<< Psalms 62 HEB >>


David, professing his confidence in God, discourages his enemies
1   לַמְנַצֵּ֥חַ  עַֽל־  יְדוּת֗וּן  מִזְמֹ֥ור  לְדָוִֽד׃  אַ֣ךְ  אֶל־  אֱ֭לֹהִים  דּֽוּמִיָּ֣ה  נַפְשִׁ֑י  מִ֝מֶּ֗נּוּ  יְשׁוּעָתִֽי׃  2   אַךְ־  ה֣וּא  צ֭וּרִי  וִֽישׁוּעָתִ֑י  מִ֝שְׂגַּבִּ֗י  לֹא־  אֶמֹּ֥וט  רַבָּֽה׃  3   עַד־  אָ֤נָה  תְּהֹֽותְת֣וּ  עַל  אִישׁ֮  תְּרָצְּח֪וּ  כֻ֫לְּכֶ֥ם  כְּקִ֥יר  נָט֑וּי  גָּ֝דֵ֗ר  הַדְּחוּיָֽה׃  4   אַ֤ךְ  מִשְּׂאֵתֹ֨ו  יָעֲצ֣וּ  לְהַדִּיחַ֮  יִרְצ֪וּ  כָ֫זָ֥ב  בְּפִ֥יו  יְבָרֵ֑כוּ  וּ֝בְקִרְבָּ֗ם  יְקַלְלוּ־  סֶֽלָה׃ 


In the same confidence he encourages the godly
5   אַ֣ךְ  לֵ֭אלֹהִים  דֹּ֣ומִּי  נַפְשִׁ֑י  כִּי־  מִ֝מֶּ֗נּוּ  תִּקְוָתִֽי׃  6   אַךְ־  ה֣וּא  צ֭וּרִי  וִֽישׁוּעָתִ֑י  מִ֝שְׂגַּבִּ֗י  לֹ֣א  אֶמֹּֽוט׃  7   עַל־  אֱ֭לֹהִים  יִשְׁעִ֣י  וּכְבֹודִ֑י  צוּר־  עֻזִּ֥י  מַ֝חְסִ֗י  בֵּֽאלֹהִֽים׃  8   בִּטְח֘וּ  בֹ֤ו  בְכָל־  עֵ֨ת  עָ֗ם  שִׁפְכֽוּ־  לְפָנָ֥יו  לְבַבְכֶ֑ם  אֱלֹהִ֖ים  מַחֲסֶה־  לָּ֣נוּ  סֶֽלָה׃ 


No trust is to be put in worldly things
9   אַ֤ךְ  הֶ֥בֶל  בְּנֵֽי־  אָדָם֮  כָּזָ֪ב  בְּנֵ֫י  אִ֥ישׁ  בְּמֹאזְנַ֥יִם  לַעֲלֹ֑ות  הֵ֝֗מָּה  מֵהֶ֥בֶל  יָֽחַד׃  10   אַל־  תִּבְטְח֣וּ  בְעֹשֶׁק֮  וּבְגָזֵ֪ל  אַל־  תֶּ֫הְבָּ֥לוּ  חַ֤יִל  כִּֽי־  יָנ֑וּב  אַל־  תָּשִׁ֥יתוּ  לֵֽב׃ 


Power and mercy belong to God
11   אַחַ֤ת  דִּבֶּ֬ר  אֱלֹהִ֗ים  שְׁתַּֽיִם־  ז֥וּ  שָׁמָ֑עְתִּי  כִּ֥י  עֹ֝֗ז  לֵאלֹהִֽים׃  12   וּלְךָֽ־  אֲדֹנָ֥י  חָ֑סֶד  כִּֽי־  אַתָּ֨ה  תְשַׁלֵּ֖ם  לְאִ֣ישׁ  כְּֽמַעֲשֵֽׂהוּ׃ 
<< Psalm 62 >>
Biblos Greek and Hebrew Study Bible © 2010 Biblos.com
Online Parallel Bible