דברי א16

א טזא וַיָּבִיאוּ אֶת-אֲרוֹן הָאֱלֹהִים וַיַּצִּיגוּ אֹתוֹ בְּתוֹךְ הָאֹהֶל אֲשֶׁר נָטָה-לוֹ דָּוִיד וַיַּקְרִיבוּ עֹלוֹת וּשְׁלָמִים לִפְנֵי הָאֱלֹהִים. א טזב וַיְכַל דָּוִיד מֵהַעֲלוֹת הָעֹלָה וְהַשְּׁלָמִים וַיְבָרֶךְ אֶת-הָעָם בְּשֵׁם יְהוָה. א טזג וַיְחַלֵּק לְכָל-אִישׁ יִשְׂרָאֵל מֵאִישׁ וְעַד-אִשָּׁהלְאִישׁ כִּכַּר-לֶחֶם וְאֶשְׁפָּר וַאֲשִׁישָׁה. א טזד וַיִּתֵּן לִפְנֵי אֲרוֹן יְהוָה מִן-הַלְוִיִּםמְשָׁרְתִים וּלְהַזְכִּיר וּלְהוֹדוֹת וּלְהַלֵּל לַיהוָה אֱלֹהֵי יִשְׂרָאֵל. א טזה אָסָף הָרֹאשׁ וּמִשְׁנֵהוּ זְכַרְיָה יְעִיאֵל וּשְׁמִירָמוֹת וִיחִיאֵל וּמַתִּתְיָה וֶאֱלִיאָב וּבְנָיָהוּ וְעֹבֵד אֱדֹם וִיעִיאֵל בִּכְלֵי נְבָלִים וּבְכִנֹּרוֹת וְאָסָף בַּמְצִלְתַּיִם מַשְׁמִיעַ. א טזו וּבְנָיָהוּ וְיַחֲזִיאֵל הַכֹּהֲנִיםבַּחֲצֹצְרוֹת תָּמִיד לִפְנֵי אֲרוֹן בְּרִית-הָאֱלֹהִים. א טזז בַּיּוֹם הַהוּא אָז נָתַן דָּוִיד בָּרֹאשׁ לְהֹדוֹת לַיהוָהבְּיַד-אָסָף וְאֶחָיו.

א טזח הוֹדוּ לַיהוָה קִרְאוּ בִשְׁמוֹ הוֹדִיעוּ בָעַמִּים עֲלִילֹתָיו. א טזט שִׁירוּ לוֹ זַמְּרוּ-לוֹ שִׂיחוּ בְּכָל-נִפְלְאֹתָיו. א טזי הִתְהַלְלוּ בְּשֵׁם קָדְשׁוֹ יִשְׂמַח לֵב מְבַקְשֵׁי יְהוָה. א טזיא דִּרְשׁוּ יְהוָה וְעֻזּוֹ בַּקְּשׁוּ פָנָיו תָּמִיד. א טזיב זִכְרוּ נִפְלְאֹתָיו אֲשֶׁר עָשָׂה מֹפְתָיו וּמִשְׁפְּטֵי-פִיהוּ. א טזיג זֶרַע יִשְׂרָאֵל עַבְדּוֹ בְּנֵי יַעֲקֹב בְּחִירָיו. א טזיד הוּא יְהוָה אֱלֹהֵינוּ בְּכָל-הָאָרֶץ מִשְׁפָּטָיו. א טזטו זִכְרוּ לְעוֹלָם בְּרִיתוֹ דָּבָר צִוָּה לְאֶלֶף דּוֹר. א טזטז אֲשֶׁר כָּרַת אֶת-אַבְרָהָם וּשְׁבוּעָתוֹ לְיִצְחָק. א טזיז וַיַּעֲמִידֶהָ לְיַעֲקֹב לְחֹק לְיִשְׂרָאֵל בְּרִית עוֹלָם. א טזיח לֵאמֹר לְךָ אֶתֵּן אֶרֶץ-כְּנָעַן חֶבֶל נַחֲלַתְכֶם. א טזיט בִּהְיוֹתְכֶם מְתֵי מִסְפָּר כִּמְעַט וְגָרִים בָּהּ. א טזכ וַיִּתְהַלְּכוּ מִגּוֹי אֶל-גּוֹי וּמִמַּמְלָכָה אֶל-עַם אַחֵר. א טזכא לֹא-הִנִּיחַ לְאִישׁ לְעָשְׁקָם וַיּוֹכַח עֲלֵיהֶם מְלָכִים. א טזכב אַל-תִּגְּעוּ בִּמְשִׁיחָי וּבִנְבִיאַי אַל-תָּרֵעוּ.

א טזכג שִׁירוּ לַיהוָה כָּל-הָאָרֶץ בַּשְּׂרוּ מִיּוֹם-אֶל-יוֹם יְשׁוּעָתוֹ. א טזכד סַפְּרוּ בַגּוֹיִם אֶת-כְּבוֹדוֹ בְּכָל-הָעַמִּים נִפְלְאֹתָיו. א טזכה כִּי גָדוֹל יְהוָה וּמְהֻלָּל מְאֹד וְנוֹרָא הוּא עַל-כָּל-אֱלֹהִים. א טזכו כִּי כָּל-אֱלֹהֵי הָעַמִּים אֱלִילִים וַיהוָה שָׁמַיִם עָשָׂה. א טזכז הוֹד וְהָדָר לְפָנָיו עֹז וְחֶדְוָה בִּמְקֹמוֹ. א טזכח הָבוּ לַיהוָה מִשְׁפְּחוֹת עַמִּים הָבוּ לַיהוָה כָּבוֹד וָעֹז. א טזכט הָבוּ לַיהוָה כְּבוֹד שְׁמוֹ שְׂאוּ מִנְחָה וּבֹאוּ לְפָנָיו הִשְׁתַּחֲווּ לַיהוָה בְּהַדְרַת-קֹדֶשׁ. א טזל חִילוּ מִלְּפָנָיו כָּל-הָאָרֶץ אַף-תִּכּוֹן תֵּבֵל בַּל-תִּמּוֹט. א טזלא יִשְׂמְחוּ הַשָּׁמַיִם וְתָגֵל הָאָרֶץ וַיּאמְרוּ בַגּוֹיִם יְהוָה מָלָךְ. א טזלב יִרְעַם הַיָּם וּמְלוֹאוֹ יַעֲלֹץ הַשָּׂדֶה וְכָל-אֲשֶׁר-בּוֹ. א טזלג אָז יְרַנְּנוּ עֲצֵי הַיָּעַר: מִלִּפְנֵי יְהוָהכִּי-בָא לִשְׁפּוֹט אֶת-הָאָרֶץ. א טזלד הוֹדוּ לַיהוָה כִּי טוֹב כִּי לְעוֹלָם חַסְדּוֹ. א טזלה וְאִמְרוּהוֹשִׁיעֵנוּ אֱלֹהֵי יִשְׁעֵנוּ וְקַבְּצֵנוּ וְהַצִּילֵנוּ מִן-הַגּוֹיִם: לְהֹדוֹת לְשֵׁם קָדְשֶׁךָ לְהִשְׁתַּבֵּחַ בִּתְהִלָּתֶךָ. א טזלו בָּרוּךְ יְהוָה אֱלֹהֵי יִשְׂרָאֵל מִן-הָעוֹלָם וְעַד הָעֹלָם וַיּאמְרוּ כָל-הָעָם אָמֵן וְהַלֵּל לַיהוָה.

א טזלז וַיַּעֲזָב-שָׁם לִפְנֵי אֲרוֹן בְּרִית-יְהוָה לְאָסָף וּלְאֶחָיו: לְשָׁרֵת לִפְנֵי הָאָרוֹן תָּמִידלִדְבַר-יוֹם בְּיוֹמוֹ. א טזלח וְעֹבֵד אֱדֹם וַאֲחֵיהֶם שִׁשִּׁים וּשְׁמוֹנָה וְעֹבֵד אֱדֹם בֶּן-יְדִיתוּן וְחֹסָה לְשֹׁעֲרִים. א טזלט וְאֵת צָדוֹק הַכֹּהֵן וְאֶחָיו הַכֹּהֲנִים לִפְנֵי מִשְׁכַּן יְהוָהבַּבָּמָה אֲשֶׁר בְּגִבְעוֹן. א טזמ לְהַעֲלוֹת עֹלוֹת לַיהוָה עַל-מִזְבַּח הָעֹלָה תָּמִידלַבֹּקֶר וְלָעָרֶב וּלְכָל-הַכָּתוּב בְּתוֹרַת יְהוָה אֲשֶׁר צִוָּה עַל-יִשְׂרָאֵל. א טזמא וְעִמָּהֶם הֵימָן וִידוּתוּן וּשְׁאָר הַבְּרוּרִים אֲשֶׁר נִקְּבוּ בְּשֵׁמוֹתלְהֹדוֹת לַיהוָה כִּי לְעוֹלָם חַסְדּוֹ. א טזמב וְעִמָּהֶם הֵימָן וִידוּתוּן חֲצֹצְרוֹת וּמְצִלְתַּיִם לְמַשְׁמִיעִים וּכְלֵי שִׁיר הָאֱלֹהִים וּבְנֵי יְדוּתוּן לַשָּׁעַר. א טזמג וַיֵּלְכוּ כָל-הָעָם אִישׁ לְבֵיתוֹ וַיִּסֹּב דָּוִיד לְבָרֵךְ אֶת-בֵּיתוֹ.