<< Psalms 86 HEB >>



David strengthens his prayer by the consciousness of his religion
1   תְּפִלָּ֗ה  לְדָ֫וִ֥ד  הַטֵּֽה־  יְהוָ֣ה  אָזְנְךָ֣  עֲנֵ֑נִי  כִּֽי־  עָנִ֖י  וְאֶבְיֹ֣ון  אָֽנִי׃  2   שָֽׁמְרָ֣ה  נַפְשִׁי֮  כִּֽי־  חָסִ֪יד  אָ֥נִי  הֹושַׁ֣ע  עַ֭בְדְּךָ  אַתָּ֣ה  אֱלֹהַ֑י  הַבֹּוטֵ֥חַ  אֵלֶֽיךָ׃  3   חָנֵּ֥נִי  אֲדֹנָ֑י  כִּ֥י  אֵלֶ֥יךָ  אֶ֝קְרָ֗א  כָּל־  הַיֹּֽום׃  4   מֵּחַ  נֶ֣פֶשׁ  עַבְדֶּ֑ךָ  כִּ֥י  אֵלֶ֥יךָ  אֲ֝דֹנָ֗י  נַפְשִׁ֥י  אֶשָּֽׂא׃ 


By the goodness and power of God
5   כִּֽי־  אַתָּ֣ה  אֲ֭דֹנָי  טֹ֣וב  וְסַלָּ֑ח  וְרַב־  חֶ֝֗סֶד  לְכָל־  קֹרְאֶֽיךָ׃  6   הַאֲזִ֣ינָה  יְ֭הוָה  תְּפִלָּתִ֑י  וְ֝הַקְשִׁ֗יבָה  בְּקֹ֣ול  תַּחֲנוּנֹותָֽי׃  7   בְּיֹ֣ום  צָ֭רָתִ֥י  אֶקְרָאֶ֗ךָּ  כִּ֣י  תַעֲנֵֽנִי׃  8   אֵין־  כָּמֹ֖וךָ  בָאֱלֹהִ֥ים  אֲדֹנָ֗י  וְאֵ֣ין  כְּֽמַעֲשֶֽׂיךָ׃  9   כָּל־  גֹּויִ֤ם  אֲשֶׁ֥ר  עָשִׂ֗יתָ  יָבֹ֤ואוּ  וְיִשְׁתַּחֲו֣וּ  לְפָנֶ֣יךָ  אֲדֹנָ֑י  וִֽיכַבְּד֣וּ  לִשְׁמֶֽךָ׃  10   כִּֽי־  גָדֹ֣ול  אַ֭תָּה  וְעֹשֵׂ֣ה  נִפְלָאֹ֑ות  אַתָּ֖ה  אֱלֹהִ֣ים  לְבַדֶּֽךָ׃ 


He desires the continuance of former grace
11   הֹ֘ורֵ֤נִי  יְהוָ֨ה  דַּרְכֶּ֗ךָ  אֲהַלֵּ֥ךְ  בַּאֲמִתֶּ֑ךָ  יַחֵ֥ד  לְ֝בָבִ֗י  לְיִרְאָ֥ה  שְׁמֶֽךָ׃  12   אֹודְךָ֤  אֲדֹנָ֣י  אֱ֭לֹהַי  בְּכָל־  לְבָבִ֑י  וַאֲכַבְּדָ֖ה  שִׁמְךָ֣  לְעֹולָֽם׃  13   כִּֽי־  חַ֭סְדְּךָ  גָּדֹ֣ול  עָלָ֑י  וְהִצַּ֥לְתָּ  נַ֝פְשִׁ֗י  מִשְּׁאֹ֥ול  תַּחְתִּיָּֽה׃ 


Complaining of the proud, he craves some token of God's goodness
14   אֱלֹהִ֤ים  זֵ֘דִ֤ים  קָֽמוּ־  עָלַ֗י  וַעֲדַ֣ת  עָ֭רִיצִים  בִּקְשׁ֣וּ  נַפְשִׁ֑י  וְלֹ֖א  שָׂמ֣וּךָ  לְנֶגְדָּֽם׃  15   וְאַתָּ֣ה  אֲ֭דֹנָי  אֵל־  רַח֣וּם  וְחַנּ֑וּן  אֶ֥רֶךְ  אַ֝פַּ֗יִם  וְרַב־  חֶ֥סֶד  וֶאֱמֶֽת׃  16   פְּנֵ֥ה  אֵלַ֗י  וְחָ֫נֵּ֥נִי  תְּנָֽה־  עֻזְּךָ֥  לְעַבְדֶּ֑ךָ  וְ֝הֹושִׁ֗יעָה  לְבֶן־  אֲמָתֶֽךָ׃  17   עֲשֵֽׂה־  עִמִּ֥י  אֹ֗ות  לְטֹ֫ובָ֥ה  וְיִרְא֣וּ  שֹׂנְאַ֣י  וְיֵבֹ֑שׁוּ  כִּֽי־  אַתָּ֥ה  יְ֝הוָ֗ה  עֲזַרְתַּ֥נִי  וְנִחַמְתָּֽנִי׃ 

<< Psalm 86 >>
Biblos Greek and Hebrew Study Bible © 2010 Biblos.com
Online Parallel Bible