<< Psalms 140 HEB >>



David prays to be delivered from Saul and Doeg
1   לַמְנַצֵּ֗חַ  מִזְמֹ֥ור  לְדָוִֽד׃  חַלְּצֵ֣נִי  יְ֭הוָה  מֵאָדָ֣ם  רָ֑ע  מֵאִ֖ישׁ  חֲמָסִ֣ים  תִּנְצְרֵֽנִי׃  2   אֲשֶׁ֤ר  חָשְׁב֣וּ  רָעֹ֣ות  בְּלֵ֑ב  כָּל־  יֹ֝֗ום  יָג֥וּרוּ  מִלְחָמֹֽות׃  3   שָֽׁנֲנ֣וּ  לְשֹׁונָם֮  כְּֽמֹו־  נָ֫חָ֥שׁ  חֲמַ֥ת  עַכְשׁ֑וּב  תַּ֖חַת  שְׂפָתֵ֣ימֹו  סֶֽלָה׃  4   שָׁמְרֵ֤נִי  יְהוָ֨ה  מִ֘ידֵ֤י  רָשָׁ֗ע  מֵאִ֣ישׁ  חֲמָסִ֣ים  תִּנְצְרֵ֑נִי  אֲשֶׁ֥ר  חָ֝שְׁב֗וּ  לִדְחֹ֥ות  פְּעָמָֽי׃  5   טָֽמְנֽוּ־  גֵאִ֨ים  פַּ֡ח  לִ֗י  וַחֲבָלִ֗ים  פָּ֣רְשׂוּ  רֶ֭שֶׁת  לְיַד־  מַעְגָּ֑ל  מֹקְשִׁ֖ים  שָֽׁתוּ־  לִ֣י  סֶֽלָה׃  6   אָמַ֣רְתִּי  לַ֭יהוָה  אֵ֣לִי  אָ֑תָּה  הַאֲזִ֥ינָה  יְ֝הוָ֗ה  קֹ֣ול  תַּחֲנוּנָֽי׃  7   יְהֹוִ֣ה  אֲ֭דֹנָי  עֹ֣ז  יְשׁוּעָתִ֑י  סַכֹּ֥תָה  לְ֝רֹאשִׁ֗י  בְּיֹ֣ום  נָֽשֶׁק׃ 


He prays against them
8   אַל־  תִּתֵּ֣ן  יְ֭הוָה  מַאֲוַיֵּ֣י  רָשָׁ֑ע  זְמָמֹ֥ו  אַל־  תָּ֝פֵ֗ק  יָר֥וּמוּ  סֶֽלָה׃  9   רֹ֥אשׁ  מְסִבָּ֑י  עֲמַ֖ל  שְׂפָתֵ֣ימֹו  [יְכַסּוּמֹו  כ]  (יְכַסֵּֽמֹו  ק)  10   [יָמִיטוּ  כ]  (יִמֹּ֥וטוּ  ק)  עֲלֵיהֶ֗ם  גֶּֽחָ֫לִ֥ים  בָּאֵ֥שׁ  יַפִּלֵ֑ם  בְּ֝מַהֲמֹרֹ֗ות  בַּֽל־  יָקֽוּמוּ׃  11   אִ֥ישׁ  לָשֹׁון֮  בַּל־  יִכֹּ֪ון  בָּ֫אָ֥רֶץ  אִישׁ־  חָמָ֥ס  רָ֑ע  יְ֝צוּדֶ֗נּוּ  לְמַדְחֵפֹֽת׃ 


He comforts himself by confidence in God
12   [יָדַעְתָּ  כ]  (יָדַ֗עְתִּי  ק)  כִּֽי־  יַעֲשֶׂ֣ה  יְ֭הוָה  דִּ֣ין  עָנִ֑י  מִ֝שְׁפַּ֗ט  אֶבְיֹנִֽים׃  13   אַ֣ךְ  צַ֭דִּיקִים  יֹוד֣וּ  לִשְׁמֶ֑ךָ  יֵשְׁב֥וּ  יְ֝שָׁרִ֗ים  אֶת־  פָּנֶֽיךָ׃ 

<< Psalm 140 >>
Biblos Greek and Hebrew Study Bible © 2010 Biblos.com
Online Parallel Bible