<< Proverbs 29 HEB >>


observations of public government
1   אִ֣ישׁ  תֹּ֭וכָחֹות  מַקְשֶׁה־  עֹ֑רֶף  פֶּ֥תַע  יִ֝שָּׁבֵ֗ר  וְאֵ֣ין  מַרְפֵּֽא׃  2   בִּרְבֹ֣ות  צַ֭דִּיקִים  יִשְׂמַ֣ח  הָעָ֑ם  וּבִמְשֹׁ֥ל  רָ֝שָׁ֗ע  יֵאָ֥נַֽח  עָֽם׃  3   אִֽישׁ־  אֹהֵ֣ב  חָ֭כְמָה  יְשַׂמַּ֣ח  אָבִ֑יו  וְרֹעֶ֥ה  זֹ֝ונֹ֗ות  יְאַבֶּד־  הֹֽון׃  4   מֶ֗לֶךְ  בְּ֭מִשְׁפָּט  יַעֲמִ֣יד  אָ֑רֶץ  וְאִ֖ישׁ  תְּרוּמֹ֣ות  יֶֽהֶרְסֶֽנָּה׃  5   גֶּ֭בֶר  מַחֲלִ֣יק  עַל־  רֵעֵ֑הוּ  רֶ֝֗שֶׁת  פֹּורֵ֥שׂ  עַל־  פְּעָמָֽיו׃  6   בְּפֶ֤שַֽׁע  אִ֣ישׁ  רָ֣ע  מֹוקֵ֑שׁ  וְ֝צַדִּ֗יק  יָר֥וּן  וְשָׂמֵֽחַ׃  7   יֹדֵ֣עַ  צַ֭דִּיק  דִּ֣ין  דַּלִּ֑ים  רָ֝שָׁ֗ע  לֹא־  יָבִ֥ין  דָּֽעַת׃  8   אַנְשֵׁ֣י  לָ֭צֹון  יָפִ֣יחוּ  קִרְיָ֑ה  וַ֝חֲכָמִ֗ים  יָשִׁ֥יבוּ  אָֽף׃  9   אִֽישׁ־  חָכָ֗ם  נִ֭שְׁפָּט  אֶת־  אִ֣ישׁ  אֱוִ֑יל  וְרָגַ֥ז  וְ֝שָׂחַ֗ק  וְאֵ֣ין  נָֽחַת׃  10   אַנְשֵׁ֣י  דָ֭מִים  יִשְׂנְאוּ־  תָ֑ם  וִֽ֝ישָׁרִ֗ים  יְבַקְשׁ֥וּ  נַפְשֹֽׁו׃  11   כָּל־  ר֭וּחֹו  יֹוצִ֣יא  כְסִ֑יל  וְ֝חָכָ֗ם  בְּאָחֹ֥ור  יְשַׁבְּחֶֽנָּה׃  12   מֹ֭שֵׁל  מַקְשִׁ֣יב  עַל־  דְּבַר־  שָׁ֑קֶר  כָּֽל־  מְשָׁרְתָ֥יו  רְשָׁעִֽים׃  13   רָ֤שׁ  וְאִ֣ישׁ  תְּכָכִ֣ים  נִפְגָּ֑שׁוּ  מֵ֤אִיר־  עֵינֵ֖י  שְׁנֵיהֶ֣ם  יְהוָֽה׃  14   מֶ֤לֶךְ  שֹׁופֵ֣ט  בֶּֽאֱמֶ֣ת  דַּלִּ֑ים  כִּ֝סְאֹ֗ו  לָעַ֥ד  יִכֹּֽון׃ 


and of private
15   שֵׁ֣בֶט  וְ֭תֹוכַחַת  יִתֵּ֣ן  חָכְמָ֑ה  וְנַ֥עַר  מְ֝שֻׁלָּ֗ח  מֵבִ֥ישׁ  אִמֹּֽו׃  16   בִּרְבֹ֣ות  רְ֭שָׁעִים  יִרְבֶּה־  פָּ֑שַׁע  וְ֝צַדִּיקִ֗ים  בְּֽמַפַּלְתָּ֥ם  יִרְאֽוּ׃  17   יַסֵּ֣ר  בִּ֭נְךָ  וִֽינִיחֶ֑ךָ  וְיִתֵּ֖ן  מַעֲדַנִּ֣ים  לְנַפְשֶֽׁךָ׃  פ  18   בְּאֵ֣ין  חָ֭זֹון  יִפָּ֣רַֽע  עָ֑ם  וְשֹׁמֵ֖ר  תֹּורָ֣ה  אַשְׁרֵֽהוּ׃  19   בִּ֭דְבָרִים  לֹא־  יִוָּ֣סֶר  עָ֑בֶד  כִּֽי־  יָ֝בִ֗ין  וְאֵ֣ין  מַעֲנֶֽה׃  20   חָזִ֗יתָ  אִ֭ישׁ  אָ֣ץ  בִּדְבָרָ֑יו  תִּקְוָ֖ה  לִכְסִ֣יל  מִמֶּֽנּוּ׃  21   מְפַנֵּ֣ק  מִנֹּ֣עַר  עַבְדֹּ֑ו  וְ֝אַחֲרִיתֹ֗ו  יִהְיֶ֥ה  מָנֹֽון׃ 


Of anger, pride, thievery, cowardice and corruption
22   אִֽישׁ־  אַ֭ף  יְגָרֶ֣ה  מָדֹ֑ון  וּבַ֖עַל  חֵמָ֣ה  רַב־  פָּֽשַׁע׃  23   גַּאֲוַ֣ת  אָ֭דָם  תַּשְׁפִּילֶ֑נּוּ  וּשְׁפַל־  ר֝֗וּחַ  יִתְמֹ֥ךְ  כָּבֹֽוד׃  24   חֹולֵ֣ק  עִם־  גַּ֭נָּב  שֹׂונֵ֣א  נַפְשֹׁ֑ו  אָלָ֥ה  יִ֝שְׁמַ֗ע  וְלֹ֣א  יַגִּֽיד׃  25   חֶרְדַּ֣ת  אָ֭דָם  יִתֵּ֣ן  מֹוקֵ֑שׁ  וּבֹוטֵ֖חַ  בַּיהוָ֣ה  יְשֻׂגָּֽב׃  26   רַ֭בִּים  מְבַקְשִׁ֣ים  פְּנֵי־  מֹושֵׁ֑ל  וּ֝מֵיְהוָ֗ה  מִשְׁפַּט־  אִֽישׁ׃  27   תֹּועֲבַ֣ת  צַ֭דִּיקִים  אִ֣ישׁ  עָ֑וֶל  וְתֹועֲבַ֖ת  רָשָׁ֣ע  יְשַׁר־  דָּֽרֶךְ׃  פ 
<< Proverbs 29 >>
Biblos Greek and Hebrew Study Bible © 2010 Biblos.com
Online Parallel Bible