצֶדֶק יִמְלָךְ-מֶלֶךְ וּלְשָׂרִים לְמִשְׁפָּט יָשֹׂרוּ. לבב וְהָיָה-אִישׁ כְּמַחֲבֵא-רוּחַ וְסֵתֶר זָרֶם כְּפַלְגֵי-מַיִם בְּצָיוֹן כְּצֵל סֶלַע-כָּבֵד בְּאֶרֶץ עֲיֵפָה. לבג וְלֹא תִשְׁעֶינָה עֵינֵי רֹאִים וְאָזְנֵי שֹׁמְעִים תִּקְשַׁבְנָה. לבד וּלְבַב נִמְהָרִים יָבִין לָדָעַת וּלְשׁוֹן עִלְּגִים תְּמַהֵר לְדַבֵּר צָחוֹת. לבה לֹא-יִקָּרֵא עוֹד לְנָבָל נָדִיב וּלְכִילַי לֹא יֵאָמֵר שׁוֹעַ. לבו כִּי נָבָל נְבָלָה יְדַבֵּר וְלִבּוֹ יַעֲשֶׂה-אָוֶןלַעֲשׂוֹת חֹנֶף וּלְדַבֵּר אֶל-יְהוָה תּוֹעָה לְהָרִיק נֶפֶשׁ רָעֵב וּמַשְׁקֶה צָמֵא יַחְסִיר. לבז וְכֵלַי כֵּלָיו רָעִים הוּא זִמּוֹת יָעָץ לְחַבֵּל ענוים (עֲנִיִּים) בְּאִמְרֵי-שֶׁקֶר וּבְדַבֵּר אֶבְיוֹן מִשְׁפָּט. לבח וְנָדִיב נְדִיבוֹת יָעָץ וְהוּא עַל-נְדִיבוֹת יָקוּם.

לבט נָשִׁים שַׁאֲנַנּוֹתקֹמְנָה שְׁמַעְנָה קוֹלִי בָּנוֹת בֹּטְחוֹתהַאְזֵנָּה אִמְרָתִי. לבי יָמִים עַל-שָׁנָה תִּרְגַּזְנָה בֹּטְחוֹת: כִּי כָּלָה בָצִיר אֹסֶף בְּלִי יָבוֹא. לביא חִרְדוּ שַׁאֲנַנּוֹת רְגָזָה בֹּטְחוֹת פְּשֹׁטָה וְעֹרָה וַחֲגוֹרָה עַל-חֲלָצָיִם. לביב עַל-שָׁדַיִם סֹפְדִים עַל-שְׂדֵי-חֶמֶד עַל-גֶּפֶן פֹּרִיָּה. לביג עַל אַדְמַת עַמִּי קוֹץ שָׁמִיר תַּעֲלֶה: כִּי עַל-כָּל-בָּתֵּי מָשׂוֹשׂ קִרְיָה עַלִּיזָה. לביד כִּי-אַרְמוֹן נֻטָּשׁ הֲמוֹן עִיר עֻזָּב עֹפֶל וָבַחַן הָיָה בְעַד מְעָרוֹת עַד-עוֹלָםמְשׂוֹשׂ פְּרָאִים מִרְעֵה עֲדָרִים. לבטו עַד-יֵעָרֶה עָלֵינוּ רוּחַ מִמָּרוֹם וְהָיָה מִדְבָּר לַכַּרְמֶל וכרמל (וְהַכַּרְמֶל) לַיַּעַר יֵחָשֵׁב. לבטז וְשָׁכַן בַּמִּדְבָּר מִשְׁפָּט וּצְדָקָה בַּכַּרְמֶל תֵּשֵׁב. לביז וְהָיָה מַעֲשֵׂה הַצְּדָקָה שָׁלוֹם וַעֲבֹדַת הַצְּדָקָההַשְׁקֵט וָבֶטַח עַד-עוֹלָם. לביח וְיָשַׁב עַמִּי בִּנְוֵה שָׁלוֹם וּבְמִשְׁכְּנוֹת מִבְטַחִים וּבִמְנוּחֹת שַׁאֲנַנּוֹת. לביט וּבָרַד בְּרֶדֶת הַיָּעַר וּבַשִּׁפְלָה תִּשְׁפַּל הָעִיר. לבכ אַשְׁרֵיכֶם זֹרְעֵי עַל-כָּל-מָיִם מְשַׁלְּחֵי רֶגֶל-הַשּׁוֹר וְהַחֲמוֹר.