<< Psalms 147 HEB >>


The prophet exhorts to praise God for his care of the church
1   הַ֥לְלוּ  יָ֨הּ  כִּי־  טֹ֖וב  זַמְּרָ֣ה  אֱלֹהֵ֑ינוּ  כִּֽי־  נָ֝עִים  נָאוָ֥ה  תְהִלָּֽה׃  2   בֹּונֵ֣ה  יְרוּשָׁלִַ֣ם  יְהוָ֑ה  נִדְחֵ֖י  יִשְׂרָאֵ֣ל  יְכַנֵּֽס׃  3   הָ֭רֹפֵא  לִשְׁב֣וּרֵי  לֵ֑ב  וּ֝מְחַבֵּ֗שׁ  לְעַצְּבֹותָֽם׃ 


His power and wisdom
4   מֹונֶ֣ה  מִ֭סְפָּר  לַכֹּוכָבִ֑ים  לְ֝כֻלָּ֗ם  שֵׁמֹ֥ות  יִקְרָֽא׃  5   גָּדֹ֣ול  אֲדֹונֵ֣ינוּ  וְרַב־  כֹּ֑חַ  לִ֝תְבוּנָתֹ֗ו  אֵ֣ין  מִסְפָּֽר׃ 


His mercy
6   מְעֹודֵ֣ד  עֲנָוִ֣ים  יְהוָ֑ה  מַשְׁפִּ֖יל  רְשָׁעִ֣ים  עֲדֵי־  אָֽרֶץ׃ 


His providence
7   עֱנ֣וּ  לַיהוָ֣ה  בְּתֹודָ֑ה  זַמְּר֖וּ  לֵאלֹהֵ֣ינוּ  בְכִנֹּֽור׃  8   הַֽמְכַסֶּ֬ה  שָׁמַ֨יִם  בְּעָבִ֗ים  הַמֵּכִ֣ין  לָאָ֣רֶץ  מָטָ֑ר  הַמַּצְמִ֖יחַ  הָרִ֣ים  חָצִֽיר׃  9   נֹותֵ֣ן  לִבְהֵמָ֣ה  לַחְמָ֑הּ  לִבְנֵ֥י  עֹ֝רֵ֗ב  אֲשֶׁ֣ר  יִקְרָֽאוּ׃  10   לֹ֤א  בִגְבוּרַ֣ת  הַסּ֣וּס  יֶחְפָּ֑ץ  לֹֽא־  בְשֹׁוקֵ֖י  הָאִ֣ישׁ  יִרְצֶֽה׃  11   רֹוצֶ֣ה  יְ֭הוָה  אֶת־  יְרֵאָ֑יו  אֶת־  הַֽמְיַחֲלִ֥ים  לְחַסְדֹּֽו׃ 


To praise him for his blessings upon the kingdom
12   שַׁבְּחִ֣י  יְ֭רוּשָׁלִַם  אֶת־  יְהוָ֑ה  הַֽלְלִ֖י  אֱלֹהַ֣יִךְ  צִיֹּֽון׃  13   כִּֽי־  חִ֭זַּק  בְּרִיחֵ֣י  שְׁעָרָ֑יִךְ  בֵּרַ֖ךְ  בָּנַ֣יִךְ  בְּקִרְבֵּֽךְ׃  14   הַשָּׂם־  גְּבוּלֵ֥ךְ  שָׁלֹ֑ום  חֵ֥לֶב  חִ֝טִּ֗ים  יַשְׂבִּיעֵֽךְ׃ 


For his power over the elements
15   הַשֹּׁלֵ֣חַ  אִמְרָתֹ֣ו  אָ֑רֶץ  עַד־  מְ֝הֵרָ֗ה  יָר֥וּץ  דְּבָרֹֽו׃  16   הַנֹּתֵ֣ן  שֶׁ֣לֶג  כַּצָּ֑מֶר  כְּ֝פֹ֗ור  כָּאֵ֥פֶר  יְפַזֵּֽר׃  17   מַשְׁלִ֣יךְ  קַֽרְחֹ֣ו  כְפִתִּ֑ים  לִפְנֵ֥י  קָ֝רָתֹ֗ו  מִ֣י  יַעֲמֹֽד׃  18   יִשְׁלַ֣ח  דְּבָרֹ֣ו  וְיַמְסֵ֑ם  יַשֵּׁ֥ב  ר֝וּחֹ֗ו  יִזְּלוּ־  מָֽיִם׃ 


And for his ordinances in the church
19   מַגִּ֣יד  [דְּבָרֹו  כ]  (דְּבָרָ֣יו  ק)  לְיַעֲקֹ֑ב  חֻקָּ֥יו  וּ֝מִשְׁפָּטָ֗יו  לְיִשְׂרָאֵֽל׃  20   לֹ֘א  עָ֤שָׂה  כֵ֨ן  לְכָל־  גֹּ֗וי  וּמִשְׁפָּטִ֥ים  בַּל־  יְדָע֗וּם  הַֽלְלוּ־  יָֽהּ׃ 
<< Psalm 147 >>
Biblos Greek and Hebrew Study Bible © 2010 Biblos.com
Online Parallel Bible