<< Zechariah 12 HEB >>



Jerusalem a cup of trembling to herself,
1   מַשָּׂ֥א  דְבַר־  יְהוָ֖ה  עַל־  יִשְׂרָאֵ֑ל  נְאֻם־  יְהוָ֗ה  נֹטֶ֤ה  שָׁמַ֙יִם֙  וְיֹסֵ֣ד  אָ֔רֶץ  וְיֹצֵ֥ר  רֽוּחַ־  אָדָ֖ם  בְּקִרְבֹּֽו׃  פ  2   הִנֵּ֣ה  אָ֠נֹכִי  שָׂ֣ם  אֶת־  יְרוּשָׁלִַ֧ם  סַף־  רַ֛עַל  לְכָל־  הָעַמִּ֖ים  סָבִ֑יב  וְגַ֧ם  עַל־  יְהוּדָ֛ה  יִֽהְיֶ֥ה  בַמָּצֹ֖ור  עַל־  יְרוּשָׁלִָֽם׃ 


and a burdensome stone to her adversaries.
3   וְהָיָ֣ה  בַיֹּום־  הַ֠הוּא  אָשִׂ֨ים  אֶת־  יְרוּשָׁלִַ֜ם  אֶ֤בֶן  מַֽעֲמָסָה֙  לְכָל־  הָ֣עַמִּ֔ים  כָּל־  עֹמְסֶ֖יהָ  שָׂרֹ֣וט  יִשָּׂרֵ֑טוּ  וְנֶאֶסְפ֣וּ  עָלֶ֔יהָ  כֹּ֖ל  גֹּויֵ֥י  הָאָֽרֶץ׃  4   בַּיֹּ֨ום  הַה֜וּא  נְאֻם־  יְהוָ֗ה  אַכֶּ֤ה  כָל־  סוּס֙  בַּתִּמָּהֹ֔ון  וְרֹכְבֹ֖ו  בַּשִּׁגָּעֹ֑ון  וְעַל־  בֵּ֤ית  יְהוּדָה֙  אֶפְקַ֣ח  אֶת־  עֵינַ֔י  וְכֹל֙  ס֣וּס  הָֽעַמִּ֔ים  אַכֶּ֖ה  בַּֽעִוָּרֹֽון׃  5   וְאָֽמְר֛וּ  אַלֻּפֵ֥י  יְהוּדָ֖ה  בְּלִבָּ֑ם  אַמְצָ֥ה  לִי֙  יֹשְׁבֵ֣י  יְרוּשָׁלִַ֔ם  בַּיהוָ֥ה  צְבָאֹ֖ות  אֱלֹהֵיהֶֽם׃ 


The victorious restoring of Judah.
6   בַּיֹּ֣ום  הַה֡וּא  אָשִׂים֩  אֶת־  אַלֻּפֵ֨י  יְהוּדָ֜ה  כְּֽכִיֹּ֧ור  אֵ֣שׁ  בְּעֵצִ֗ים  וּכְלַפִּ֥יד  אֵשׁ֙  בְּעָמִ֔יר  וְאָ֨כְל֜וּ  עַל־  יָמִ֧ין  וְעַל־  שְׂמֹ֛אול  אֶת־  כָּל־  הָעַמִּ֖ים  סָבִ֑יב  וְיָשְׁבָ֨ה  יְרוּשָׁלִַ֥ם  עֹ֛וד  תַּחְתֶּ֖יהָ  בִּירוּשָׁלִָֽם׃  פ  7   וְהֹושִׁ֧יעַ  יְהוָ֛ה  אֶת־  אָהֳלֵ֥י  יְהוּדָ֖ה  בָּרִֽאשֹׁנָ֑ה  לְמַ֨עַן  לֹֽא־  תִגְדַּ֜ל  תִּפְאֶ֣רֶת  בֵּית־  דָּוִ֗יד  וְתִפְאֶ֛רֶת  יֹשֵׁ֥ב  יְרוּשָׁלִַ֖ם  עַל־  יְהוּדָֽה׃  8   בַּיֹּ֣ום  הַה֗וּא  יָגֵ֤ן  יְהוָה֙  בְּעַד֙  יֹושֵׁ֣ב  יְרוּשָׁלִַ֔ם  וְהָיָ֞ה  הַנִּכְשָׁ֥ל  בָּהֶ֛ם  בַּיֹּ֥ום  הַה֖וּא  כְּדָוִ֑יד  וּבֵ֤ית  דָּוִיד֙  כֵּֽאלֹהִ֔ים  כְּמַלְאַ֥ךְ  יְהוָ֖ה  לִפְנֵיהֶֽם׃  9   וְהָיָ֖ה  בַּיֹּ֣ום  הַה֑וּא  אֲבַקֵּ֗שׁ  לְהַשְׁמִיד֙  אֶת־  כָּל־  הַגֹּויִ֔ם  הַבָּאִ֖ים  עַל־  יְרוּשָׁלִָֽם׃ 


The repentance of Jerusalem.
10   וְשָׁפַכְתִּי֩  עַל־  בֵּ֨ית  דָּוִ֜יד  וְעַ֣ל  יֹושֵׁ֣ב  יְרוּשָׁלִַ֗ם  ר֤וּחַ  חֵן֙  וְתַ֣חֲנוּנִ֔ים  וְהִבִּ֥יטוּ  אֵלַ֖י  אֵ֣ת  אֲשֶׁר־  דָּקָ֑רוּ  וְסָפְד֣וּ  עָלָ֗יו  כְּמִסְפֵּד֙  עַל־  הַיָּחִ֔יד  וְהָמֵ֥ר  עָלָ֖יו  כְּהָמֵ֥ר  עַֽל־  הַבְּכֹֽור׃  11   בַּיֹּ֣ום  הַה֗וּא  יִגְדַּ֤ל  הַמִּסְפֵּד֙  בִּיר֣וּשָׁלִַ֔ם  כְּמִסְפַּ֥ד  הֲדַדְ־  רִמֹּ֖ון  בְּבִקְעַ֥ת  מְגִדֹּֽון׃  12   וְסָפְדָ֣ה  הָאָ֔רֶץ  מִשְׁפָּחֹ֥ות  מִשְׁפָּחֹ֖ות  לְבָ֑ד  מִשְׁפַּ֨חַת  בֵּית־  דָּוִ֤יד  לְבָד֙  וּנְשֵׁיהֶ֣ם  לְבָ֔ד  מִשְׁפַּ֤חַת  בֵּית־  נָתָן֙  לְבָ֔ד  וּנְשֵׁיהֶ֖ם  לְבָֽד׃  13   מִשְׁפַּ֤חַת  בֵּית־  לֵוִי֙  לְבָ֔ד  וּנְשֵׁיהֶ֖ם  לְבָ֑ד  מִשְׁפַּ֤חַת  הַשִּׁמְעִי֙  לְבָ֔ד  וּנְשֵׁיהֶ֖ם  לְבָֽד׃  14   כֹּ֗ל  הַמִּשְׁפָּחֹות֙  הַנִּשְׁאָרֹ֔ות  מִשְׁפָּחֹ֥ת  מִשְׁפָּחֹ֖ת  לְבָ֑ד  וּנְשֵׁיהֶ֖ם  לְבָֽד׃  ס 

<< Zechariah 12 >>
Biblos Greek and Hebrew Study Bible © 2010 Biblos.com
Online Parallel Bible