<< Psalms 24 HEB >>


God's Lordship in the world
1   לְדָוִ֗ד  מִ֫זְמֹ֥ור  לַֽ֭יהוָה  הָאָ֣רֶץ  וּמְלֹואָ֑הּ  תֵּ֝בֵ֗ל  וְיֹ֣שְׁבֵי  בָֽהּ׃  2   כִּי־  ה֖וּא  עַל־  יַמִּ֣ים  יְסָדָ֑הּ  וְעַל־  נְ֝הָרֹ֗ות  יְכֹונְנֶֽהָ׃ 


The citizens of his spiritual kingdom
3   מִֽי־  יַעֲלֶ֥ה  בְהַר־  יְהוָ֑ה  וּמִי־  יָ֝קוּם  בִּמְקֹ֥ום  קָדְשֹֽׁו׃  4   נְקִ֥י  כַפַּ֗יִם  וּֽבַר־  לֵ֫בָ֥ב  אֲשֶׁ֤ר  לֹא־  נָשָׂ֣א  לַשָּׁ֣וְא  נַפְשִׁ֑י  וְלֹ֖א  נִשְׁבַּ֣ע  לְמִרְמָֽה׃  5   יִשָּׂ֣א  בְ֭רָכָה  מֵאֵ֣ת  יְהוָ֑ה  וּ֝צְדָקָ֗ה  מֵאֱלֹהֵ֥י  יִשְׁעֹֽו׃  6   זֶ֭ה  דֹּ֣ור  [דֹּרְשֹׁו  כ]  (דֹּרְשָׁ֑יו  ק)  מְבַקְשֵׁ֨י  פָנֶ֖יךָ  יַעֲקֹ֣ב  סֶֽלָה׃ 


An exhortation to receive him
7   שְׂא֤וּ  שְׁעָרִ֨ים  רָֽאשֵׁיכֶ֗ם  וְֽ֭הִנָּשְׂאוּ  פִּתְחֵ֣י  עֹולָ֑ם  וְ֝יָבֹ֗וא  מֶ֣לֶךְ  הַכָּבֹֽוד׃  8   מִ֥י  זֶה֮  מֶ֤לֶךְ  הַכָּ֫בֹ֥וד  יְ֭הוָה  עִזּ֣וּז  וְגִבֹּ֑ור  יְ֝הוָ֗ה  גִּבֹּ֥ור  מִלְחָמָֽה׃  9   שְׂא֤וּ  שְׁעָרִ֨ים  רָֽאשֵׁיכֶ֗ם  וּ֭שְׂאוּ  פִּתְחֵ֣י  עֹולָ֑ם  וְ֝יָבֹא  מֶ֣לֶךְ  הַכָּבֹֽוד׃  10   מִ֤י  ה֣וּא  זֶה֮  מֶ֤לֶךְ  הַכָּ֫בֹ֥וד  יְהוָ֥ה  צְבָאֹ֑ות  ה֤וּא  מֶ֖לֶךְ  הַכָּבֹ֣וד  סֶֽלָה׃ 
<< Psalm 24 >>
Biblos Greek and Hebrew Study Bible © 2010 Biblos.com
Online Parallel Bible